Read Batak Dairi Jeremia 48 Bible Online

Jeremia 48 - Batak Dairi bible

Jeremia 48

¹Enda mo pendokken JAHOWA Pergegoh Sisotercodi, Dèbata Israel tersèngèt Moab, “Merjaya mo pengisi Nebo, enggo merentuh kutana! Itaban mo Kiryataim, janah ilala karina bèntèngna sintegguh i, dungna gabè termèla mo pengisina;

²mersep mo sinièndèlken Moab. Enggo itaban musuh Hesybon janah i sidi ngo kalak i mertaki lako petumpatken karina bangsa Moab. Pesipenna mo kata-kata sinikuta Madmen, kerna naing ijuhap soridadu mo kuta i.

³Dengkohken mo! Pingko-pingko mo pengisi Horonaim menurakken, ‘Enggo payu! Mago mo keppè kita!’

⁴Enggo mo salpun keppèken Moab! Terdengkoh ngo sora derko-derko dukak-dukak kèdèk kalak i soh mi Zoar.

⁵Beggèken mo sora tangis i dalan menangkeng lako mi Luhit, dekket sora tangis milangi i dalan mengencuah lako mi Horonaim.

⁶Nina kalak i ngo, ‘Kettu ndor! Paluah mo dirimu! Kettu mo lojang bagè perlojang balkih i rambah!’

⁷Alè Moab! Ièndèlken ko ngo kecardikenmu dekket kinibèakmu. Tapi bagèndari italuken mo kono. Alè Kamos, ibantun nè mo dèbatamu, rebbak dekket karina imammu dekket pugabè-pugabèmu mi buangen.

⁸Salpun mo karina kuta sada poda lot mpellut. Melencoh mo karina lembeng dekket singkendet. Aku, JAHOWA ngo, sienggo mendokken i.

⁹Bahan mo batu pertanda kuburen bai Moab, kerna oda ndekkah nèngè isalpuni mo nagerri i karina. Merentuh mo karina kutana janah sada kalak poda lot nèngè tading i sidi.”

¹⁰Merjaya ngo kalak siso mertuhu-tuhu mengulaken ulaen bai JAHOWA nai. Merjaya mo ia siso menintak peddang dekket siso memunuh.

¹¹Nina JAHOWA mo, “Arnia nai ngo Moab sennang nggelluhna. Oda nung dèng ia iembah mi buangen. Codi bagè laè anggur ngo ia sinibelli mengendap janah oda nung iosèken mi bekkas anggur sidèban. Baungkus dèng ngo anggurna janah merasa.

¹²Tapi, roh nèngè mo katikana pasulakkenku mo asa iosèken ma Moab codi bagè anggur, janah bekkas-bekkasna inumari janah ipustakken.

¹³Terdehèrep mo Moab meradepken Kamos, dèbata kalak i, tosè bagè kalak Israel terdehèrep taba Betel siniasangken kalak idi.

¹⁴Bakunè kin mo permboho anak laki kalak Moab mendokken, ‘Perbabang ngo kami, soridadu mahantu sienggo ioji ibas geraha?’

¹⁵Enggo isalpuni Moab dekket kuta-kutana, janah anak peranana sisellohna enggo ibunuh. Enggo ngo kudokken. Aku ngo raja, JAHOWA Pergegoh Sisotercodi.

¹⁶Enggo ngo ndessing pekiroh olpek taba Moab, oda ndekkah nèngè salpun mo ia.

¹⁷Kènè alè karina kerajaen cibal baleng Moab simemettoh tersèngèt ketermurmurenna, merhendem mo kènè kerna ia! Dokken mo, ‘Oda merkuasa nèngè Moab, enggo mo salpun kebelgahen bak kegegohenna!’

¹⁸Alè pengisi Dibon, susur mo kono i bekkasmu nai simersangap i; dogok mo kono i tanoh dekket i babo abu. Kerna enggo ngo roh simencèdaken Moab nagerrimu idi, janah naing mengelala karina bèntèngmu.

¹⁹O Kènè simerian i Aroër, cènder mo kènè i biding dalan janah datèken! Kusoken mo taba kalak simerberrus, dekket simaluah, ‘Kadè ngo sienggo masa?’

²⁰Ialoi kalak i mo kènè, ‘Enggo talu Moab janah gabè merlèa, kerna i tangisi kènè mo ia. Tingtingken mo mengèkut-ngèkut arur Laè Arnon enggo ngo talu ukum Moab.’ ”

²¹“Enggo idabuh hukum dempak karina kuta silot i sindastar: imo Holon, Jahas, Mefaat,

²²Dibon. Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot, dekket Bozra. Karina kuta silot i Moab, sindaoh dekket sinjolmit enggo kenna hukum.

²⁵Enggo ngo italpekken kegegohen Moab, janah i salpuni kuasana. Aku, JAHOWA ngo, sienggo mendokken i.”

²⁶Nina JAHOWA mo, “Baing mo gabè mabuk Moab, kerna mbarjang ngo ia taba Aku. Gumalèsang mo ia ipas utah-utahna, janah itaba-tabai dèba.

²⁷Otang ngo arnia enggo itertabai Moab kalak Israel janah dak irana-ranaken bagè cara terdapet kalak i rasken dekket penangko-penangko?

²⁸O kènè alè pengisi Moab, tadingken kènè mo kuta ndènè janah merian mo kènè i delleng batu bagè manuk-manuk ndarapati simemahan asarna i lingling.

²⁹Enggo kudengkoh bakunè tunggang ndènè, ndatesna ukur ndènè, congkak dekket mbarjang ndènè!

³⁰Aku, JAHOWA memettoh bakunè kinimbarjang ndènè. Luap ngo buèen ranamu, janah oda lot kadè lapatenna sinibahanmu.

³¹Kerna i nggang ngo Aku tangis menangisi kènè karina dekket menangisi kalak sini Kir-Heres, kuta sabungen ndènè.

³²Muat tangisna deng ngo aku mengidah pengisi Sibma daripada pengisi Jaezer. Kuta Sibma codi ngo bagè suan-suanen anggur simenjoror pucuk-pucukna soh mi kèpar Laut Matè soh mi Jaezer. Tapi bagèndari nasa buah mosin nggara dekket buah anggurna enggo isalpuni.

³³Enggo mersep karina surak oang oang i nagerri Moab nai singgabur i. Mentadi mo marir kubakin laè anggur i pengilangen anggur nai; oda lot nèngè kalak pepadaken anggur dekket mersurak sampang atè.

³⁴Mertangisen mo kalak sini Hesybon dekket Eleale janah terdengkoh ngo tangisna soh mi Jahas, janah terdengkoh ma bai kalak sini Zoar nai soh mi Horonaim dekket Eglat-Selisia. Mertangisen ngo kalak i kerna laè sini anak batang laè Nimrim pè enggo marsak.

³⁵Mentadi mo bakinenku kalak Moab menutung pèlèen i gennep bekkas pemèlèen kalak i janah mentadi memèlèken pèlèen taba dèbata dèbata kalak i. Aku, JAHOWA ngo, sienggo mendokken i.

³⁶Karina kinibèak Kir-Heres dekket Moab enggo salpun. Bonek ngo ukurku midah simasa bai kalak i; codi ngo aku bagè Pesoraken endè melungun ibas suling.

³⁷Enggo karina kalak i mencukkur buk takal dekket janggutna, mengugahi bettèkenna, janah menelluk kaèn goni tanda merbonek atè.

³⁸Pellin sora tangis sambing ngo terdengkoh i babo karina jojong bages dekket i tanoh mbellang. Kerna enggo kupustakken Moab bagè dulang siso perlu nèngè.

³⁹Enggo mo kerri Moab melala! Sondel mo kememalu Moab! Tangis ngo ia kerna enggo ilèai janah gabè sitaba-tabaen bangsa kumaliangna. Aku, JAHOWA ngo, sienggo mendokken i.”

⁴⁰Idokken JAHOWA mo, “Codi bagè manuk-manuk rajawali menèmbuk ninganna ngkerbang kabengna i, bagidi mo roh sada bangsa janah menèmbuk Moab.

⁴¹Itaban mo karina kuta bak bèntèng-bèntèngna janah buradan mo soridaduna bagè daberru sinaing ketaring.

⁴²Mago mo Moab janah oda nèngè bagè sada bangsa, kerna tunggang ngo kalak i taba Aku.

⁴³Ipehadep ngo kalak i dempak penenggetten, geddung dekket jarat.

⁴⁴Kalak simerberrus ipas penenggeten nai ndabuh mi bagasen geddung, janah kalak simendarat i geddung idi nai tersengkik jarat. Masa ngo idi karina ibas katika sienggo Kutetapken lako mengago Moab.

⁴⁵Merlausen mo pengusi siso mergoldè menulusi percibonien mi Hesybon, tapi tupung melekkup ngo kuta i dekket istana Raja Sihon pè tupung ipangan api. Enggo ngo ikerriken api arur perbalengen dekket uruk Moab, nagerri kalak sikucul mergeraha.

⁴⁶Merjaya mo Moab! Enggo iripasken jelma pengisina simenembah sembahen Kamos, janah dukak-dukak kalak i ibantun gabè tabanen.

⁴⁷Tapi i podiari pesuangenku mo nola nagerri Moab. Aku, JAHOWA ngo, simendokken i!” Idi mo sinaing bakinen JAHOWA taba Moab.