Read Batak Dairi Jeremia 49 Bible Online

Jeremia 49 - Batak Dairi bible

Jeremia 49

¹Enda mo idokken JAHOWA tersèngèt Amon, “Kasa tanoh marga Gad irampasi janah iiani kalak simemèlè Dèbata Milkom? Oda nèngè ngo ndia lot kalak Israel sindorok kipertahanken ladang i?

²Tapi dapet nèngè mo katikana baingenku mo pengisi Raba, kuta sabungen nagerri Amon i, mendengkoh surak-surak geraha. Merumpak mo kuta i janah kerri mo melekkup karina kuta silot i kumaliangna. Nai ibuat kalak Israel nola mo balik tanohna idi kin bai kalak simengerampasi idi nai.

³O kènè kalak Hesybon, tangis mo kènè kerna enggo salpun kuta Ai! O kènè alè daberru-daberru kuta Raba, tangis milangi mo kènè! Selluk mo kaèn goni tanda merbonek atè. Merlojangen mo kènè mi jèhè mi julu oda ibettoh kènè nè temburen ndènè. Ibantun mo Milkom dèbata ndènè i mi buangen rasken dekket imam-imam dekket pugabè-pugabè pemerèntahna!

⁴O kènè alè siso bujur! Kasa mo pella èndèlenken ndènè tanoh napa-napa singgabur sini-ianen ndènè i? Kadè kulih sebabna iasangken kènè kinibèak ndènè? Bakunè mo pertuhuna idokken kènè oda lot isè pang lako menjuhap kènè?

⁵Bakinenku mo sempa taba kènè merbagè kinidersa siroh i karina pihak nai. Mperrus mo kènè, mersitunjul dalanna paluahken dirina sendiri, janah oda lot nèngè sipepulungken kènè.

⁶Tapi i podi ari, pesuangenku nola mo bangsa Amon. Aku, JAHOWA ngo, sienggo mendokken i.”

⁷Bagèen ngo idokken JAHOWA Pergegoh Sisotercodi tersèngèt kalak Edom, “Oda ngo ndorok kalak Edom merukur bijak? Oda ngo iberrèken sipandè peddah bai kalak i? Enggo mo ndia mago kepantasen kalak i!

⁸O kènè alè pengisi Dedan, balik mo kènè, janah lojang mo! Laus mo kènè ciboni. Naing kusalpuni ngo pemparen si Esau, kerna enggo dapet katikana Aku menghukum kalak i.

⁹Mula menapu buah anggur kalak, dak lot ngo tong itadingken, janah mula roh penangko tikan berngin, pellin siperlu bana ngo kessa ibuat.

¹⁰Tapi, ukum Aku kuapus mo kerri silot bai pemparen si Esau janah memagahken rusia bekkas percibonien kalak i; gabè oda nèngè mo terboniken kalak i dirina. Ukum kalak Edom rebbak dekket kaka-anggina bak sincelket kalak i, enggo ibinasaken karina, sada kalak poda lot maluah.

¹¹Alè Edom! Tadingken mo anak melumang ndènè bangKu, asa kupehèdu-hèdu kalak i. Belli mo merketoken taba aku daberru mbalu ndènè.

¹²Kalak siso patut kena hukum pè, kenna hukum ngo, kasa nola kènè oda? Pasti kennah ihukum ngo kènè.

¹³Kumangmangken mo merkitè gerarKu magahken ukum kuta Bozra kennah gabè bekkas ncengnga sinitadingken dèba. Itaba-tabai dèba mo kuta i janah gerarna ibaing gabè sumbiah. Karina kuta silot i kumaliangna gabè terulang soh mi sidekkah-dekkahna. Aku, JAHOWA ngo, sienggo mendokken idi.”

¹⁴Aku, si Jeremia mendokken, “Alè Edom, enggo kujalo sada berita bai JAHOWA nai. Enggo ipasulak pasulakkenna mendahi bangsa-bangsa lako mendokken kalak i pepulungken soridadu janah kebbas lako menjuhap kono.

¹⁵Gabè ndotè mo ko ibaing JAHOWA janah gabè ilèai dèba.

¹⁶Tertipu ngo ko ibaing kinitoalmu. Oda lot kalak mbiar midah ko bagè sinidok atèmu sidekkahna èn. Merbekkas i cellah-cellah batu ngo ko, ndaoh i babo ndelleng. Tapi, tukasi nola pè ibahan kono sapomu i bekkas sindates kalohon, bagè datesna bekkas asar manuk-manuk rajawali, ipesampur JAHOWA ngo kono i sidi nai. JAHOWA ngo simendokken karinana idi.”

¹⁷Nina JAHOWA, “Ntengngam kalohon ngo jèkat simenerpa Edom gabèna gennep kalak simemellus i sidi tersengget janah buradan.

¹⁸Tosè bagè Sodom dekket Gomora isalpuni dekket karina sosor i sikulilingna, bagi ma mo bang Edom pè. Sada kalak nè poda lot tading i sidi. Aku, JAHOWA ngo, sienggo mengerana.

¹⁹Bagè singa roh i rambah talintua i gembar Laè Jordan nai, janah roh mi jampalen bekkas biri-biri menggagat, bagidi mo Aku naing roh janah memaingken kalak Edom mperrus i nagerri kalak idi nai ibagasen sintempu. Nai Kupilih nola mo sada kalak huntuen lako mengerajai bangsa i. Ise ngo ndorok terpecodi baku? Mèter isè mo mboho merperkara dekket Aku? Mèter lot kin mo pemimpin sindorok mengalo Aku?

²⁰Kumerna i, dengkohken mo kadè sienggo kurencanaken meradepken kalak Edom, janah barang kadè sinaing bakinenku taba pengisi kuta Téman. Dukak-dukak kalak i pè i bantun ngo laus, janah karina mo kalak gabè buradan.

²¹Mula enggo kessa ndabuh Edom, terdengkoh mo kegutturen mbellen sanga gontar suberri dunia; derko-derko pengisina terdengkoh mo soh mi Laut Arngo.

²²Bagè manuk-manuk keliki simenembuk dekket kabengna ngkerbang i, bagidi mo pekiroh musuh ninganna menèmbuk Bozra. Ipas sidarinkenna i buradan mo tenterra Edom bagè daberru sinaing ketaring.”

²³Bagèen ngo idokken JAHOWA tersèngèt Damaskus. “Ganggu janah bulisah ngo pengakap pengisi kuta Hamat dekket Arpad kumerna mendengkoh berita oda selloh. Merbulut ngo perukuren kalak i janah oda menentu bagè galombang laut.

²⁴Gabè ndalmeh ngo pengisi Damaskus, janah mperrus buradan. Mpiah ngo iakap kalak i janah pèahen bagè daberru rabisen.

²⁵Kuta sitermurmur janah meroang-oang idi bagèndari melongo oda nè lot pengisina.

²⁶Tupung ari i mermatèen mo anak peranana i dalan sinikuta i, janah isalpuni karina soridaduna.

²⁷Lekkupenku mo dingding pagar kuta Damaskus janah Kulekkup mo istana-istana Raja Benhadad. Aku, JAHOWA Pergegoh Sisitercodi ngo, sienggo mengerana.”

²⁸Bagèen ngo idokken JAHOWA tersèngèt marga Kedar dekket karina ladang sinirajaen si Hazor, sienggo itaban si Nebukadnezar raja Babel, “Alè Nebukadnezar, juhap mo marga Kedar janah ripasken mo kalak sikettan kebincaren!

²⁹Rampasi mo pinakan biri-biri, unta, bak undung-undung kalak i dekket karina silot ibagasenna, janah surakken kènè mo taba kalak i, ‘Jaga siap mo kènè kubaing kami!’

³⁰Alè kènè kalak Hazor! Aku, JAHOWA mendokken: Kettu kènè mo mengusi, janah ciboni. Enggo ngo itaki si Nebukadnezar raja Babel lako menjuhap kènè. Nina ngo,

³¹‘Kebbas mo kè! Ita kè mo kita menjuhap kalak simengakapken dirina sennang janah mènak idi. Murah ngo cedaenken kuta kalak i kerna oda lot pèntu pengkeruhenna janah oda lot gerruk-gerrukna.’ ”

³²Nai nina JAHOWA dèng ma taba si Nebukadnezar, “Rampasi mo karina unta bak pinakan kalak i! Karina kalak simenggonting bukna joppok idi baingenku mo tah pak dikè dèba. Bakinenku mo roh jèkat taba kalak i i dèsa siualuh nai.

³³Terulang mo Hazor soh sidekkah-dekkahna janah gabè bekkas percibonien bengèkur. Sada kalak poda lot nè merian i sidi. Aku, JAHOWA ngo, sienggo mengerana.”

³⁴Oda ndekkah enggo kessa si Zedekia gabè raja Juda, idokken JAHOWA mo taba aku tersèngèt nagerri Elam.

³⁵Nina JAHOWA mo, “Bunuhenku mo karina sipandè memanah simemaingken Elam sapatnèn mergegoh kalohon.

³⁶Bakinenku mo angin dempak Elam i dèsa siualuh nai, janah pemèrapken jelma pengisina tah mikè dèba janah oda lot sada nagerri pè siso lot mak kerohen pengusi i Elam nai.

³⁷Buradan mo bakinenku kalak Elam taba musuh sinaing memunuh kalak i. Melaga kalohon ngo aku taba kalak i janah kennah kusiapken ngo kalak i. Pasulakkenku mo tenterra lako menjuhap kalak i soh tumpat kalak i karina.

³⁸Kusalpuni mo karina raja dekket pengulu-pengulu kalak i, janah kupajek mo tahtangKu i nagerri kalak i.

³⁹Tapi daoh-daoh ariin nola, pesuangenku mo balik kalak Elam idi. Aku, JAHOWA ngo, sienggo mendokken idi.”