Read Batak Dairi Jeremia 5 Bible Online

Jeremia 5 - Batak Dairi bible

Jeremia 5

¹Alè kènè pengisi Jerusalem, susuri mo karina dalan sinikuta ndènè! Tulusi mo barang idikè sambing, janah datèken. Perrèso mo i balè-balè kuta tah lot dèng ma sada kalak pè memaingken bujur taba Dèbata. Mula lot ngo, merpengulaki ngo ukur JAHOWA bai Jerusalem.

²Idokken kènè ngo magahken isembah kè JAHOWA, keppèken oda ngo bagidi taki ndènè.

³Situhuna ukum sinipengido JAHOWA imo kebujuren. Ilipat JAHOWA ngo kènè, tapi oda parduli kènè. Ibeddal ngo kènè, tapi oda uè kènè iajar. Jèngèng ngo kènè, janah oda uè kè mobah ipas dosa-dosa ndènè nai.

⁴Dok ukurku mo ibagasen, “O tupèh, jelma biasa ngo kalak i, so lot ibettoh i barang kadè. Moto ngo perulaen kalak i, kerna oda ibettoh kadè sinikelemoken bak sinipergeddo JAHOWA Dèbata bai kalak i nai.

⁵Selloh mo laus aku mendahi kalak simersangap, janah mengerana taba kalak i. Pasti ngo ibettoh kalak i kadè sinikelemoken bak sinipengido JAHOWA Dèbata bai kalak i nai.” Tapi, tong ma ngo karina kalak i oda uè iperèntah JAHOWA; oda uè kalak i menguèi baNa.

⁶Imo sebabna kalak i naing ibunuh singa i rambah nai, janah isegga-segga sorigala siroh i padang gurun nai. Mercèkor mo biahat menulusi panganenna i gembar kuta-kuta kalak i, janah gennep kalak si mendarat kennah i jerngem. Karinana idi masa kerna enggo mèduk kalak i merdosa, janah dak nggati menondali Dèbata.

⁷Nina JAHOWA mo, “Kasa mo pella kennah Kuampuni dosa-dosa bangsangKu? Enggo ngo itadingken kalak i Aku janah menembah siso Dèbata. Kuberrè ngo bai kalak i pangaen sampè bessur kalak i, tapi merlangkah julu meddem ngo kalak i, janah nggati mengeloho daberru sibabijalang.

⁸Tosè bagè kuda tonggal nggomok ngo kalak i janah tikka cubellek dagingna; gennep ngo kalak i mengkelemmoken sinibages dengnganna.

⁹Otang patut ngo Aku kennah menghukum bangsa sibagidi janah memales kadè sienggo ibakin kalak i?

¹⁰PasulakkenKu mo musuh lako mencèdaken pekken anggur kalak i, tapi oda ngo lako petumpatkensa. PasulakkenKu mo musuh i menggonting ranting anggur kalak i, kerna oda ngo Aku sidasa ranting-ranting idi.

¹¹Tuhu-tuhu enggo iselbuh bangsa Israel dekket Juda Aku. Aku, JAHOWA ngo simendokken i.”

¹²Iranaken bangsa JAHOWA ngo siso tuhu tersèngèt JAHOWA. Nina kalak i ngo, “Oh, mènter bakunè nola ibaing taba kita. Oda mèter pella nola kenna tulbang kita janah mengerasai mergeraha barang pè kelèhèen.

¹³Pekamet mo nabi-nabi idi angin sambing, kerna oda tuhu nola lot tennah JAHOWA bai kalak i.”

¹⁴Nai nina JAHOWA Pergegoh Siso tercodi i mo baku, “Alè Jeremia, kerna bagidi rana kalak i, kenna sempetta mo kalak i siso èdep kalak i masa bagi. Bakinenku mo karina ranangKu tosè bagè api ibagasen babahmu. Tosè bagè sebban mo bangsa èn, janah ilekkup api i mo kalak i sampè kerri.”

¹⁵Alè bangsa Israel, enggo roh ibakin JAHOWA sada bangsa i nagerri sindaoh nai, lako mengkubu kènè. Arnia nai kin ngo enggo lot bangsa i ranana poda iantusi kènè. Mergegoh kalohon ngo kalak i,

¹⁶janah berani kalohon ngo pandè sèur kalak i; oda lot mermasèh atè kalak i lako memunuh jelma.

¹⁷Isalpuni kalak i mo karina nasa hasil tanoh dekket pangaen ndènè janah memunuh dukak-dukak ndènè. Pinakan lembu deket biri-biri ndènè isèati kalak i, janah pekken-pekken anggur bak kayu ara ndènè isalpuni kalak i. Ilalaken kalak i mo kuta-kuta simerbèntèng siniasangken ndènè.

¹⁸Nina JAHOWA nola dèng ma ngo, “Tukasi pè bagi oda ngo mènter Kutumpatken karina bangsangKu ibas katika i.

¹⁹Tapi mula kuso-kuso kalak i kasa kubakin karina idi taba kalak i, dokken mo alè Jeremia, magahken bakunè kin kalak i menadingken Aku i nagerri kalak i sendiri lako mersembah menguèi dèbata bangsa sidèban, bagi ma mo kalak i gabè hamba kalak sidèban i nagerri ndeba.”

²⁰Ipasulak JAHOWA ngo aku lako pesakatken tennahna ènda bai pemparen si Jakob simerian i Juda,

²¹“Dengkohken mo, alè kènè kalak si moto janah bungur! Lot ngo mata ndènè tapi oda merpendidah, lot ngo penggel ndènè tapi oda merpendengkoh!

²²Aku ngo JAHOWA; kasa mo oda mbiar kènè taba Aku? Patut ngo nemmuken kennah menggirgir kènè midah Aku! Aku ngo memaing pantè i biding laut gabè perbalengen laut siso ndorok lausenna soh mi sidekkah-dekkahna. Ndorok ngo merginja laut janah galombang ndorok mengamuk, tapi oda ndorok mengelausi perbalengen idi.

²³Tapi mpihir ngo perukuren ndènè janah cemper mengalo; enggo pilit langkah ndènè janah menadingken Aku.

²⁴Oda nung ièngèt kènè lako pesangapken Aku, keppèken Aku ngo menengesken udan, bang i benna bak pè i punca mosin perudan. Aku ma ngo memerrèken bamu mosin peranien gennep tahun.

²⁵Tapi dosa-dosa ndènè idi ngo mengambat karina simerandal i asa oda nèngè irasai kènè.

²⁶Alè kènè bangsangKu, lot ngo kalak jahat ibas kènè nai. Bagè kalak simemèma banto sinitogongna lako menangkup manuk-manuk, bagidi ngo kalak i menogong banto lako menangkup jelma.

²⁷Bagè kalak simengaci mengisi jebbak dekket manuk-manuk, bagidi ma mo kalak i kisini bages kalak i dekket ugas-ugasen sini kilang. Bagidi mo kalak i gabè merkuasa janah bèak

²⁸bagi ma nggomok janah nduma. Oda lot merbatas ukum kejahaten kalak i. Oda adil pemakin kalak i tupung perkara anak-anak melumang, janah oda kibèla hak kalak sitertèndes.

²⁹Tapi ukum Aku, JAHOWA, kennah ngo menghukum kalak i kumerna karinana idi; balesenku mo karina pemakin bangsa ènda.

³⁰Enggo masa sintengngam i nagerri èn janah memaing bejogiten:

³¹nabi-nabi merluap; imam imam mengula mengèkutken gerrek atèna sendiri, janah kènè pè bangsangKu lemmo ngo atè ndènè bagidi. Tapi kadè mo bakinen ndènè mula jupa kessa ari seggen?”