Read Batak Dairi Jeremia 50 Bible Online

Jeremia 50 - Batak Dairi bible

Jeremia 50

¹Bagèen ngo tennah JAHOWA taba aku aku tersèngèt kuta Babel dekket pengisina,

²“Baingken mo pertanda janah mongmongken mendahi bangsa-bangsa magahken enggo merentuh Babel! Ulang rusiaken tersèngèt i! Enggo mo ilala Merodakh dèbata kalak i, janah gana-ganana siluhlah i enggo pecah megargar, bagi ma bang sembahen kalak i enggo merlèa kalohon.

³Roh nèngè mo sada bangsa i utara nai lako menjuhap Babel janah memaingken nagerri idi gabè tanoh ndagal. Mperrus mo jelma dekket pinakan, janah oda lot nè siuè merian i sidi.”

⁴Nina JAHOWA mo, “Tikala i roh mo kalak Israel dekket Juda rebbakken tangis, menulusi Aku, Dèbata kalak i.

⁵Ikuso kalak i mo dalan mi Sion, nai merdalan mo kalak i menuju mi si. Bakinen kalak i nola mo perpadanen simenettap dekket Aku, janah hot mencèkèp padan idi.

⁶Codi ngo bangsangKu bagè biri-biri silaling i rambah ibaing permakanna. Mardap-ardap ngo kalak i i sada delleng nai mi delleng sidèban janah oda ibettoh nèngè i dikè bages kalak i.

⁷Ijuhap janah isiksa karina sipejumpa dekketsa ngo kalak i. Nina musuh-musuh bangsangKu idi mo, ‘Kadè sienggo sibakin i, oda salah i, kerna enggo merdosa kalak i taba JAHOWA. Merketoken taba JAHOWA ngo empung kalak i, jadi patutna ngo nemmuken kalak i pè kennah tong setia mendahisa.’

⁸Alè bangsa Israel, mperrus mo kènè i Babel nai! Kennah kènè ngo joloen laus, asa mengèkut sidèbankenna i.

⁹Pasulakkenku mo barang piga-piga bangsa simergegoh i utara nai asa ijuhap kalak idi Babel. Iatur kalak i mo selloh barisenna lako mergeraha mengalo Babel janah menalukensa. Ukum kalak i sipandè memanah ngo siso nung mimbil anak panahna.

¹⁰Irampasi kalak i mo Babel, janah ibuat simengerampasi i mo karina kadè sambing dok atèna. Aku, JAHOWA ngo sienggo mendokken i.”

¹¹Nina JAHOWA mo, “Kènè alè kalak Babel, isamun kènè ngo bangsangKu. Mangkat-mangkat ngo kènè merlolo atè bagè kuda simerngiha, janah bagè lembu sidang menggagat.

¹²Tapi kènè nola mo gabè bangsa sindanggelna kalohon ibas karinana bangsa nai. Ilèai mo kutamu simbelgah i janah ipemèla. Gabè padang gurun dakkir janah ngkerrah mo nagerrimu.

¹³Kumerna lagangku, gabè merumpak mo kuta Babel janah oda nè lot mengianisa. Karina kalak simemellus arap idi tersengget ngo janah bejogiten mengidah.

¹⁴Kènè alè sipandè memanah! Atur kènè mo barisen ndènè lako mengkubu dekket menjuhap Babel. Kekkerken mo karina anak panahmu dempak Babel, kerna enggo merdosa ia taba Aku.

¹⁵Surakken mo surak geraha i sikuliling kuta i! Bagèndari enggo menerrah Babel. Enggo itumburi janah irentuhken dingding pagar kuta i. Memaing pemalessen ngo aku bagendari taba Babel. Kerna i baing mo taba kalak i bagè pemaing kalak i taba kalak sidèban.

¹⁶Ulang duè kalak mardang barang merani i nagerri i. Karina kalak siroh simerian i sidi mermulaken mo mi nagerrina, kerna mbiar ngo kalak i midah soridadu siroh menjuhap kalak i.”

¹⁷Nina JAHOWA mo, “Codi bagè pulungen biri-biri sinipellet janah sinisompar-baèrken singa ngo kalak Israel. Perlebbè ijuhap raja Assur mo kalak i, nai ireppuk si Nebukadnezar raja Babel nola mo tulan-tulan kalak i.

¹⁸Kumerna i, Aku, JAHOWA Pergegoh Sisotercodi, Dèbata Israel, hukumenku mo Raja Nebukadnezar bak nagerrina tosè bagè penghukumKu taba raja Assur.

¹⁹Pasulakkenku mo balik kalak Israel mi nagerri kalak i. Balik nola mo kalak i kipangan hasil tanoh Delleng Karmel dekket aur Basan. Bessur mo kalak i ibaing hasil tanoh siniladang Efraim dekket Gilead.

²⁰Ibas katika i mpanting mo kalak Israel dekket Juda ipas dosa nai, kerna kuampuni ngo dosa kalak sienggo kupaluah. Aku, JAHOWA ngo, sienggo mendokken i.”

²¹Idokken JAHOWA mo taba sada bangsa i utara nai, “Juhap mo pengisi Marataim dekket Pekod. Bunuh janah salpuni mo kalak i. Ulaken kènè mo perèntahKu. Aku, JAHOWA ngo sienggo mengerana.”

²²Jumelutuh mo sora perjuhapen i nagerri i, janah masa mo kemagoen mbellen.

²³Karina dunia ipalu Babel sampè melala, tapi bagèndari enggo mpenggel palu-palu i! Karina bangsa ngo tersengget mendengkoh kadè sienggo masa taba nagerri idi.

²⁴Nina JAHOWA, “Alè Babel, ialo kono ngo Aku, kumarna i tersengkik mo ko ipas jarat siKutogong taba kono, tapi laju oda satdar kono.

²⁵Enggo kubuka penimpanen sinjatangKu, janah ibagasen laga kupedarat sinjata-sinjata idi, kerna kennah ngo Aku, JAHOWA Pergegoh Sisotercodi janah Sintèmbul kalohon i mengulaken sada ulaen i Babel.

²⁶Juhap mo Babel i karina arah nai, janah rumpakken mo langgih-langgihna! Pegukguk mo karina ugasen sinirampasen i bakunè kin kènè pepulungken pagè! Salpuni kènè mo nagerri idi! Ulang lot nèngè giam tading i sidi!

²⁷Bunuh mo karina soridaduna! Patèken mo kalak i! Merjaya mo bangsa Babel! Enggo dapet katikana kalak i ihukum!” (

²⁸Kalak simerberrus i Babel nai mi Jerusalem menukutken bakunè JAHOWA Dèbatanta memales pemaing kalak Babel taba Bages JAHOWA.)

²⁹Nina JAHOWA mo, “Dokken mo kalak pemanah menjuhap kalak Babel. Karah mo karina kalak sipandè memanah. Kubu kènè mo kuta i janah ulang lot belli kènè sada kalak pè maluah. Bales kènè mo karina pemahanna janah bakinken kènè mo tabasa tosè mi pekilakona, kerna enggo ibaing siso puna-puna taba Aku, Simbadia Kalohon, Dèbata Israel.

³⁰Ibas ari i mermatèen mo anak perana i dalan-dalan silot i kutana, janah ipetumpat karina soridaduna. Aku, JAHOWA ngo, sienggo mendokken i.

³¹Alè Babel, ndatessu ngo ukurmu! Kumerna i aku, JAHOWA Sinibabo karinana, Dèbata Pergegoh Sisotercodi mo mengalo kono. Enggo dapet katikana aku menghukum kono.

³²Terdengdeng mo bangsamu sindates ukur i janah tergempang. Sada kalak poda lot meneggu kono lako kèkè. Kulekkup mo karina Kutamu, dekket karina nasa silot i kumaliangna kennah isalpuni.”

³³JAHOWA Pergegoh Sisotercodi mendokken, “Terpicat ngo kalak Israel dekket Juda. Karina simenaban kalak i menjaga kalak i mendè janah oda uè lako paluahken kalak i.

³⁴Tapi mergegoh ngo Aku paluahken kalak i, JAHOWA Pergegoh Sisotercodi ngo gerarku. Aku sendiri mo mendekdek perkara kalak i dekket merembah damè mi babo tanoh èn. Tapi ukum dempak kalak Babel kupemasa mo kegontaren dekket sengget-sengget.”

³⁵Nina JAHOWA mo, “Binasa mo Babel rebbak ginemgemna dekket pugabè pemerèntah bak simpantasniasè kalak i!

³⁶Binasa mo nabi-nabi kalak Babel! Perluap ngo kalak i janah bungur! Binasa mo soridadu kalak Babel simergegoh i! Sondel mo buradan kalak i!

³⁷Salpuni mo kuda bak kurèta perangna! Binasa mo soridadu-soridadu siniupahenna! Ndotè kalohon ngo kalak i! Kerriken mo kinibèak kalak Babel! Bantun kènè mo karina harta bak ugasenna!

³⁸Kerrahi kènè mo nasa laè dekket juma kalak i! Kerna, dom sembahen-sembahen simemaing medeggar pendurungen ngo Babel, simemaingken gabè gila simemèlèsa.

³⁹Kumerna i gabè perbekkasen jihim dekket tendi-tendi jahat bak lengkupa mo Babel. Oda lot nè uè kalak merian i sidi soh mi sidekkah-dekkahna.

⁴⁰Bakunè kin Aku menalpuni kuta Sodom dekket Gomora rebbak karina kuta-kuta sikulilingna, bagidi ma mo Aku menalpuni Babel. Sada kalak poda lot nèngè jelma merian i sidi. Aku, JAHOWA ngo, sienggo mendokken i.

⁴¹Sidang berkat ngo sada bangsa mergegoh i nagerri sindaoh i utara nai. Roh ngo kalak i rebbakken dekket mbuè raja lako mergeraha.

⁴²Mersinjataken panah dekket kujur ngo kalak i; kejam ngo kalak i janah oda uè mermasèh atè. Codi bagè laut jumelutuh bagidi mo sora perderap kuda kalak i ipatcu lako kebbas menjuhap Babel.

⁴³Mendengkoh sukuten idi, gabè mak nèngè mo mrgoldè raja Babel. Idomi biar mo pengakapna, janah menderita bagè daberru sinaing menubuhken dukak.

⁴⁴Codi bagè singa siroh irambah mbellen sinigembar Laè Jordan nai janah roh mi jampalen bekkas biri-biri menggagat, bagidi ma mo Aku, JAHOWA kennah roh janah memaing kalak Babel merberrus i kuta kalak i nai ibagasen sintempu. Nai ninganna i pilihenku mo sada kalak pemimpin lako mengerajai bangsa idi. Mènter isè mo ndorok terpetodes bagè Aku? Mènter isè mo pang merperkara dekket Aku? Lot mango ndia huntuen sindorok mengalo Aku?

⁴⁵Kerna i, dengkohken mo kadè sienggo Kuharkatken taba kuta Babel, janah kadè sianaing Kubakin meradepken jelma silot i sidi. Dukak-dukak kalak i pe ibantun laus janah karina jelma gabè buradan.

⁴⁶Mula enggo kessa ndabuh Babel, terdengkoh mo kegontaren mahantu kalohon gabè karina mo dunia èn guttur; terdengkoh mo sora derko-derko jelma pengisina soh mi bangsa-bangsa sidèban.”