Read Batak Dairi Jeremia 51 Bible Online

Jeremia 51 - Batak Dairi bible

Jeremia 51

¹Nina JAHOWA, “Kutengesken mo angin mertiup mencèdaken Babel dekket taba pengisina.

²Pasulakkenku mo kalak sidèban lako menalpunken Babel codi bagè angin mengkabangken uhut pagè. Ipas ari tulbang i roh mo kalak i menjuhap nagerri i desa siualuh nai janah mengapus karina soh mbersih silot isi.

³Ulang mo berrè tikki bai tenterrana lako menèmbakken anak panahna barang mengasangken pakkèenna geraha. Ulang duè nggelluh anak perana silot bai kalak i. Salpuni mo karina tenterrana!

⁴Mbakat kalon ngo ugah kalak i janah mermatèen i dalan-dalan silot i kuta kalak i.

⁵Aku, JAHOWA, Dèbata Pergegoh sisotercodi, Dèbata simbadia Israel, oda menadingken Israel dekket Juda, tukasi pè enggo merdosa kalak i taba Aku.

⁶Paluahi mo dirimu! Mperrus mo kènè i Babel nai, ulang sanga nola kènè dekket kenna bunuh kerna dosana! Kumerna bagèndari mo katikana Aku memales kejahaten Babel, janah menghukumsa rembang mi pemahanna.

⁷Ukum sinderrangna i nai terpecodi ngo Babel bagè galas emmas sikucèkèp janah simemaingken suberri dunia mabuk. Ipas galas idi nai ngo mènum bangsa-bangsa, dungna gabè gila mo kalak i.

⁸Tapi sintempu mènter ndabuh mo Babel janah sepper. Tangisi mo ia janah tulusi mo tambar ugahna, tah bakunè ndorok dèng ia malum.

⁹Kalak sidèban simerian i sidi pè mersidokkonen mo samah kalak i, ‘Enggo ngo siusahaken mengurupi Babel, tapi enggo kurang ndor! Doliin mo sitadingken nagerri èn janah balik mi nagerrinta gennep. Enggo ngo ihukum JAHOWA Babel mposi kalohon, janah ilala karina kerri.’ ”

¹⁰Nina bangsa JAHOWA ngo, “Enggo ipetuduh JAHOWA magahken bennar ngo kita. Ita kè mo mi Jerusalem janah menukutken i sidi kadè sienggo ibakin JAHOWA Dèbatanta.”

¹¹Enggo ipejuju JAHOWA raja-raja Media, kerna naing isalpuni mo Babel. Bagidi mo caraNa Ia memalesken pemaing kalak simencèdaken bagesNa. Pakalima-pakalima simenguluken mergeraha memerèntahken, “Tajemmi mo anak panah! Pemaken mo tambeng-tambeng!

¹²Bakin mo tanda-tanda lako menjuhap dingding pagar Babel. Pekuat mo penjagaen. Pasulak pertaram. Kebbasi mo lako menerkap!” Enggo ipesaut JAHOWA kadè siniharkatkenNa meradepken kalak Babel.

¹³Kaya kalohon ngo nagerri idi janah mèduk laèna, tapi enggo kerri tikki nggeluhna; enggo dapet punca nggelluhna.

¹⁴Mersumpah ngo JAHOWA Pergegoh Sisitercodi ibagasen diriNa magahken pasulakkenna mo kalak bagè buè balang lako menjuhap Babel, janah isurakken kalak i mo surak kemenangen.

¹⁵Itempa JAHOWA ngo tanoh èn merkitè kuasaNa, memahan dunia merkitè kebijakenNa, janah pekimbangken langit merkitè perbinettohenNa.

¹⁶Pellin perèntah sambing ngo idokken, merdeggur mo laè i abang-abang. Ibakin ngo roh hembun i punca-punca tanoh èn nai, janah merdebbet pelian ibaing ibas udan, janah itengesken angin ipas bekkas pemeneppenna nai.

¹⁷Menengngen karinana idi satdar mo jelma, magahken moto ngo ia janah oda lot pengarusina. Termèla mo peneppa emmas, kerna palsu ngo gana-gana sinibahanna i oda merkessah.

¹⁸Oda ngo lot lapatenna gana-gana sembahen i, patut i rèhèi janah ilèai. Mula dapet kessa katikana, salpun mo kalak i binasa.

¹⁹Ukum Dèbata si Jakob oda ngo bagè gana-gana sembahen idi; Ia ngo situmempa sagumanna silot. GerarNa imo JAHOWA Pergegoh Sisotercodi; enggo ngo ipilih Israel gabè bangsaNa.

²⁰Nina JAHOWA ngo, “Alè Babel, bagè palu-palu ngo ko, sinjatangKu lako mergeraha. Kupakè ngo ko lako mengelentem bangsa-bangsa dekket kerajaen-kerajaen.

²¹Kupakè ngo ko lako mengagoken kuda bak simengkundulisa, bak kurèta dekket simengkundulisa.

²²Kupakè ngo kono lako memunuh anak laki dekket daberru, situa-tua barang pè simatah daging, simerbaju dekket anak perana.

²³Kupakkè ngo kono lako mengeripasken permakan dekket pinakanna, pertani dekket lembu pengulana, perkuasa dekket pakalima-pakalima huntuen.”

²⁴Nina JAHOWA ngo, “Saksiken sendiri mo barang bakunè Aku bagèndari memales taba Babel dekket pengisina karina kejahaten siniulaken kalak i meradepken Jerusalem.

²⁵Alè Babel, codi bagè delleng simengelalaken karina dunia èn ngo ko. Tapi ukum Aku, JAHOWA kualo mo kono. Ruahenku mo ko janah Kugulang bak Kubelli messeng gabè cirabun.

²⁶Sengkabuah batu poda nèngè ipakkè i reppuk-reppukmu nai lako pejengjengken balik. Tosè bagè padang-gurun mo ko soh mi sidekkah-dekkahna. Aku, JAHOWA ngo, sienggo mendokken i.”

²⁷“Kono alè raja i utara nai! Bakin mo gorè lako mergeraha! Pesora mo sarunè asa idengkoh bangsa-bangsa! Arahken mo karina bangsa lako mergeraha mengalo Babel! Pesulak mo kerajaen Ararat, Mini dekket Askenas lako menjuhap. Pebangkit mo sada kalak pakalima lako menguluken geraha i. Peberkat mo kuda bagè pulungen balang.

²⁸Kebbasi mo bangsa-bangsa lako mergeraha mengalo Babel. Dilo mo raja-raja Media rasken dekket karina perkuasa dekket simpantas niasè kalak i bagi ma dekket tenterra i karina nagerri sinirajanna.

²⁹Dumegger mo tanoh èn janah tumuyu-tuyu kumerna tupung ngo Aku pesautken takingKu lako memaingken Babel gabè bekkas dakkir siso ni iani jelma.

³⁰Enggo mentadi tenterra Babel mergeraha janah kom i bènteng-bèntèng. Mago ngo karina keberanien kalak i janah maknè mergoldè. Karina pèntu pengkeruhen kuta enggo irumpakken janah bages pè ilekkup.

³¹Utusen-utusen pukpuk mersidapet-dapeten lako memagahken mendahi raja Babel magahken enggo ikubu kutana i gennep arah nai.

³²Bekkas peneberangen pè enggo ikuasai musuh, janah bèntèng-bèntèng petahanen enggo ilekkup. Enggo maknè ibettoh tenterra Babel perdomona.

³³Oda ndekkah nè italuken mo kalak i janah ierrik musuh bagè pagè ibas pengerriken. Aku, JAHOWA Pergegoh Sisotercodi Dèbata Israel ngo, sienggo mendokken i.”

³⁴Isalpuni ngo Jerusalem janah kerri ibendut raja Babel; irumari ngo kuta i bagè kalak mengerumari botol. Codi bagè sada binatang raksasa, bagi ngo ia memerrur Jerusalem dekket mendomi beltekna dekket nasa simerandal silot ibas kuta i nai, nai iambongken ceppah-ceppahna.

³⁵Alè pengisi Sion, dokken mo, “Katerra pè sempa mo taba Babel bagè kejahaten sinibakinna taba kita!” Alè pengisi Jerusalem, dokken mo, “Katerra pè sempa mo taba Babel kinidersa bagè siniampèkenna banta!”

³⁶Kumerna i nina JAHOWA mo taba pengisi Jerusalem, “Kusampati mo perkara ndènè janah memales ulah-ulah musuh ndènè taba kè. Kukerahi mo karina takal laè dekket laè silot i Babel kennah kuarsaki.

³⁷Gabè pulguken rumpak-rumpak mo nagerri i, bekkas percibonien bengèkur. Bejogiten mo kalak mengidahsa, janah isè nèngè poda uè kalak merian i sidi.

³⁸Merngengngeng ngo sora kalak Babel bagè sora biahat, janah merngaor bagè sora anak biahat.

³⁹Sintorna sondel lèhè kalak i, kupehantar mo pangaan bai kalak i, janah memaing kalak i mabuk janah mengget soh terpeddem janah oda nèngè kèkè.

⁴⁰Babaenku mo kalak i lako sèaten bagè anak biri-biri, kambing dekket biri-biri tonggal. Aku, JAHOWA ngo, sienggo mendokken i.”

⁴¹Nina JAHOWA mo, “Babel sinipoji suberri dunia enggo italuken janah irajai! Sondel mo ngerrina nagerri i bai bangsa-bangsa.

⁴²Mengeraja ngo laè laut mi Babel; jumelutuh galombang-galombangna mengenengneng nagerri idi.

⁴³Karina kutana gabè bekkas memaing bejogiten, codi bagè padang gurun ngkerrah-kerring. Oda lot uè kalak merian barang memellus i sidi.

⁴⁴Kuhukum mo Bel, sembahen nagerri Babel. Bakinenku mo ia kennah mengolihken kadè sienggo nirampasenna. Oda nèngè mo i sembah bangsa-bangsa ia. Enggo merentuh dingding pagar kuta Babel.

⁴⁵Kumerna i mperrus mo kènè i sidi nai, kènè alè bangsa Israel! Paluahi kènè mo diri ndènè tarap lagangKu simenemboh idi.

⁴⁶Ulang kènè mbiar barang terendep-endep kumerna kosik-kosik sinidengkoh ndènè. Gennep tahun ngo sar berita mermatcam bagè tersèngèt kekejamen ibas nagerri èn dekket tersèngèt raja raja mersijuhapen sisada mi sidèbanna.

⁴⁷Tok mo ukur ndènè, roh nèngè mo katikana Aku menghukum gana-gana kalak Babel. Karina nagerri i kenna lèaen, janah bunuhen karina pengisina.

⁴⁸Karina silot i langit dekket i tanoh èn mersurak merlolo atè mula enggo kessa ndabuh Babel mi tangan bangsa siroh i utara nai lako mengagoken kalak i.

⁴⁹Enggo nterrem jelma i suberri dunia èn matè terbunuh kumerna Babel, tapi bagèndari merentuh mo Babel kumarnaken kalak Israel sienggo matè terbunuh. Aku, JAHOWA ngo, sienggo mendokken i.”

⁵⁰Idokken JAHOWA mo taba kalak Israel i Babel, “Enggo maluah kènè ibas pemunuhen nai! Laus mo kènè, bagèndari! Ulang pèma-pèma kènè nèngè! Tukasi pè ndaoh kènè i bagès ndènè nai, èngèt kènè mo aku, JAHOWA ndènè, dekket taba Jerusalem.

⁵¹Idokken kènè ngo, ‘Ilèai ngo kami janah ipemèla; oda terdempakken nè abè nami kumerna enggo kalak sidèban mengkunduli bilik simbadia silot i Bages JAHOWA.’

⁵²Imo asa, datèken mo ranangKu ènda. Roh nè mo katikana Aku lako menghukum nasa sembahen silot i Babel. Terdengkoh mo i suberri aur i sora ndèba mendeherreng kumerna mbengah ugahen.

⁵³Tukasi pè Babel ndorok laus mi langit janah memahan pertahanen siso ndorok terdahi, tong ngo kennah pasulakkenku kalak lako mencèdakensa. Aku, JAHOWA ngo, sienggo mendokken i.”

⁵⁴Nina JAHOWA, “Dengkohken mo! Derko-derko ngo kalak i Babel janah tangis bonek kumerna kememago simasa i nagerri idi.

⁵⁵Tupung ngo aku mengago Babel janah pesipken sora rami kalohon i sidi. Merrohen ngo musuh codi bagè galombang merdebbur, janah tenterrana menjuhap bak mersurak-surak geraha.

⁵⁶Roh ngo kalak i lako mencèdaken Babel, menangkup soridadu-soridadu dekket memenggelken sinjata-sinjata kalak i. Aku ngo JAHOWA simenghukum kejahaten, janah balesenkenku mo taba Babel rembang mi pemahanna.

⁵⁷Bakinenku mo mabuk pengulu-pengulu pemerèntah Babel — nasa simpantas niasè, huntuen dekket tenterra. Oda nèngè mo terbakin kalak i kèkè, lalap terpeddem mo soh mi amman sumendah. Enggo ngo kudokken; Aku ngo raja, Aku ngo JAHOWA Pergegoh Sisotercodi.

⁵⁸Kucèdaken mo pagar kuta Babel sintegguh i asa gabè ndèas dos mi tanoh. Kulekkup mo pèntu pengkeruhenna sindates-ndates i soh kerri. Magosia mo karina kelejaen bangsa-bangsa, kumerna karina hasil kelejaen kalak i kerri ipangan api. Aku, JAHOWA Pergegoh Sisotercodi ngo, sienggo mendokken i.”

⁵⁹Ukum pengabal Raja Zedekia imo si Seraya anak si Neria kempu si Mahseya. I tahun pe-empatken pemerentahen si Zedekia mengerajai Juda, ièkutken si Seraya ngo si Zedekia mi Babel. Nai kuberrèken mo tabasa sada ulaen.

⁶⁰Karina olpek sinaing sempa mi Babel dekket sidebankenna tersèngèt nagerri i enggo kusurat ibas lapihen.

⁶¹Nai ningku mo taba si Seraya, “Enggo kessa soh ko mi Babel, usahaken mo asa karina sitersurat ibas lapihen ènda ndorok ijakaken kono taba jelma sini sidi.

⁶²Enggo kessa i sodipken mo bagèen, ‘Alè JAHOWA, Enggo ngo idokken kono magahken naing ngo salpunenmu kuta ènda dungna mago mo karina agia jelma barang pè binatang, janah bekkas èn pè gabè codi mo bagè padang gurun soh mi amman sumendah.’

⁶³Nai, enggo kessa ijakaken kono isi lapihen èn mendahi kalak i, rakutken mo batu mi lapihen ènda, nai kebbekken mo mi tengah-tengah Laè Efrat, ninganna mendokken,

⁶⁴‘Bagèn ngo naing masa dempak Babel. Lenneng mo nagerri èn janah oda nèngè moldep kumerna jèkat sinipesempa JAHOWA mi babona.’ ” Singgat èn mo punca rana si Jeremia.