Read Batak Dairi Jeremia 52 Bible Online

Jeremia 52 - Batak Dairi bible

Jeremia 52

¹Merumur duapuluh sada tahun mo si Zedekia tikanna mbangkit ia gabè raja Juda. Sipuluh sada tahun mo dekkahna ia memerèntah i Jerusalem. Inangna mergerar si Hamutal, berru si Jeremia i kuta Libna nai.

²Codi bagè Raja Joyakim, merdosa ma ngo tong Raja Zedekia taba JAHOWA.

³Melaga kalohon mo JAHOWA taba pengisi Jerusalem dekket kalak Juda gabè ipuari mo kalak i janah oda nè mengkelungkumi kalak i. Memberontak mo si Zedekia taba si Nebukadnezar raja Babel,

⁴kumerna i roh mo si Nebukadnezar bak karina soridaduna janah menjuhap Jerusalem i ari sipuluh bulan sipuluh tahun pesibahken pemerentahan si Zedekia. Ipajek kalak i mo markas i ruar kuta, memahan parik pengkubuen

⁵janah terrus mengkubu kuta i soh mi tahun pesipuluhsadaken pemerèntahen si Zedekia.

⁶I ari sibah bulan empat tahunkenna idi ma, tikan kelèhèen bagidi mparahna gabè kadè nè poda lot pangaan jelma nterrem,

⁷irontas musuh mo batu pagar kuta i. Bernginkenna i, tukasi pè kalak Babel sidang mengkubu kuta i, karina tenterra Juda mperrus menuju Napa Jordan. Merdalan ngo kalak i arap pekken istana ninganna mendarat arap pèntu pengkeruhen sipedemmuken duana pagar batu sini kuta i.

⁸Tapi iletlet tenterra Babel mo Raja Zedekia, janah menangkupsa i lembeng Jeriko. Karina anak buahna mperrus menadingkensa.

⁹Kessa i iembah mo Raja Zedekia mendahi Raja Nebukadnezar i kuta Ribla i ladang kalak Hamat, nai idabuh mo hukumen matè tabasa.

¹⁰Ibunuh ma mo dekket dukak-dukakna i kuta i ipetengen-tengen matana, janah karina pengulu kerajaen Juda pè ibunuh ngo.

¹¹Enggo kessa i icokil mo mata si Zedekia, ninganna ilanggu janah iembah mi Babel. I sidi mo ia icucukken mi bagasen kurungen, janah oda nung mendarat i sidi nai soh matè ia.

¹²I ari sipuluh bulan lima i tahun pesipuluhsibahken pemerèntahen si Nebukadnezar raja Babel, roh mo mi Jerusalem sada kalak mergerar si Nebuzaradan. Pemernoi janah pengabal si Nebukadnezar ngo ia.

¹³Ilekkup si Nebuzaradan mo Bages JAHOWA, istana raja, dekket karina bages kalak simersangap i Jerusalem.

¹⁴Ninganna karina mo anak buahna mengerontas batu pagar kuta idi.

¹⁵Kessa i ibantun si Nebuzaradan mo jelma nterrem silotna dèng i kuta i, imo sipandè mengula, kalak sincor, dekket kalak sienggo mperrus mi pihak kalak Babel karina i iembah mi Babel.

¹⁶Tapi itadingken ia ma ngo i Juda dèba ibas ginemgem i nai sincorna kalohon dekket siso lot hartana, janah idokken kalak i mengula pekken anggur deket tahuma.

¹⁷Ipempustakken kalak Babel mo karina tihang suasah dekket kurèta-kurèta silot i Bages JAHOWA rebbak dekket kancah tembaga mbellen, nai iembah mo karina tembagana idi mi nagerri kalak i.

¹⁸Iembah kalak i dèng ma ngo dekket ugas-ugasen ènda: omban-omban, bekkas cirabun langgaten, perkekkas lampu, mangkuk-mangkuk mahan penaroi daroh binatang sinisembellih mahan pèlèen, mangkuk-mangkuk bekkas menutung dahupa, dekket karina ugasen tembaga sidebanna sinipakkè ibas ulaen lako memoji Dèbata.

¹⁹Ugas-ugasen emmas bak pirak, bagi dekket mangkuk-mangkuk kèdèk dekket bekkas rara, mangkuk-mangkuk lako bekkas daroh binatang sinisèat mahan pèlèen, bekkas cirabun, nèhè lampu, mangkuk bekkas dahupa, dekket mangkuk-mangkuk lako mengarirken pelèen laè anggur, karina idi ibuat si Nebuzaradan sendiri.

²⁰Ugas-ugasen tembaga sinibahan Raja Salomo lako mahan haliu Bages JAHOWA, imo duana tihang, kurèta-kurèta, kancah dekket sidua bellas lembu simenatang kancah i, karinana idi bagimo botongna, oda nèngè tertimbang.

²¹Dos ngo tihang tembaga sidua i: Gennep datesna 8 mèter, belgahna 5,3 mèter lilitna, janah tengah-tengahna numar. Ngkapal tembagana 75 millimèter. Gennep ngo i babo tihang idi mertakal ibaing datesna 2,2 mèter. Lot ngo merbinayu kuliling takal tihang idi merumangken buah ndalima, karinana idi ibas tembaga nai.

²³Gorga buah ndalima ipas gennep binayu takal tihang idi lot ngo siratus buèna, tapi pellin sibahpuluh ennem ngo kessa taridah i terruh nai.

²⁴Laènkenna i itangkup si Nebuzaradan ngo Imam Huntuen si Seraya, si Zepanya wakilna, tellu kalak penjaga pèntu Bages JAHOWA,

²⁵pituna pemernoi raja silotna dèng i kuta i, pakalima, wakkil pakalima simengurus surat-surat simeperdemuun mi soridadu, dekket ennempuluh kalak simersangap sidèbanna dèng.

²⁶Karinana kalak i iembah mendahi Raja Nebukadnezar mi kuta Ribla,

²⁷i ladang kalak Hamat. Idersa mo kalak idi i si, ninganna ibunuh. Bagidi mo kalak Juda ibantun i nagerri kalak idi nai janah iembah mi buangen;

²⁸karina kalak i lot ngo 4600 kalak. Merdèba-dèba ngo kalak i iembah si Nebukadnezar imo: 3023 kalak mo i tahun pepituken pemerèntahenna, 832 kalak i Jerusalem nai i tahun pesipuluhualuhken kessa ia gabè raja, dekket 745 kalak iembah si Nebuzaradan i tahun peduapuluhtelluken kessa raja si Nebukadnezar.

³¹I ari duapuluh lima bulan sipuluh dua i tahun petellupuluhpituken enggo kessa iembah si Joyakhin mi buangen, gabè mbangkit raja Babel mo si Ewil Merodakh. I tahunkenna i ma ipeteridahken mo masèh atèna bai si Joyakhin, janah paluah kensa i kurungen nai,

³²bagi ma memaing selloh bana. Iberèken mo bai si Joyakhin pangkat terdatessen daripada raja-raja sidèbanna si dekketna ibuang mi Babel.

³³Iduè mo ia menalini pakènna kurungen sinipakèna janah terrus sidekkah nggelluhna ndorok mo ia mangan i istana, janah gennep ari iberrè kèpèng mi keperluen nggelluhna.