Read Batak Dairi Jeremia 7 Bible Online

Jeremia 7 - Batak Dairi bible

Jeremia 7

¹Ipasulak JAHOWA ngo aku laus mi BagesNa janah cènder i pèntu pengkeruhen sibellusen kalak Juda si roh lako mersodip. Idokken ngo aku lako meningtingken tennahNa ènda bai kalak i, “Obahi kènè mo pekilako bak pernggelluh ndènè, nai Aku, JAHOWA Pergegoh Sisotercodi, Dèbata Israel paduèken kènè dak tong merian i bekkas èn.

⁴Ulang tok kènè taba sipengoto-ngotoi simendokken, ‘Menak ngo kita, kumerna Bages JAHOWA ngo ènda. Tuhu-tuhu ngo ènda Bages JAHOWA!’

⁵Obahi mo pernggelluh ndènè bak pekilako ndènè. Sènteng mo pemaing sisada bai dengnganna sidèban.

⁶Ulang nèngè mo menèndes kalak sideban, anak melumang, dekket nasa simbalu. Ulang mo bunuh kalak siso lot salahna i nagerri ènda. Ulang sembah dèbata sidèban, kerna mengagoken kènè ngo perulaen sibagidi.

⁷Mula iobahi kènè pernggelluh bak pekilako ndènè, janah mentadi mengulaken karina idi, Kupadiat mo kènè tong merian i nagerri ènda sienggo Kuberrèken gabè tanoh pusakka bai empung ndènè.

⁸Tapi, situhuna datina ngo kènè mengketoki rana-rana luap.

⁹Menangko ngo kè, memunuh, merlangkah julu meddem, mengkesaksiken rana siso tuhu, memèlèken pèlèen taba Baal, dekket menembah dèbata siso itandai kènè.

¹⁰Enggo kessa iulaken kènè karina idi, roh mo kènè mengadep Aku i sèn mi BagesKu sendiri, janah mendokken, ‘Mènak ngo kami!’ Nai kessa i iempet kènè nola ngo tong perulaen ndènè simeronah i.

¹¹Tah idok kènè ngo BagesKu ènda asar penamun? Enggo kuidah karinana ulah-ulah ndènè.

¹²Berkat mo kènè mi Silo, kuta siKupilih tikala i gabè bekkas mersembah taba Aku. Tengngen mo kadè sienggo Kubakin taba bekkas i kumerna dosa bangsangKu Israel.

¹³Tukasi pè Aku nggati mendokken rana bai ndènè, oda ngo uè kènè mendengkohken. Iulaken kènè ngo tong karina dosa idi, janah oda uè mengaloi mula dilo-dilo Aku.

¹⁴Asa, BagesKu siniasangken ndènè i, dekket bekkas siKuberrèken bai empung ndènè dekket bai ndènè ènda bakinenku mo bagè simasa taba Silo sinderrangna i.

¹⁵Pepuarenku mo kènè i lebbèngKu nai bagè sincelket ndènè, bangsa Israel sienggo kupepuar idi.”

¹⁶Nina JAHOWA mo, “Alè Jeremia, ulang mo sodipken kalak èn. Ulang mo pido pengurupien barang menodipken kalak i; ulang mo sessak Aku, kerna oda ngo uè Aku mendengkohken pengidoen idi.

¹⁷Enggo ngo idah kono sendiri barang kadè iulaken kalak i i karina kuta Juda dekket i gennep dalan i Jerusalem!

¹⁸Anak-anak pepulungken sebban, anak laki mengelakati api, janah daberru memahan nditak lako maing kuè taba sembahen sinigeraren kalak i Bindohara Sorga. Janah lako pecioken ukurKu ipèlèken kalak i ma mo laè anggur taba dèbata sidèban.

¹⁹Tapi situhuna, oda ngo Aku sinisakiti kalak i, baliksa diri kalak i sendiri ngo dungna mèla mo kalak i.

²⁰Aku, JAHOWA Sintèmbul kalohon, pesempaken lagangKu si ntengngam i dempak bages bekkas mersembah ènda, taba jelma bak binatang, bang taba nasa kayu bak hasil tanoh èn. Nggerger mo lagangKu bagè api siso ndorok terènteppen.”

²¹Nina JAHOWA mo, “Alè bangsangKu, ibettoh kènè ngo ukum pèlèen sinitutung ndènè i babo langgaten kennah tutungen sampè kerri, janah pèlèen sidèbanna i ndorok ipangan kènè. Tapi ukum Aku, JAHOWA mendokken, pangan kènè sambing mo karina!

²²Sinderrang kuembah empung ndènè mbungkas i Mesir nai, oda ngo lot Kuberrèken bai kalak i hatoren tersèngèt pèlèen situtungen barang pè pèlèen sidèbanna.

²³Pellin menguèi Aku ngo kessa kalak i Kuperèntahken asa aku gabè Dèbata kalak i, janah kalak i gabè bangsangKu. Kusuruh ngo kalak i merpengelako mengèkutken pati-patiinKu asa sayur ntua kalak i.

²⁴Tapi oda uè kalak i mendengkohken dekket mendatèken. Baliksa gabè menguèi cubellek ukurna jengèng bana jahat i ngo kalak i. Oda ngo muat sellohna kalak i tapi gabè muat jahatna nola ngo.

²⁵Kessa nai kin mbungkas empung ndènè i Mesir nai soh mi sidari èn dak ngo Aku pasulakken naposongKu, imo nabi-nabi, mendahi kènè.

²⁶Tapi oda lot simendengkohken barang pè mendatèken. Baliksa muat mi mpihirna ngo ukur ndènè janah muat jahatna daripada empung ndènè.”

²⁷Nai kessa i nina JAHOWA mo, “Kumerna i, alè Jeremia, tukasi pè ibagahken kono karinana idi bai bangsangKu, oda ngo padulienken kalak i ranamu. Tukasi pè idiloi ko kalak i, oda ngo ialoi kalak i kono.

²⁸Asa, dokken mo taba kalak i ukum kalak i imo sada bangsa siso uè merpenguèi baku, JAHOWA, Dèbata kalak i. Oda uè kalak i merguru mi hukumen sienggo irasaken kalak i. Enggo mo mersep kesetiaen kalak i taba Aku, baliksa iterèngèti kalak i poda nè.”

²⁹Nina JAHOWA mo, “Alè kènè pengisi Jerusalem, merhendem mo kè! Gettap kènè mo buk ndènè janah ambongken! Endèken mo èndè tangis milangi i babo pucuk-pucuk delleng, kumerna tupung melaga ngo Aku, JAHOWA janah enggo menulak kènè karina.

³⁰Enggo mengulaken kejahaten kalak Juda. Karina sembahen kalak i sikukecegoken i enggo ibakinken kalak i ibagasen BagesKu, asa enggo gabè samur ibaing kalak i.

³¹Sada langgaten mergerar Tofet enggo ipajek kalak i i Napa Hinom bekkas lako memèlèken dukak-dukak kalak i mahan pèlèen situtungen. Keppèken oda nung kudokken kalak i mengulaken sibagidi, baliksa oda maun tubuh sibagidi ibas pikirenKu.

³²Kumerna i, roh nè mo katikana oda nèngè mo geraren bekkas èn Tofet barang pè Napa Hinom, tapi gabè Napa Pemunuhen mo. Gabè tanoh pendèbaen mo tanoh idi kerna oda nè lot bekkas sidèban.

³³Bangkè-bangkè kalak i pè gabè pangaen manuk-manuk bak binatang sinirambah mo, oda lot isè giam pelauskensa.

³⁴Gabè tanoh ndagal mo nagerri ènda. Kupettadi mo sora oang-oang bak sora pesta merbayo i gennep kuta Juda dekket i gennep dalan silot i Jerusalem.