Read Batak Dairi Jeremia 8 Bible Online

Jeremia 8 - Batak Dairi bible

Jeremia 8

¹Ipas katika idi tulan-tulan raja raja dekket pugabè kerajaen Juda, bagi ma tulan-tulan imam-imam, nabi, dekket pengisi Jerusalem sidèbanna irongkari ibas pendèban kalak i nai,

²oda ngo lako ipepulung dekket itanem nola balik, tapi bagi ngo ibelli i tanoh i bagè semperren. Bagi mo sompar baèr sambing mermèrapen tulan-tulan kalak i ipadar ari, bulan bak bintang-bintang siniperdèbata kalak i, sinikekelengen, ikebbasi, isembah dekket pengidoen kalak i peddah.

³Asa kalak singgelluhna dèng ipas bangsa si jahat ènda nai, sienggo Kupesompar-baèrken soh tah mikè dèba dolien mo atèna matè daripada nggelluh. Aku, JAHOWA Pergegoh Sisotercodi ngo, sienggo mendokken i.”

⁴Ipasulak JAHOWA ngo aku mendokken taba bangsaNa bagèen, “Mula tergempang kalak, tentu kèkè nola ngo ia, janah mula laling kalak i dalan, tentu balik nola ngo ia.

⁵Tapi kasa mo kènè, bangsangKu, dak pukpuk menjenggal-jenggali janah menadingken Aku? Dak ngo kènè merketoken taba sembahen ndènè, janah oda uè balik taba Aku!

⁶Enggo kudengkoh mendè mendè, tapi mongkam poda giam kènè bakunè kin patutna. Sada kalak poda kènè menelselli pemakinna jahat i. Oda lot giam simendokken, ‘Kadè ngo ndia salahku?’ Karina ngo kènè menjuljulken dalan ndènè sendiri, codi bagè kuda merdigal mi pergerahaen.

⁷Salang manuk-manuk sibarung ibettoh ngo katikana lako balik; kèrap, lèang-leang dekket pincala pè ibettoh ngo katikana lako pindah bekkas. Tapi kènè, bangsangKu, laju oda itandai kènè pati-patien siKuberrèken taba kènè.

⁸Mbohosu ma mo kènè mendokken bijak kènè, janah ibettoh kènè pati-patienKu! Tengngen ma mo lebbèken barang bakunè pati-patienKu idi iobah guru-guru agama situnggang i!

⁹Ipemèla mo kalak simpantas-niasè silot i tengah-tengah ndènè. Kennah mago mo pikiren kalak i janah terjèrgot. So uè kalak i menjalo peddahKu; bagèndari pè, kebijaken kadè mo lot dèng bai kalak i?

¹⁰Kumerna i kennah berrènkenku mo juma kalak i bai sidasa tanoh sidèban, dekket sinibages kalak i bai kalak sidèban. Karina kalak i, simbelgah singkèdèk, menulusi laba merkitè dalan siso selloh. Baliksa nabi dekket imam pè mengakkal-akkali kalak.

¹¹Ugah-ugah bangsangKu iètong kalak i ngo ugah cituk sambing. ‘Ah, oda kadè i,’ nina kalak i, ‘karinana ngo selloh janah menak.’ Keppèken situhuna oda ngo.

¹²Alè bangsangKu, kennah ngo nemmuken mèla kènè kumerna enggo mengulaken karina simerlèa idi! Tapi ngkapal ngo abè ndènè janah oda memettoh mèla. Kumerna i kennah geppah ngo kènè bagè kalak sidèban sienggo geppah; tumpat mo kènè mula kessa kin Kuhukum kènè.

¹³Sèkel kalohon ngo Aku pepulungken bangsangKu bagè kalak sipepulungken hasil tanohna. Tapi, ukum bangsangKu codi ngo bagè kayu anggur bak kayu ara siso merbuah, baliksa bulungna pè enggo males. Kumerna i mo asa enggo kupadiat kalak sidèban roh janah mengerajai nagerri kalak i. Aku, JAHOWA, ngo enggo mendokken i.”

¹⁴“Kasa oda lot kadè sibahanken?” nina bangsa Dèbata. “Aci mo kita rasken mengusi mi kuta-kuta simerbèntèng, asa i sidi kita matè. JAHOWA Dèbatanta enggo memutusken kennah binasa kita. Enggo iberrèken banta racun lako ènumen kerna enggo merdosa kita tabasa.

¹⁵Oda lot datina kita mengharapken kedamèen bak tikki kemalumen, kerna pellin kejahaten nai ngo masa.

¹⁶Enggo mo merian i kuta Dan musuh; perihaha kuda kalak i pè enggo mo terdengkoh, janah karina nagerri gabè buradan. Musuh roh lako mengelala karina nagerrinta, bagi ma kutanta bak karina pengisina.”

¹⁷“Datèken mo!” nina JAHOWA. “Bagèndari tengesenku mo nipè mi tengah-tengah ndènè lako menebbi kènè, nipè merbisa siso ndorok isebuti.”

¹⁸Bagè tertustus ngo atè-atèngku janah milas pengakapku bonek ukurku mak terpemalum.

¹⁹Dengkohken mo! I karina nagerri ngo merginoling tangis derru-derru bangsangku mengkusoken, “Oda nèngè ngo ndia lot JAHOWA i Sion? Idikè ngo ndia rajana bagèndari?” Ialoi JAHOWA, raja kalak i mo, “Kasa mo kènè mersembah taba dèbata siso tuhu? Karina i oda merguna? Kasa mo icioi kènè ukurKu merkitè menembah sembahen sidèban kènè?”

²⁰Idokken bangsa Israel mo, “Enggo mo salpun mosin peranien bak mosin leggo tapi tong dèng ngo kita oda maluah.”

²¹Melala atè-atèngku kumerna kinimpiah sakit bangsangku; merhendem ngo aku janah bulisah.

²²Kadè ngo ndia merulah asa soh bagèndari bangsangku oda dèng malum? Oda nèngè ngo ndia lot i suberri Gilead, penambari barang pè tambar?