Read Batak Dairi Jeremia 9 Bible Online

Jeremia 9 - Batak Dairi bible

Jeremia 9

¹Sondel mo sellohna mula bagè sumur dom laè takalku, deket matangku terrus bagè laè merpancur! Nai ndorok mo aku tangis mahar dekket berngin, menangisi jelma denganku sada bangsa sinibunuh alo.

²Mula ndorok kin jupa aku i padang gurun bekkas merberngin bai kalak siniperdalanen! Nai kutadingken mo bangsangku, janah mperrus mi sidi asa ndaoh bai kalak i nai. Penelbuh ngo kalak i karina, bekkas pulungen kalak siso setia,

³janah dak kebbas lako merluap. I karina nagerri ngo, mak nè merkuasa kebenaren, baliksa ukur siso bujur nai ngo masa. Nina JAHOWA ngo, “Oda nè mentadi bangsangku mengulaken kejahaten, oda nèngè iakui kalak i Aku sikira Dèbata kalak i.”

⁴Merimbangken dengngan pè, kennah mo gennep kalak merjaga-jaga janah dengngan sibeltek pè oda nè ketoken. Kerna, codi bagè si Jakob bagidi ma ngo kalak i, karina mengoto-ngotoi dengnganna sibeltek. Gennep jelma merdalani tah soh mikè lako peraratken selbuh bak rana siso tuhu.

⁵Karinana mersiakkal-akkalen, oda lot simengeranaken sènteng. Enggo ncemmal babahna merluap, maknè tellap kalak i menadingken dosana. Kekejamen tambah kekejamen akkal-akkal mersiakkal-akkalen pukpuk ibahanken kalak i karina ngo kalak i menulak JAHOWA.

⁷Kerna i idokken JAHOWA Pergegoh Sisotercodi mo, “Codi bagè loyang, ojienKu mo bangsangKu asa gabè mpanting kalak i. Kadè nola mo ndia ndorok Kubakinken meradepken bangsangKu sienggo mengulaken kejahaten?

⁸Mermara kalohon ngo kata-kata kalak i, ndorok kipatèken bagè panah merbisa. Manihan luap ngo rana kalak i. Ndalit ngo rana kalak i janah lemmo atè mendengkoh, tapi situhuna menogong-nogongi ngo kalak i.

⁹Mèter tuhu kin mo taba bangsa bagèen oda kupesempa hukumen sipatut bana? Balesenku mo ulah-ulah kalak i; Aku, JAHOWA ngo, mendokken i!”

¹⁰Aku, si Jeremia, mendokken, “Naing tangis ngo Aku janah merhendem kumerna jampalen i gurun dekket i delleng-delleng sienggo kerrang kerring bagi ma oda nè ibellus jelma, Oda lot nèngè terdengkoh sora pinakan, manuk-manuk bak binatang sidèbanna pè enggo mperrus janah mersep.”

¹¹Nina JAHOWA mo, “Terulang mo bakinenku Jerusalem bekkas percibonien bengèkur. Gabè melongo mo karina kuta si lot i Juda, bekkas siso iiani nèngè.”

¹²Kuso-kuso ngo aku, “Alè JAHOWA, kasa mo bagi ibelli nagerri ènda ndagal janah dakkir codi bagè padang gurun gabè oda nè lot mengelabatsa? Lot ma ngo ndia bagi pantasna lako mengantusi èn karina? Taba isè ma mo ndia enggo iberrèken ko keterangen asa ndorok ia memagahken taba kalak sidèban?”

¹³Ialoi JAHOWA mo, “Masa pè idi kerna kumernaken oda nèngè ngo ipaduliken bangsangKu karina peddah sienggo Kuberrèken bai kalak i. Oda merkebiaren nè kalak i baKu, janah oda nè menguèi perèntahKu.

¹⁴Mpihir ngo ukur kalak i janah menembah gana-gana Baal bagè siniajarken empung kalak i arnia.

¹⁵Kerna i, dengkohken mo kadè sinaing Kubaing, JAHOWA Pergegoh Sisotercodi, Dèbata Israel: BerrènkenKu mo bai bangsangKu suan-suanen mpagit mahan panganenna, dekket racun lako enumenna.

¹⁶Pemèrapenku mo kalak i mi tengah-tengah bangsa siso nitandaen kalak i bang siso itandai empung kalak i. Dak pukpuk ngo pasulakkenku soridadu menjuhap kalak i soh Kubinasaken kalak i salpun karina.”

¹⁷Idokken JAHOWA Pergegoh Sisotercodi mo taba bangsaNa, “Datèken mo kadè simasa i nagerri ènda, janah kettu mo dilo kè sipandè tangis milangi. Dokken kè mo kalak i roh janah menangenken nangen merhendem.”

¹⁸Nina kalak Juda mo, “Kettu mo dokken kalak i ndor mengenangenken endè mali-ali banta karina, asa merlinang èluh matanta menaptapi kurumta.”

¹⁹Terdengkoh ngo sora tangis i Sion, “Binasa mo kita janah termèla kalohon. Kennah ngo tadingenkenta nagerrinta, merumpaken mo karina saponta sompar baèr.”

²⁰Ningku mo, “Dengkohken mo rana JAHOWA, kènè alè karina daberru! Ajarken mo tangis milangi taba berru ndènè, endè mali-ali bai dengngan-dengngan ndènè.

²¹Enggo mbengket kematèen tarap jendèla, enggo telkas mi bagasen istana; ijerngem ngo anak-anak i dalan bagi bak anak perana i sindèas.

²²Mersara-sara ngo bangkè codi bagè semperren i babo tanoh; tosè bagè pagè sienggo isabi nai itadingken janah oda nèngè ipepulung. Idi mo tennah JAHOWA si kennah kuberitaken.”

²³Nina JAHOWA mo, “Oda ndorok kalak simpantas mengèndèlken kebijakenna, kalak simergegoh kumerna kegegohenna, dekket kalak sibèak kumerna kinibèakna.

²⁴Barang isè gegah tersèngèt barang kadè, kennah mo ia gegah magahken itandai janah iantusi Aku; magahken ibettoh ia mermasèh atè ngo Aku soh mi amman sumendah janah pecèndekenku mo hukum bak ketègerren i dunia en. Karina ngo idi pesennangken ukurKu. Aku, JAHOWA ngo, simendokken idi.”

²⁵Nina JAHOWA mo, “Roh mo katikana Aku menghukum kalak Mesir, Juda, Edom, Amon, Moab, dekket pengisi padang gurun simenggettap bukna joppok. Itakkil ngo kalak i karina dos bagè kalak Israel, tapi agia kalak i barang pè bangsa Israel tong ngo bagè kalak siso mertakkil perulaenna, kerna oda iuèi kalak i perpadanen sinipetandaken mertakkil idi.”