Read Batak Dairi Tangis Milangi 1 Bible Online

Tangis Milangi 1 - Batak Dairi bible

Tangis Milangi 1

¹Sondel melongona Jerusalem bagèndari, kuta meriah kalohon arnia. Arnia sitermurmurna i tengah-tengah bangsa-bangsa, bagèndari enggo bagè daberru mbalu. Arnia kuta siterpojina kalohon, bagèndari enggo ibaing gabè hamba.

²Suntuk berngin tangis milangi ngo ia, merrurusen èluh i kurumna. Sada kalak poda sinikekelengenna uè mengapoisa. Iselbuh supan-supanna ngo ia sienggo kellih gabè alona.

³Itadingken pengisi Juda ngo nagerrina, kumerna iperhamba janah sondel kinidersa. Bagèndari merian kalak i i tengah-tengah bangsa-bangsa i bekkas siso lot ndorok memerèken kedamèen. Ikubu musuh ngo kalak i tikan mpersah akapen kalak i.

⁴Tupung ari ari raya sada kalak poda lot roh mi Bages Dèbata. Simerbaju perèndè sinisidi menggongken ndersa, janah imam-imam kekelsohen. Oda lot kalak i i pèntu pengkeruhen, Dom hendem ngo kuta Sion.

⁵Muat termurmurna ngo musuh-musuhna kumerna ndorok kalak i mengerajaisa. Ndersa ngo ia ibaing Jahowa kumerna mbuè kalohon dosana. Enggo itaban jelma pengisina, janah iembah mi buangen.

⁶Kinilia kuta Jerusalem, pellin tori-torien sienggo salpun. Penguluna pè enggo ndotè bagè balkih melèhè kalohon. Malot mergoldè kalak i meradepken musuh simengeletletsa.

⁷Enggo kessa merumpak janah ndersa, terèngèt mo Jerusalem i singgo salpun, sinderrang mbuè dèng hartana; bakunè kin pengisina ndabuh mi tangan musuh, janah sada kalak poda lot roh mengurupisa. Pellin tertaba ngo alo-alona mengidah pertaluna.

⁸Iperonah Jerusalem ngo dirina merkitè mengulaken mbuè ntengam dosa. Karina kalak sipesangapkensa arnia, bagèndari mengeleaisa kumerna mengidahsa lubus. Kekelsohen ngo ia, kerna sondel kememèla.

⁹Tangkas ngo taridah kemelamunenna tapi oda iparduliken kadè sinaing masa mi dirina. Ntengam kalohon ngo kededabuhna tapi sada kalak poda lot mengapoisa. Nai ipido mo masèh atè bai Jahowa nai, kumarna enggo mennang musuh-musuhna.

¹⁰Karina harta ugasenna enggo irampasi musuh-musuhna. Janah kennah ngo itengen ia kalak i memengketti Bages Dèbata, sada perulaen sinigerra Jahowa bai kalak siso bangsaNa.

¹¹Merdengan kelsoh pengisina menulusi pangaen; ugasen maharga kalak i dekket roti itukarken, pellin asa nggelluh kalak i janah ulang matè. Idiloken Jerusalem, “Alè Jahowa, tatap mo aku, datèken mo karina kinidersangku.”

¹²“Kènè alè simemellus i dalan, tengen janah datèken mo! Lot ngo ndia kinidersa bagè sikugongken bagèndari, kinidersa sinipesempa Jahowa taba aku, kumerna lagaNa simbelgah kalohon i?

¹³Ipesusur ngo api i langit nai simenutung soh mi pusuh peratèenku. Itogongi ngo i lebbengku memaingken tergempang aku. Nai ibelli mo aku mali-ali menggong simparsah terrus ari.

¹⁴Ibuat karina dosangku, ninganna irakut gabè sada, janah iburaken mi kerahongku, botongna i maing ndotè aku. Isohken Jahowa ngo aku taba musuhku; oda mergoldè aku mengalo kalak i.

¹⁵Iètong Jahowa ngo oda merkessah karina perbabangku simergegoh. Iarak ngo tenterra asa salpun karina anak peranangku. Idedohi ngo bangsangku soh melala, codi bagè kalak simemerroh buah anggur.

¹⁶Idi ngo memaingken merurusen èluhku, oda lot memerrè semangat dekket apo-apo. Enggo mago karina silot bai bangsangku, kumerna mergegohen ngo musuhku.

¹⁷Kupekimbang tanganku mengido pengurupien, tapi oda lot memerè apo-apo. I gennep arah nai ngo, Jahowa pasulakken musuh; merrohen mo kalak i menjuhap aku. Codi bagè empik-empik ngo aku ibaing, pemoyang-moyang atè i tengah-tengah kalak i.

¹⁸Tapi Jahowa ngo situhuna, kumerna enggo kulausi perèntahNa. Dengkohken mo aku, alè bangsa-bangsa, tatap mo aku ibas kinidersa. Nasa anak perana dekket simerbajungku enggo itaban, janah iembah mi buangen.

¹⁹Kudiloi mo supan-supanku tapi iselbuh kalak i ngo aku. Imam-imam dekket pengulu bangsa karina enggo matè i dalan-dalan kuta. Sinderrang menulusi pangaen lako mempertahanken nggelluhna.

²⁰I alè Jahowa! Perdimata mo aku, rembekbekken ngo ukurku janah gulut, melala kemulihken durhakangku arnia. I gennep dalan lot pemunuh, ibas bages lot kematèen.

²¹I alè Jahowa! Dengkohken mo kelsoh-kelsohku, oda lot mengapoi aku. Merlolo atè ngo musuh-musuhku, kumerna kono memaing aku cilaka. Bakin mo roh ari siniperbagah idi, baing mo kalak i ndersa tosè bagè aku.

²²Datèken mo karina kejahaten kalak idi, janah baing mo taba kalak i bagè pemaingmu taba aku, kerna karina dosa sikuulaken baMu. Mendeherreng ngo aku ibagasen kinidersa, bonek ukurku janah mali-ali.”