Read Batak Dairi Tangis Milangi 2 Bible Online

Tangis Milangi 2 - Batak Dairi bible

Tangis Milangi 2

¹Kèkè ngo Jahowa ibagasen laga, isangkemmi ngo Sion dekket kegellapen. Kinimahangga Israel songket mi langit, enggo icapakken mi tanoh. Tikan melaga Jahowa, bagesNa i Sion pè oda nè iparduliken.

²Gennep jampalen i nagerri Juda, ilala oda alang-alang. Ibaing lagaNa itumburi ngo soh merumpak bèntèng-bèntèng simemagar nagerri idi. Kerajaen idi rebbak dekket pengulu-penguluna idabuh gabè soh merlèa.

³Ibaing lagaNa simerdegup-degup idi, ibohok cepakken ngo kegegohen Israel. Tikan ijuhap musuh kita, mengurupi poda roh gèutna. Tosè bagè api mengamuk mengelekkup sagumanna, bagidi ngo Jahowa melaga taba kita karina.

⁴Codi bagè musuh, isintak ngo sèurNa janah petèngkenken anak panahNa taba kita. Karina jelma simemaing sennang penarihenta, kerri ibunuh ma. Isèmburken ngo lagaNa tosè bagè api mi kuta Jerusalem ènda.

⁵Gabè codi musuh ngo Jahowa; ipekpekki ngo Israel sanga merumpak. Ilala ngo karina bèntèng bak istana, janah menambahi bonek lui bai pengisi Juda.

⁶Irumpakken ngo bagesNa bekkas bangsaNa merpulung lako menembahsa. Ia ngo memaingken kalak lupa tersèngèt Sabat dekket ari-ari raya. Kerna punguren Jahowa, enggo itulak imam dekket raja.

⁷Itulak Jahowa ngo langgatenNa simbadia i, janah menadingken BagesNa sindiri; ibelli ngo musuh mengerumpakken parik-parikna. I bekkasta tikala i mersembah dekket merkerja musuh mersurak kerna merlaba.

⁸Enggo imangmangken Jahowa magahken kennah icoco pagar batu kuta Sion. Enggo isibar pagar batu i, asa karina ndorok icoco. Parik-parik batu bak palasna, bagèndari enggo mercèdaen karina.

⁹Pèntu pengkeruhenna itamburi tanoh, karina gerruk-gerrukna merpenggellen; raja bak pugabè pemerèntah enggo i buangen. Patiin Jahowa oda nè iajarken; nabi pè oda nèngè menjalo alamat bai Jahowa nai.

¹⁰Mertahan sip nai ngo kundul i tanoh pengetua-pengetuai kuta; icircirken kalak i ngo cirabun mi babon takalna, janah memakè abit goni tanda merbonek atè. Simerbaju-simerbaju petungkukken takal soh mi tanoh.

¹¹Mbessel matangku kerna tangis oda meradi-adi, mpersuk tendingku mak terdokken dikè. Melala atè-atèngku menengen permago bangsa; mengidah anak-anak dekket anak mbara pangsan i dalan-dalan kuta.

¹²Ledja ngo kalak i tangis mengido pangaen bak ènumen taba inangna. Codi bagè kalak ugahen, merjembaen ngo kalak i i dalan-dalan nai mermatèen i abingen inangna.

¹³Alè Jerusalem, kuta Sion sinikekelengen, bagè bellang laut ngo jekatmu. Kadè mo ndorok kuruapken lako merrèken pengapoen? Kerna, oda nung lot kalak ndersana codi bagè kono. Tuhu-tuhu oda lot ndorok pesuangken kono balik.

¹⁴Pellin akkal-akkal dekket luap sambing ngo, sinipesakat nabi nabi bamu. Oda nung ibagahken kalak i dosa ndènè, dungna kerna bagidi oda uè tobat kènè. Balikna pellin magahken kessa kalak i bamu kata-kata luap merpengait.

¹⁵Karina kalak simentas, mencèdurken kono, kerna enggo karinana ko melala. Ipengupir-ngupirken kalak i ngo takalna ninganna mendokken, “Idi ngo tupèh kuta simerandalna kalohon kuta sinièndèlken dunia èn?”

¹⁶Karina musuhmu merceggo atè menengen abèmu, itaba-tabai kalak i ngo ko janah icumimii. Nina kalak i ngo, “Enggo kusalpuni kami kuta idi! Dungna jupa ma ngo tikkina sienggo ndekkah kupèma-pèma kami!”

¹⁷Enggo ipesaut Jahowa asup sinibaingNa sienggo ihatken kin arnia janah isèngètken banta. Oda meralang-alang ia menggeppui kita, iberèken kemenangen bai musuhta. Merlolo atè ngo kalak i ibaing mengidah kememagonta.

¹⁸Alè pagar batu Jerusalem, tenggo-tenggo mo ko bai Jahowa! Durusken mo èluhmu bagè permarir laè mahar ari berngin. Empet mo tangis, ulang mentadi soh lebbè ledja dagingmu!

¹⁹Kèkè kundul mo ko terrus berngin lako mersurak mengandèken penarihenmu taba Jahowa. Pido mo asa mermasèh atè ia taba dukakmu sirapar janah pangsan i gennep èluk dalan.

²⁰Alè Jahowa, tengen janah datèken mo kalak sinisiksamu idi! Nung ma ngo lot kalak ibakin kono bagidi? Ipangan inangna ngo dukak kekelengen atèna, imam dekket nabi ibunuh ibas BagesMu Simbadia i.

²¹Situa-tua simenguda matè mergamparen i dalan, anak perana simerbaju mermatèen ibaing peddang. Tupung arinkenna melaga Ko, oda lot masèh atèmu menggellohi kalak i.

²²Idilo kono ngo asa roh musuh sikukebiari kami lako memaing pesta kekejamen i sikuliling nami. Ibunuh kalak i ngo karina sikudèdah dekket sikukekelengi kami. Tupung arinkenna melaga ko, sada kalak poda ndorok mperrus.