Read Batak Dairi Tangis Milangi 3 Bible Online

Tangis Milangi 3 - Batak Dairi bible

Tangis Milangi 3

¹Aku mo kalakna sienggo mengakapken kinipersah, kerna idendenni laga Dèbata.

²Muat ndaohna aku isaran mi bagasen bekkas gellap bulita.

³Pukpuk ari ngo aku itendelli oda lot masèh atèna terrus ari.

⁴Ibaing ngo dagingku ugahen mparah, dekket tulan-tulanku merbohoken.

⁵Ia menangkemken baku sindanggel dekket kinipersah.

⁶Ipaksa ngo aku merian ibas sigellap bagè kalak si matè arnia.

⁷Merkitè langgu ntegguh ièkèti aku, dungna oda lot dalan karuar baku.

⁸Derko-derko ngo aku mengido pengurupen, tapi oda uè Dèbata mendengkohken.

⁹Ihalang-halangi ngo langkahku merkitè pagar batu.

¹⁰Codi bagè geppul ngo Ia memèma, codi bagè singa menghadang aku.

¹¹Iletlet ngo aku soh sumirpang i dalan nai nai isegga-segga mo aku janah itadingken.

¹²Isintak ngo tali cèurNa, janah ipetèngken anak panahNa taba aku.

¹³Itelpus anak panahNa ngo dagingku soh menjuluk pusuhku.

¹⁴Terrus ari ngo aku itaba-tabai karina kalak janah ibaing gabè aling-alingen.

¹⁵Pellin simpagit ngo iberèken baku mahan pangaen bak ènumenku.

¹⁶Isogoken ngo abèngku mi tanoh, ituktukken èpenku serrang batu sanga ncuak.

¹⁷Enggo ndekkah maknè kuakapi simènak; enggo lupa aku bakunè rasana sennang.

¹⁸Oda lot nè ketermurmurenku, enggo mago harapenku bai Jahowa.

¹⁹Memikirken kadap bak sindanggel. Tosè bagè kipangan racun mpagit.

²⁰Dak-dak ngo i kupikirken, dungna tertekan batin mo aku.

²¹Tukasi nola pè bagidi kèkè ngo balik pengharapenku, tikan kuèngèt nola bagèen:

²²Menettap soh mi sidekkahna ngo masèh atè Jahowa, oda merkerri-kerrien pasu-pasuna,

²³dak ngo rimbaru gennep ceggen tuhu-tuhu, setia kalohon ngo Jahowa!

²⁴Pellin Jahowa ngo hartangku simahargana. Kumerna i, dak mengharap ngo aku tabasa.

²⁵Selloh ngo Jahowa taba kalak simengharapkensa, dekket bai kalak simenulusisa.

²⁶Asa, selloh mo nono kita memèma soh lebbè roh Jahowa memerèken pengurupi;

²⁷selloh ngo kita merguru gabè sobar, tikan poso dèng kita.

²⁸Tikan iberèken Jahowa kinipersah, naing mo dogok nono pellin diri.

²⁹Dolien mo kita pecerrepken ukur janah menohken diri, kerna tah bakunè lot dèng siharapenken.

³⁰Tukasi pè iparap janah ipelèa, naing mo karinana idi sijalo.

³¹Kerna, oda ngo soh mi amman sumendah kita itulak Jahowa.

³²Enggo kessa iberèken kinipersah mermasèh atè nola ngo ia, kerna dak tong ngo ikekelengi kita dekket kelleng atèna siso lot sibarna.

³³Oda ngo sennang ukurna memelli kita mpersah bak bonek.

³⁴Mula mpenjet ukurta ibagasen kurungen,

³⁵mula mago hakta siniberèken Jahowa

³⁶kumerna ipesungkar ketègerren, pasti ngo idi ibettoh Jahowa janah iperdimata.

³⁷Mula lot oda ikellemoken Jahowa, pasti ngo jelma oda ndorok memaing barang kadè pè tersèngèt i.

³⁸Selloh barang jahat idalanken pellin merkitè perèntah Jahowa.

³⁹Kasa pella kennah kekelsohen jelma mula ihukum ia kumerna dosana?

⁴⁰Mendè mo siperrèso nggelluhta, janah balik mendahi Jahowa Dèbata i sorga. Sibuka mo penarihenta janah mersodip,

⁴¹

⁴²“Merdosa janah mengalo ngo kami taba kono, alè Jahowa, janah oda iberrè Ko ampun.

⁴³Iletlet janah ibunuh ko ngo kami, mboni ngo masèh atèmu ibagasen lagaMu.

⁴⁴Tosè bagè hembun ngkapal kalohon ngo lagaMu gabè mak ndorok itunjul sodip nami.

⁴⁵Enggo ibaing ko kami tosè bagè empak-empak i penengen suberri dunia.

⁴⁶Ilèai karina musuh nami ngo kami janah itaba-tabai;

⁴⁷idendenni permaraen dekket kemagoen ngo kami, ningan nggelluh ibagsaen mara dekket mbiar.

⁴⁸Menjarir ngo èluhku tosè bagè laè kerna enggo mago bangsangku.

⁴⁹Tangis mo aku oda mengadi-ngadi,

⁵⁰soh lebbè idatèken kono kami, alè Jahowa sini sorga.

⁵¹Gabè melui ngo ukurku mengidah nasip daberru-daberru kuta nami.

⁵²Codi bagè manuk-manuk ngo, aku iletlet musuh, siso lot dalanna merceggo atè taba aku.

⁵³Idabuh kalak i ngo aku gelluh-gelluhen mi bagasen geddung mbages ninganna menamburi aku dekket batu.

⁵⁴Sennak ngo laè soh mi takalku, janah dok ukurku mo, — ‘Salpun mo keppè nggelluhku!’

⁵⁵Alè Jahowa, dilo-dilo ngo aku taba ko, ibas dangaen sumur simbages idi nai.

⁵⁶Memmes kupidoken ulang mo tutup pènggelMu meradepken pengidoenku asa iurupi kono aku. Nai idengkohken kono mo sodipku, janah roh mo ko njolmit; idokken kono mo, ‘Ulang buradan.’

⁵⁷

⁵⁸Roh kono menampati perkarangku, alè Jahowa, enggo ipaluah kono kessahku.

⁵⁹Idah kono ngo kejahaten sinibaing ndèba taba aku, taki jahat musuh simerceggo atè taba aku. Kerna i alè JAHOWA, bèla mo perkarangku.

⁶⁰

⁶¹Kono, Jahowa, mendengkoh aku ilèai; ibettoh kono ngo karina taki kalak i.

⁶²Aku ngo ipekata-kata kalak i terrus ari. Ibakin kalak i ngo taki-taki meronah, lako mencilakaken aku.

⁶³Sicegen nai soh berngin ibaing ngo aku gabè sitertabaen.

⁶⁴Alè Jahowa, hukum mo kalak i rembang mi pemahan kalak i.

⁶⁵Sumpahi mo kalak i, janah baing mo kalak i merian ibas pendellèen.

⁶⁶Letlet janah binasaken mo kalak i karina soh kerri kalak i iapus i dunia èn nai.”