Read Batak Dairi Tangis Milangi 4 Bible Online

Tangis Milangi 4 - Batak Dairi bible

Tangis Milangi 4

¹Emmas merkillok-killok enggo gabè mehèjem batu-batu Bages Jahowa mergamparen i dalan.

²Arnia bagè emmas maharga ngo simemguda kuta Sion, tapi bagèndari enggo ibaing bagè koden tanoh.

³Salang inang sorigala pesusuken anakna, tapi kejam kalohon ngo bangsangku tosè bagè manuk-manuk unta i jampalen.

⁴Anak mbara maknè ipesusu, dungna matè muasen. Mengido mangan ngo anak-anak, tapi oda lot simemerèken.

⁵Kalak sienggo ncemmal kin mengakapi pangaen ntaboh, janah nggelluh merlebbih-lebbih, bagèndari garang menulusi pangaen i pulguken simperren, janah matè kelèhèen i dalan-dalan.

⁶Ummatku enggo ihukum botongen daripada bai pengisi Sodom ibas sengkèrdep mata salpun ibaing tangan Dèbata oda kerna ulah-ulah jelma.

⁷Arnia mpanting ngo pengulu-pengulu nami codi bagè kapas mbulan mbersih. Teggap ngo kalak i janah mergegoh, njuah-njerdik oda kadè-kadèen.

⁸Tapi bagèndari mbèrèngen ngo abè kalak i daripada landeng gampar i tengah ndalan oda isè menandai. Merèngut koling-koling kalak i ipas tulanna, tosè bagè kayu ngkerrah-kerring.

⁹Mpersah ngo akapen kalak i, janah matè-matè bagi, kerna kadè poda lot mahan panganna; matè i pergerahaen, merlabaen dèng daripada matè rapar.

¹⁰Ntengam kalohon ngo olpek i si ampè bai bangsangku idi dungna partua ibages perukur melamlam memelgang dukakna lako mengisi beltekna.

¹¹Ipepuas Jahowa ngo lagaNa janah mengelekkup kuta Sion soh landas mi tanoh.

¹²Kalak raja-raja bak pengisi dunia sada kalak poda percaya magahken pèntu-pèntu pengkeruhen kuta Jerusalem ndorok ibengketti musuh.

¹³Tapi enggo masa idi, kerna dosa imam-imam dekket nabi. Enggo iorèken kalak i daroh, kalak siso mersalah.

¹⁴Codi bagè kalak sipètung dadap-dadap idalan-dalan bagidi mo pengulu-pengulu kuta Jerusalem. Kotor ngo gedda kalak i ibaing daroh gabè isè nè poda uè mendegges kalak i.

¹⁵Idokken dèba mo, “Laus i sèn nai! Melamun ngo kè, ulang jamah kami!” Nai laus mo kalak i janah kadap i sada bangsa nai mi bangsa sidèban, tapi isè poda menduè kalak i menettap.

¹⁶Oda nè idatèken Jahowa bangsaNa; Ia sendiri ngo pemèrapken kalak i janah memaing imam-imam oda nèngè ihargai; oda nè lot isè mengkekelengi pengulu-pengulu.

¹⁷Ledja mata nami tetulihen, mema pengurupi lalap mak roh. Kuharapken kami ngo pengurupi sada bangsa, keppe situhuna kadè poda tellap terberrèkensa.

¹⁸Oda ndorok kami ka ruar mi dalan, kerna pukpuk ientip musuh. Makin ndessing punca nggelluh nami, kerna enggo dapet ari-ari nami.

¹⁹Nderras kalohon ngo simenjalang-jalang kami ndaoh nderrasen daripada manuk-manuk rajawali. Ijalang kalak i ngo kami i delleng, janah mengambat kami i padang gurun.

²⁰Itangkup kalak i ngo raja sinipilih Jahowa, kalak sikuasangken kami sindorok merèken kenggeluhen, janah perculendungen meradepken musuh.

²¹Alè bangsa Edom dekket Us, tertaba mo kènè, merlolo atè mo, sidekkah ndorok dèng! Roh ma mo olpek bamu janah kumerna mabuk i ikilanjangi kono mo bamu.

²²Enggo idalani Sion hukumenna ibaing dosa-dosa siniulakenna; bagèndari oda ibelli Jahowa nè kami janah oda nè iembah mi buangen. Tapi ukum kono, alè Edom, ihukum Jahowa mo. Ipacidah mo dosa-dosamu.