Read Batak Dairi Hesekiel 1 Bible Online

Hesekiel 1 - Batak Dairi bible

Hesekiel 1

¹ Tupung ari lima bulan empat i tahun petellupuluhken, i tahun pelimaken kessa nai ibuang Raja Joyakhin mi buangen, aku, Imam Hesekiel anak si Busi, simerian i biding Laè Kebar i Babel rebbak dekket kalak Jahudi siterbuang sidèbankenna i. Sintempu mo mbuka langit janah terperidah aku mo Dè- bata. Kudengkoh mo ipermongkami JAHOWA aku janah kuakapken mo gegoh kuasaNa.

⁴Menarè mo aku nai kuidah mo angin kalisungsung i utara nai. Kumasiksak pelian ibas simpulguken hembun mbelgah kalohon nai, janah mercala-cala mo langit i sikulilingna. Ibas pelian sikabutbat i teridah mo lot merkillok-killok tosè bagè suasah.

⁵I tengah-tengah hembun i, kuidah mo empat kerub, imo singgelluh tosè bagè jelma,

⁶tapi karina terempat abèna dekket terdua mpasang kabeng.

⁷Pènter nèhèna janah merkillong bagè suasah igosok. Mersesèlu ngo jari-jarina bagè cikili lembu tonggal.

⁸Laènken empat abè dekket sidua mpasang kabeng i, lot ngo tangan jelma i terruh gennep kabeng i.

⁹Simpasang kabeng gennep singgelluh i nai ngkèrbang janah puncana mersidegessen dekket punca kabeng singgelluh sidèbanna, gabè empat soki mo bentuk singgelluh siempat i. Mula gumerrek, karina mo kalak i gumerrek pènter mi lebbè, oda pella ipekellih pendempak badanna.

¹⁰Gennep singgelluh i terempat abèna tapi pejaè-jaè ngo rupana; kan lebbè abè jelma, kan kamuhun abè singa, kan kambirang abè lembu, janah kan podi abè rajawali.

¹¹Tersimpasang kabeng singgelluh i ipekèrbang mi dates gabè dais mi punca kabeng singgelluh i kacimbang lambungna, janah simpasang nai iserpih mengemkemmi dagingna.

¹²Gennep singgelluh i mendempakken mi empat jurusen rebbakken, gabè terbaing kalak i mo laus barang mikè sambing lemmo atèna oda pella ipekellih pendempakna.

¹³I tengah-tengah singgelluh i lot bagè rara api idahen barang bagè obor lakat pukpuk dak gumerrek oda mengadi-ngadi. Nggerger ngo api i janah memestikken pelian merdebbet.

¹⁴Singgelluh i dak gumerrek misèn mi sadoi bagè pelian nderrasna.

¹⁵Sidangna kudatèken karinana idi, kuidah mo empat daling i babo tanoh, sada daling i gembar gennep singgelluh i.

¹⁶Dos ngo daling siempat i janah merkillok bagè batu intan, janah gennep ma i tersada daling sidèbanna rintang i tengah-tengahna.

¹⁷Merkitè bagidi ndorok ngo daling-daling i merdalan mi empat hujuen.

¹⁸Dom ngo mata ipas daling sicengko i.

¹⁹Laus ngo singgelluh i barang mikè sambing lemmo atèna, janah dak mengèkut ngo daling-daling i, kumarna ikuasai singgelluh i. Gennep kumoser singelluh i menangkih mi dates barang mentadi, dak dekket ngo daling-daling i rasken kalak i.

²²I babo takal singgelluh i lot ngo barteng bagè cara perbintoha ipas kaca nai merkillong.

²³Iperkèrbang singgelluh siempat i ngo kabengna tersimpasang i terruh perbintoha i mi arah singgelluh mi kacimbang mbellahna, nai ukum kabeng simpasang nai mengemkemmi dagingna.

²⁴Mula ngkabang kalak idi, kudengkoh ngo sora kabengna i merkepak-kepak tosè bagè pergumeruhguh laè sampuren; tosè bagè perderrap langkah nuhnuhen soridadu nterrem kalohon, bagè sora Dèbata Pergegoh Sisotercodi i. Mula kom kalak i oda nè ngkabang, iserpih kalak i ngo kabengna,

²⁵tapi tong ngo terdengkoh sora ibas perbin- toha sinibabontakal kalak i nai.

²⁶I babo perbintoha i lot ngo bagè tosè mi tahta ipas batu nilam nai, janah i babona i lot kundul tosè bagè jelma idahen.

²⁷Kettan babona taridah mercuhaya bagè suasah i tengah dilah api. Kettan terruhna mercala-cala ncihur kalohon,

²⁸janah mermatcam bagè rupana tosè bagè bintoha. Idi mo sincihur merkillok memagahken i sidi ngo JAHOWA. Mengidah i, geppah mo aku tangkep mi tanoh. Nai kudengkoh mo sora mendokken,