Read Batak Dairi Hesekiel 10 Bible Online

Hesekiel 10 - Batak Dairi bible

Hesekiel 10

¹Nai kutatap mo mi perbintoha silot i babo takal kerub-kerub i, janah kuidah mo tosè bagè tahta ipas batu nilam nai.

²Nai idokken Dèbata mo mbang kalak simerpakèen linen i, “Bengketti mo mi kellang-kellang daling-daling i terruh kerub-kerub i, janah buat mo singgellem rara api. Nai sampakken mo rara i mi babo kuta i.” Iulaken mo ninganna kupetengen-tengen.

³Tikan mbengket i ia, tupung cènder ngo kerub-kerub i kan selatan Bages JAHOWA. Simpelguk hembun menangkemmi kasèan kan bagasen bak karina Bages JAHOWA.

⁴Cuhaya merkillok-killok tanda pekiroh JAHOWA merbendella i kerub-kerub idi nai, janah lompat mi pèntu mbengket mi Bages JAHOWA, memaing gabè mercala-cala kasèan i.

⁵Sora kepak-kepak kabeng kerub i terdengkoh ngo soh mi kasèan ruar, tosè bagè sora JAHOWA Perkuasa i.

⁶Enggo kessa idokken JAHOWA kalak simerpakèen linen i mengamet singgellem rara api i tengah-tengah daling-daling i teruh kerub-kerub i nai, mbengket mo ia janah cènder i gembar sada daling-daling i.

⁷Nai sada ipas kerub i nai mendoroken tanganna mi bagasen api silot i tengah-tengah kalak i, menjemput piga-piga ngkabuah rara, janah iberèken bai kalak simerpakèen linen i. Nai ijalo mo janah mèter laus mo ia.

⁸Kuidah ma ngo i terruh kabeng kerub-kerub i lot bagè rumang tangan jelma.

⁹Kuidah ma ngo karina kerub-kerub i lot tersada daling i gembarna. Dos ngo rupa daling siempat i, janah merkillok-killok bagè batu intan merandal. Gennep ma ngo lot dèng sada nai dalingna merbaris i tengah-tengahna.

¹¹Merkitè bagidi terbaing kerub-kerub idi mo menghuju mi empat hujuen. Terbaing kalak i ma ngo laus barang mikè sambing lemmo atèna, oda pella ikessing badanna.

¹²Karina daging kalak i, gurungna, tanganna, kabengna dekket daling-dalingna pè dom mata.

¹³Kudengkoh gerar daling-daling i idokken “kalisungsung.”

¹⁴Gennep kerub i terempat abèna tapi pejaè-jaè rupana. Abè perlebbè merumangken abè lembu, sipeduaken bagè bagè abè jelma, sipetelluken bagè abè singa, janah sipeempatken bagè abè rajawali.

¹⁵Kerub-kerub idi mo sikuidah tikala i, i biding Laè Kebar. Gennep kumoser kerub-kerub i barang pekèrbangken kabengna, kumèkè mo mi babo janah ngkabang mi lebbè barang mentadi, dak dekket ngo daling-daling i, kumarna ikuasai kerub-kerub i.

¹⁸Nai itadingken cuhaya merkillok-killok tanda pekiroh JAHOWA i mo pèntu mbengket Bages JAHOWA i janah lompat mi babo kerub-kerub i.

¹⁹Kuidah mo ipekèrbang kerub-kerub i mo kabengna, mèter ngkabang mo laus menadingken tanoh, janah dekket ngo daling-dalingna i. Nai mentadi mo kalak i i gembar pèntu pengkeruhen Bages JAHOWA kan kebincaren, bang cuhaya merkillok-killok i pè tong ngo i babo kalak i.

²⁰Kuèngèt mo kerub-kerub idi ngo sikuidah tikala i lot i terruh Dèbata Israel, i biding Laè Kebar.

²¹Karina ngo kerub-kerub i lot terempat abèna, terdua mpasang kabengna, dekket lot bagè tangan jelma i terruh kabengna i.

²²Abè kalak i pè dos ngo dekket abè kerub-kerub sikuidah i biding Laè Kebar. Gennep kalak i merdalan mpènter mi lebbè.