Read Batak Dairi Hesekiel 11 Bible Online

Hesekiel 11 - Batak Dairi bible

Hesekiel 11

¹Nai idokong tendi Dèbata janah iembah mo aku mi pèntu pengkeruhen kebincaren i Bages JAHOWA. Kuidah mo i sidi 25 kalak i, janah dua kalak bai kalak i nai pengulu bangsa, imo si Jaazanya anak si Azur dekket si Pelaca anak si Benaya.

²Idokken JAHOWA mo mbang aku, “Alè jelma simangko-angko, kalak èn mo simertaki maing kejahaten i kuta èn dekket memaing ajar-ajar latlat.

³Kumara i bagahken mo tennahKu tersèngèt hukumen bai kalak i, alè jelma simangko-angko. Kerna nina kalak i ngo, ‘Oda ndekkah nèngè sipekadè nola mo bages èn karina. Dosken koden ngo kuta èn janah kita mo gulè i bagasenna. Mènak mo kita ipas nggerger api nai kumarna ilègenni koden i.’ ”

⁵Nai isangkemmi tendi JAHOWA mo aku, janah ipasulak JAHOWA mendokken taba bangsa Israel, “Alè bangsa Israel, kubettoh ngo kadè siniranaken dekket sinitaki ndènè.

⁶Enggo mèduk jelma ibunuh kènè, gabè dom bangkè karina dalan kuta i.

⁷Kumara i aku, JAHOWA Sintèmbul i mendokken bamu: Tuhu ngo kuta èn bagè koden, tapi ukum gulè ibagasenna oda ngo kènè, tapi bangkè-bangkè jelma sienggo ibunuh kènè ngo! Ukum kènè kupelaus mo i kuta èn nai!

⁸Mbiar ngo kènè midah peddang? Roh mo kubaing kalak merembah peddang lako menjuhap kènè.

⁹Kuiring mo kènè karuar i kuta èn nai janah kusohken taba jelma sidèban. Enggo kuputusken hukumen matè taba kènè.

¹⁰Radak mo kènè tikan geraha i nagerri ndènè sendiri, nai satdar mo kènè, aku ngo JAHOWA.

¹¹Jadi oda nèngè mènak kènè i kuta èn, oda bagè gulè ibas koden. Kuletlet janah kuhukum mo kènè barang i dikè sambing kènè merian i nagerri Israel.

¹²Nai satdar mo kènè, Aku ngo JAHOWA, janah Kuhukum pè kènè kumarna enggo ilausken kènè ngo hatoren-hatorenKu janah oda isarihken kènè perèntah-perèntahKu merkitè menguèi pati-patien bangsa-bangsa i sikuliling ndènè.”

¹³Sinderrang kuruapken dèng kata i, sintempu mèter geppah mo si Pelaca terrus matè. Nai sujud mo aku ninganna dilo-dilo, “Nongalè JAHOWA Sintèmbul i! Mada ngo naing ibunuh kono karina kalak Israel sitadingna i?”

¹⁴Idokken JAHOWA nola mo mbang aku,

¹⁵“Alè jelma simangko-angko, iterèngèti pengisi Jerusalem ngo kono dekket kaltu-kaltumu sinibuang. Nina kalak i, ‘Ndaohsu ngo kalak sibuangen idi i Jerusalem nai lako mersembah taba JAHOWA. Enggo iberèken JAHOWA tanoh Israel banta.’

¹⁶Kumara i, bagahken mo tennahKu èn taba dengan-denganmu sinibuang i, Aku ngo merembah kalak i ndaoh mi tengah-tengah bangsa-bangsa janah menèrak kalak i mi nagerri-nagerri i. Tapi dak Kudengani ngo kalak i sidekkah i sidi.

¹⁷Aku, JAHOWA Sintèmbul i mendokken, kennah Kupepulung ngo kalak i i nagerri- nagerri bekkas kalak i mèrap i nai, janah kuolihken mo tanoh Israel bai kalak i.

¹⁸Balik kessa kalak i, ipatakken kalak i mo karina gana-gana simeronah siniidah kalak i.

¹⁹Kuberèken mo taba kalak i pikiren rembaru bak pengelako rembaru. Kuagoi mo ukur mpihir bagè batu kalak idi janah Kugancihi mo dekket ukur merpenguèi taba Aku.

²⁰Nai iuèi kalak i mo hatoren-hatorenKu janah setia mengèkutken karina perèntahKu. Kalak i mo gabè bangsangKu, janah Aku gabè Dèbata kalak i.

²¹Tapi ukum kalak siuè menembah gana-gana simeronah i dekket singgodo i, kennah Kuhukum kumarna ulah-ulahna jahat i.” Bagidi mo pendokken JAHOWA Sintèmbul i.

²²Nai ikebbasi kerub-kerub idi mo ngkabang janah dekket ngo daling-daling i ma. Cuhaya merkillok-killok tanda pekiroh Dèbata Israel lot i babo kalak i ngo.

²³Nai itadingken cuhaya merkillok i mo Jerusalem janah lompat mi delleng kan kebincaren kuta i.

²⁴I bas alaten idi idokong Tendi JAHOWA mo aku janah iulakken taba jelma sibuangen i Babel. Nai mersep mo alaten i.

²⁵Nai kusukutken mo taba jelma sinibuang i karina sinipacidah JAHOWA bangku i.