Read Batak Dairi Hesekiel 12 Bible Online

Hesekiel 12 - Batak Dairi bible

Hesekiel 12

¹Mengerana dèng ma mo JAHOWA taba aku, nina mo,

²“Alè jelma simangko-angko, merian i tengah-tengah kaum pemberontak ngo ko. Lot ngo mata kalak i, tapi oda merpendidah; lot ngo copingna, tapi oda merpendengkoh, kumarna lemmo ngo atè kalak i memberontak.

³Kumara i alè jelma simangko-angko, sidekkah nterrang dèng ari kebbasi mo barang-barangmu ibas gèndongen bagè biasa ibaing kalak buangen. Tikan madèng dapet berngin, tadingken mo bagesmu merkitè ntarar, tosè bagè jelma siniembah mi buangen. Bahan mo ruang ipas dingding bagesmu, ipetengen-tengen kaum pemberontak i, janah gèndong mo gèndongenmu sienggo sin barang barangmu i mi ruar arap lubang i. Persan mo gèndongen i ipas baramu. Berkat mo ko ibas kegellapen berngin; baluti mo matamu asa ulang idah kono dalan sinibellusmu. Belli mo karina kalak Israel mengidah karina sinibaingmi, asa gabè sèngèt-sèngèt taba kalak i. Tah bakunè satdar kalak i magahken pemberontak ngo kalak i.”

⁷Nai kubahanken mo perèntah JAHOWA bangku i. Arinkennai ma, tikan mahar dèng, kukebasi mo barang-barangku ipas sada gèndongen, bagè cemmalna pemaing kalak pengusi. Enggo kessa tubenna berngin, kuruangi mo dingding bagesku merkitè tanganku, nai remuar mo aku arap lubang i. Ninganna inelnelli karina jelma, kupersan mo gèndongen i i barangku, nai berkat mo aku.

⁸Sibarembenkenna nola mengerana mo JAHOWA taba aku, nina mo,

⁹“Alè jelma simangko-angko, enggo ikusoken bangsa Israel, imo bangsa pemberontak i taba kono kadè sinibahankenmu.

¹⁰Kernana i, bagahken mo bai kalak i, kadè sikudokken, JAHOWA Sintèmbul i taba kalak i. Taba raja sini Jerusalem ngo tennahku i, dekket bai karina pengisi kuta i.

¹¹Bagahken mo ukum sinibahankenmu i imo pertanda sinaing masa bai kalak i; gabè jelma buangen bak tabanen mo kalak i.

¹²Tupung gellap berngin ipersan raja kalak i mo gendongenna ipas barana nai berkat mo. Iruangi jelma mo dingding sapona asa terbaingsa karuar. Ibaluti mo matana gabè oda idah dalan sinibellusna.

¹³Tapi Kusampakken mo jalangKu lako menangkupsa. Nai Kuiring mo ia mi kuta Babel, janah matè mo ia i sidi oda nung idah ia kuta i.

¹⁴Karina pengisi istana dekket simpantas niasè bak pertaram raja i kusompar-baèrken mi dèsa siualuh. Kuletlet mo kalak i janah Kubunuh.

¹⁵Tikan kusompar-baèrken kalak i mersellaten i tengah-tengah bangsa-bangsa sidèban, satdar mo kalak i, Aku ngo JAHOWA.

¹⁶Cituk bai kalak i nai Kupaluah ngo ibas geraha nai, bang ibas kelèhèen bak sakit uabba nai, asa satdar kalak i i tengah-tengah bangsa sidèban, enggo mengulaken luhlah kalohon kalak i. Nai iaku kalak i mo, Aku ngo JAHOWA.”

¹⁷Idokken JAHOWA mo mbang aku, “Alè jelma simangko-angko, kadotdot mo tikan mangan ko, janah menggirgir mo buradan mula tikan mènum ko.

¹⁹Bagahken mo ta- ba karina bangsa, kadè sinidokken, Aku JAHOWA Sintèmbul i taba pengisi Jerusalem, sitadingna dèng i tanoh kalak i. Kadotdot mo kalak i tikan mangan janah menggirgir buradan tikan mènum. Gabè dakkir mo tanoh kalak i, kumarna dakdak ngo mengelanggar hukum karina jelma simerian i sidi.

²⁰Karina kuta sidom jelma bagèndari i naing irabbatken janah karina tahuma gabè gurun. Nai satdar mo kalak i, Aku ngo JAHOWA.”

²¹Idokken JAHOWA mo mbang aku, “Alè jelma simangko-angko, kasa lemmo atè kalak Israel mengeruapken perumpamaen èn: ‘Mertukar ngo simasa, tapi oda nung saut sukuten nabi’?

²³Kumara i, bagahken mo taba kalak i, Aku ngo JAHOWA Sintèmbul i, mengaloi bagèen: Kupetadi mo perumpamaen i gabè mak nèngè iruapken i Israel. Sikira gancihna bagahken mo taba kalak i, enggo dapet tikkina, janah saut mo karina masa sinidokken sukuten nabi.

²⁴Oda nèngè lot alaten barang ramalen palsu i Israel.

²⁵Aku JAHOWA Sintèmbul i mo naing mengerana taba bangsa Israel, janah kennah saut ngo karina sienggo Kuruapken i, oda tersondaten nèngè. Dengkohken mo alè kaum pemberontak! Tupung nggelluhmu èn dèng ngo kupesaut karina sienggo Kupesèngètken i bamu. Aku, JAHOWA Sintèmbul i ngo simendokken i.”

²⁶Idokken JAHOWA mo mbang aku, “Alè jelma simangko-angko, idokken kalak Israel ukum alaten dekket sukutenmu i, ndekkah kalohon dèng ngo asa saut masa i.

²⁸Kumara i bagahken mo taba kalak i, ukum Aku, JAHOWA Sintèmbul i, mendokken: Karina siKuruapken i kennah saut, oda nè tersondaten. Aku, JAHOWA Sintèmbul i ngo simendokken i!”