Read Batak Dairi Hesekiel 13 Bible Online

Hesekiel 13 - Batak Dairi bible

Hesekiel 13

¹Idokken JAHOWA mo mbang aku,

²“Alè jelma simangko-angko, pesèngèt mo nabi-nabi palsu simengeranaken ramalen sura-surana sendiri. Dokken mo kalak i mendengkohken ranangKu.”

³Idokken JAHOWA Sintèmbul i, “Merjaya mo nabi-nabi palsu i! Sura-surana sendiri ngo sinialamatkenna i janah palsu ngo alatenna i.

⁴Alè Israel, oda merguna nabi-nabi ndènè i, tosè ngo bagè menci singgelluh i tengah-tengah kuta sienggo terulang.

⁵Oda ijaga kalak i bekkas kan dikè pagar batuna sienggo merumpak, janah ma oda ipelias pagar batu i. Jadi oda nèngè terpertahanken ukum Israel i, mula tubuh geraha tikan ari aku, JAHOWA roh lako menghukum.

⁶Palsu ngo alaten-alaten kalak i, janah pellin luap ngo ramalen-ramalen kalak i. Idokken kalak i mo bangku nai nina tennah siniembahna i, kepèken oda nung kuutus kalak i. Bakunè kin mo perharapna kalak i saut siniramalkenna i?

⁷Aku JAHOWA Sintèmbul i mendokken taba kalak i, ‘Palsu ngo alaten-alaten ndènè i, janah luap ngo ramalen-ramalen ndènè i. Idokken kènè, tennahku ngo karina i, keppèken oda nung aku mengerana taba kènè! Kumara i, aku mo gabè alo ndènè.

⁹Kuhukum mo kènè, alè nabi-nabi palsu simengeranaken ramalen luap dekket simenura-nurai alaten-alaten! Oda nè ndorok dekket kènè maing keputusen ibas perpulungen perarihen bangsangku. Gerar-gerar ndènè pè isasa mo ibas marga Israel nai, janah oda nè- ngè ndorok balik kènè mi lebbuh ndènè. Nai satdar mo kènè, aku ngo JAHOWA Sintèmbul i.

¹⁰Alè nabi-nabi palsu! Enggo ilalingken kènè bangsangku merkitè idokken kènè mènak ngo karinana janah oda kadè habatna. Keppèken karinana idi oda tuhu! Enggo ibahan bangsangku pagar batu ipas batu bata nai tapi merongkah ngo ibaing, nai roh mo kènè lako mencèt dekket kapur.

¹¹Alè nabi-nabi palsu merumpak mo pagar batu ndènè i. Kubaing mo roh udan darèdè. Irumpakken angin topan mo pagar batu i janah iserpai udan baho,

¹²gabè merentuh mo, nai karina jelma kuso-kuso, kadè lapatenna ikapur pagar batu i.’ ”

¹³Idokken JAHOWA Sintèmbul i, “Kumernaken lagangku, roh mo kubaing angin topan, udan ndor dekket baho lako mengerumpakken pagar batu i.

¹⁴Kuniatken ngo lako mengerumpakken pagar batu sinikapur ndènè i, bak menompar-baèrkensa, asa pellin danganna nai kessa tading. Pagar i mo mendulpang dekket mengeripasken kènè karina. Nai satdar mo kènè Aku ngo JAHOWA.

¹⁵Pagar batu dekket kènè sienggo mengkapursa kennah mengerasaken sondel lagangKu. Enggo kessa i Kubagahken mo taba kènè, ukum pagar batu i enggo mo mersep, tosè bagè kènè simengkapursa,

¹⁶alè nabi-nabi palsu! Itendungi kènè, mènak ngo Jerusalem janah oda kadè kurang, keppèken karinana idi oda tuhu!” Bagidi mo pendokken JAHOWA Sintèmbul i.

¹⁷Idokken JAHOWA, “Bagèndari, alè jelma simangko-angko, perdatèken mo daberru-daberru simengakuken dirina nabi daberru i tengah-tengah bangsa ndènè. Pesèngèt mo kalak i,

¹⁸janah bagahken mo kadè sienggo kudokken, Aku JAHOWA Sintèmbul i taba kalak i: ‘Merjaya mo kènè! Ibahan kènè ngo bai karina jelma kajimat gellang-gellang dekket tudung-tudung keramat asa ndorok ikuasai kalak simemakkè i nggelluh jelma sidèban. Sèkel ngo kènè mengkuasai nggelluh bak matè bangsangKu, janah ibaing kènè ngo kuasa i gabè peruntungen ndènè sendiri.

¹⁹Ilèai kènè ngo Aku i hadeppen bangsangKu, pellin lako muat-muat nditak singgellem dekket barang piga-piga ngkabuah roti. Ibunuh kènè ngo kalak siso mersalah, kepèken kalak sipatut patènken ibelli kènè nggelluh. Nai iluapi kènè mo bangsangKu, janah tok kalak i bai ndènè.’ ”

²⁰Idokken JAHOWA Sintèmbul i mo taba nabi nabi daberru idi, “Nggogo ngo atèngku midah kajimat gellang-gellang sinipakè ndènè lako mengkuasai matè nggelluh bangsangKu. Kurampasi mo gellang-gellang i i pergelangen tangan ndènè nai, janah Kupaluah mo kalak sinikuasaen ndènè.

²¹Kuribaki mo tudung-tudung keramat ndènè, janah Kujamotken mo bangsangKu ibas pengaruh jahat ndènè nai soh mi amman sumendah. Nai satdar mo kè aku ngo JAHOWA.

²²Ibaing kènè ngo mendellè kalak jelma mendè merkitè luap ndènè imo siso pella naing kukekadè. Kalak jelma jahat gabè ibaing kènè lolo, asa tong merdosa bak oda ipaluah.

²³Bagèndari mentadi mo alaten-alaten palsu dekket ramalen-ramalen luap ndènè i. Kupaluah mo bangsangKu ibas pengaruh jahat ndènè nai. Nai ibettoh kènè mo, Aku ngo JAHOWA.”