Read Batak Dairi Hesekiel 14 Bible Online

Hesekiel 14 - Batak Dairi bible

Hesekiel 14

¹Roh ngo dèba pengulu-pengulu Israel mendahi aku lako mengkusoken harkat JAHOWA.

²Nai mengerana mo JAHOWA mbang aku,

³“Alè jelma simangko-angko, enggo isohken kalak èn dirina taba gana-gana, memaing ndabuh kalak i mi bagasen dosa. Nai uè dèng mo Aku ikusoi kalak i?

⁴Kumara i, bagahken mo taba kalak i ukum Aku, JAHOWA Sintèmbul i menenahken bagèen, ‘Gennep kalak Israel sienggo menohken dirina taba dèbata sidèban janah memelli dirina ndabuh mi bagasen dosa, nai roh lako mengido peddah mendahi sada kalak nabi, Kualoi sendiri mo merkitè pengaloi bakunè patutna bai gana-gana simèduk i!

⁵Karina gana-gana i enggo pedaohken bangsangKu bangKu nai, tapi katerra pè, merkitè pengaloingKu i balik nola mo bangsangku i mendahi Aku.’

⁶Bagahken ma mo taba kalak Israel, ukum Aku, JAHOWA Sintèmbul i mendokken taba kalak i, ‘Tobat mo kènè ipas dosa-dosa ndènè nai, janah tadingken mo gana-gana ndènè simeronah i.’

⁷Gennep kalak Israel dekket kalak sidèban simerian rebbak dekket kalak Israel sipedaohken dirina bangku nai dekket simenohken dirina taba gana-gana, nai mengido peddah bai sada kalak nabi, Aku sendiri ngo mengaloi.

⁸Kualo mo ia janah kubaing mo ia gabè codien taba sidèbanna i. Kuliplip mo ia i pulungen bangsangKu nai, nai satdar mo bangsangKu Aku ngo JAHOWA.

⁹Mula enggo itipu sada kalak nabi, nai gabè salah pengaloina, Aku ngo simenipusa. Aku, Dèbata JAHOWA Sintèmbul i ngo naing mengeliplipsa bai kalak Israel nai.

¹⁰Jadi dos mo hukumen nabi i dekket kalak simengido peddahna.

¹¹Kulaluken karinana idi, asa ulang nè ipedaoh kalak Israel dirina bangku nai janah ulang nè ma ilamuni dirina dekket dosa. Merkitè bagidi gabè bangsangKu mo kalak i, janah Aku gabè Dèbatana.” Aku JAHOWA Sintèmbul i ngo mendokken i.

¹²Idokken JAHOWA mo mbang aku, “Alè jelma simangko-angko,

¹³mula merdosa sada nagerri janah oda setia taba aku, Kuhukum mo nagerri i. Kusalpuni mo pangaen taha-tahana, kupesempa mo lèhè matè kocing janah kubunuh mo jelma bak pinakan.

¹⁴Agia nola pè merian i bekkas i si Noak, si Danel dekket si Job, pellin paluahken kessah kalak i sitellu sendiri ngo kessa kemendèenken kalak idi i. Aku JAHOWA Sintèmbul i ngo mendokken i.

¹⁵Nggèut ngo roh Kubaing binatang-binatang penjerngem lako menjerngemmi pengisi nagerri i, asa gabè bekkas merbahaya nagerri i, gabè maknè pang barang isè pè memellus arap i.

¹⁶Mula pè merian i sidi si Noak, si Danel dekket si Job, merkitè aku, Dèbata singgelluh i, JAHOWA Sintèmbul i, oda terpaluah kalak i barang isè pè, salang dukak kalak i pè mada. Pellin kalak i sambing mo kessa maluah, ukum nagerri i gabè gurun mo.

¹⁷Nggèut ma ngo Kubaing masa geraha i nagerri i, janah Kutengesken senjata-senjata mahantu lako mengeripasken jelma bak binatang pè.

¹⁸Mula sitellu kalak i ndai merian i sidi, merkitè Aku, Dèbata Singgelluh i, JAHOWA Sintèmbul i, oda terpebelai kalak i barang isè pè, salang dukakna sendiri pè mada. Pellin kalak i sambing mo kessa maluah.

¹⁹Nggèut ma ngo Kupesempa sakit uabba mi nagerri i janah Kupepuas lagangKu tabasa asa ripas karina jelma bang binatang pè.

²⁰Mula pè merian i sidi si Noak, si Danel dekket si Job, kumernaken Aku, Dèbata singgelluh i, JAHOWA Sintèmbul i, oda terpeluahi kalak i barang isè sambing pè, salang dukak-dukakna pè mada. Pellin kalak i sambing mo kessa maluah kumara kemendèenken kalak i.”

²¹Idokken JAHOWA Sintèmbul i, “Kudabuh mo hukumKu siempat sintengam kalohon bai Jerusalem lako mengeripasken bang jelma bak binatang pè. Hukum imo: Geraha, lèhè matè kocing, binatang penjerngem dekket penakit uabba.

²²Tah lot terbaingsa mperrus dekket paluahken dukak-dukakna, perdatèken mo kalak i mula roh kalak i mendahi kono. Tengen bakunè kejahaten kalak i, nai ibettoh kènè mo, teppat kalohon ngo hukum sikudabuh bai Jerusalem.

²³Nai iarusi kènè ma mo, karina sikubaing i lot sebabna. Aku, JAHOWA Sintèmbul i ngo mendokken i.”