Read Batak Dairi Hesekiel 16 Bible Online

Hesekiel 16 - Batak Dairi bible

Hesekiel 16

²“Alè jelma simangko-angko, pacidah mo bai Jerusalem ulah-ulah nggodo sienggo ibakinken.”

³JAHOWA Sintèmbul i ngo pasulakken aku memagahken tennah èn bai Jerusalem, “Alè Jerusalem, tubuh i tanoh Kanaan ngo ko. Kalak Amori ngo bapamu, janah kalak Het ngo inangmu.

⁴Tikan tubuh kono, oda lot menggettap posongmu, bang pè peridiken kono, bang pè mengelapui ko dekket sira, bang mengampani ko merkitè gedda.

⁵Isè poda mermasèh atè bamu siuè memahanken bagidi bamu. Tikan tubuh kono, oda lot merkelleng atè bamu, baliksa ipatakken ngo ko mi juma-juma i.

⁶Nai mentas mo Aku janah kuidah mo ko mengenat-ngenat merguyu-guyu darohmu, tapi oda Kubelli ko matè.

⁷Kubuat mo laè, nai Kuborih mo daroh ipas dagingmu nai. Kulapui mo dagingmu dekket minak zaitun. Kupehèdu-hèdu mo ko bagè suan-suaen luyun. Ndeppur mo ko mbellen, njuah-njuah janah nggeddang, gabè sada daberru simerbaju. Adepmu pè mulai mo mergerrat bak bukmu pè nggeddang, tapi lubus ngo ko. Tikan memellus nola Aku, Kuidah enggo sangana kono lako mersikekelengen. Kusangkemken mo jubahKu mi dagingmu silubus i, janah Kupadanken kelleng atèngKu bamu. Uè, Kukabini mo kono, janah gabè sinibagesKu mo kono. Aku, JAHOWA Sintèmbul i ngo mendokken i.

⁸

⁹

¹⁰Nai Kusellukken mo bamu baju sumbung mersulam, cipatu ipas koling-koling sihalusna nai, saong ipas linen dekket jubah sutera nai.

¹¹Kupakèken bamu intan permata, cimata bak gellang.

¹²Kuberèken bamu cincin ègung, sobeng dekket rudang merandal.

¹³Bagidi mo ko memakè emmas bak pirak; pakènmu kaèn linen dekket sutera mersulam. Ndorok mo kono kipangan roti ipas nditak simerandalna nai, dekket tenggoli bak minak zaitun. Termurmur ngo kinimberrumu janah kono mo gabè raja daberru.

¹⁴Karina bangsa ngo memoji kinimberrumu siso lot tikasna i, janah Aku ngo memaing kono mberru. Aku JAHOWA Sintèmbul i ngo mendokken rana i.

¹⁵Tapi oda ngo mi simendèna ibaing kono kinimberrumu bak ketermurmuren gerarmu. Rebbak meddem ngo kono dekket daholi barang isè sambing pè mentas.

¹⁶Dèba pakènmu ibaing kono ngo lako menghias bekkasmu mersembah taba gana-gana. Gabè perkendangen ngo kono janah iberèken ko dagingmu bai karina daholi.

¹⁷Ibaing kono ngo gabè gana-gana daholi, emmas bak pirak siKuberèken bamu i, nai luhlah mo ulah-ulahmu dekket gana-gana i.

¹⁸Isellukken kono ngo pakèen mersulam siKuberèken bamu i taba gana-gana i. Ipèlèken kono ngo bai kalak i minak zaitun dekket dahupa sinijalomu bangKu nai.

¹⁹Kuberèken ngo bamu pangaen ibas berras simerandalna nai, bak tenggoli dekket minak zaitun si aslina. Tapi ipèlèken kono ngo i karina taba gana-gana lako peloloken ukur kalak i. Aku, JAHOWA Sintèmbul i ngo mengeruapken i.

²⁰Nai enggo kessa i, ipèlèken kono mo dukak-dukakta, daholi bang daberru pè taba gana-gana i. Oda dèng ngo cukup dok atèmu oda setia i kono bangKu?

²¹Kennah ibuat kono dèng ngo dukak-dukakKu janah memèlèkensa taba dèbata sideban?

²²Situk poda ièngèt kono nèngè tikanmu kètèk arnia, ibagasen pernggelluhmu simeronah sibagè perkendangen i, bang kono tikan lubus dekket mengenat-ngenat ipas remremen darohmu sendiri.”

²³Idokken JAHOWA Sintèmbul i, “Merjaya mo kono! Tuhu-tuhu merjaya! Enggo ibahanken kono karinana kejahaten i.

²⁴Nai dèng ma, mayak kuta dekket biding dalan, ipajek kono ngo bekkas lako menembah sembahen dekket merkendangen.

²⁵Iperoha kono ngo kinimberrumu. Itabarken kono ngo dagingmu taba karina daholi simentas, janah oda meradi-adi kono merlangkah julu meddem.

²⁶Enggo mo rebbak meddem ko dekket Mesir cibal balengmu simahantu nafsuna i. Inakkati kono ngo merkendangen lako mendungkul lagangku.

²⁷Bagèndari kebbas mo Aku lako menghukum kono dekket mengamet pasu-pasu sienggo Kuberèken bamu. Kusohken mo kono taba kalak Palistin simengkecegoken kono janah moyang atèna midah ulah-ulahmu simeronah i.

²⁸Tapi laju dèng ngo oda polih iakap kono; kumara i iletlet kono mo kalak Assur. Gabè kendangen kalak i mo kono, tapi laju ma oda pulak iakap kono bai kalak i nai.

²⁹Nai gabè kendangen kalak Babel kalak saudagar mbellen i mo ko. Tapi kalak i pè oda tellap maing polih bamu.”

³⁰Idokken JAHOWA Sintèmbul i, “Enggo iulaken kono karinana i tosè bagè daberru galgalen perkendangen siso mettoh mèla.

³¹I mayak kuta dekket i gennep dalan ipajek kono ngo bekkas lako menembah sembahen bak merkendangen. Tapi oda ngo bagè perkendangen biasa kono simemerluken riar.

³²Tosè bagè sinibages simengelangkahi julu meddem sinibalèna ngo kono merlangkah julu meddem dekket daholi sidèban.

³³Ukum perkendangen dak menjalo garar ngo, tapi ukum kono balikna nola ngo memerèken upah taba alè-alèmu idi, janah dèng ma ièlèk-èlèk kono ngo kalak i asa merrohen tah i dikè nai, asa rebbak meddem dekket kono.

³⁴Lègan ngo perkendangenmu bai sidèbankenna i nai. Oda lot memaksa ko asa gabè perkendangen. Oda ngo igarar bamu, balikna kono nola ngo menggarar. Tuhu ngo, lègan ngo ko bai sidèban nai.”

³⁵Alè Jerusalem, perkendangen, beggèken mo kadè idokken JAHOWA Sintèmbul i, “Enggo ibuka ko bajumu, janah bagè perkendangen isohken ko dagingmu taba alè-alèmu bak gana-ganaenmu simeronah i. Dukak-dukakmu ibunuh janah ipèlèken ko bai gana-ganamu i.

³⁶

³⁷Kumara i, kupepulung mo karina sinung alè-alèmu i, tah sinikekelengenmu i tah barang sinikecegokenmu. Cender mo kalak i mencingkoi kono ninganna mengkelanjangi ko, asa ndorok idah kalak i dagingmu lubus i.

³⁸Kuhukum mo ko kumara merlangkah julu meddem bak ulah-ulahmu memunuh i. Ibagasen laga bak pungurKu, Kuhukum matè mo ko.

³⁹Kusohken mo ko taba alè-alèmu i, janah irumpakken kalak i mo karina bekkasmu merkendangen bak menembah gana-gana i. Karina pakèen emmas pirakmu ipupusi kalak i, asa gabè lubus kono.

⁴⁰Ipasulak kalak i mo jelma nterrem mengkebekki kono dekket batu, dekket menggat-gati dagingmu dekket peddang.

⁴¹Ilekkup kalak i mo karina sapomu dekket mendokken daberru-daberru menaksiken hukum simengenna bamu i. Merkitè bagi mo Kupetadi perlangkah julu meddemmu. Oda nè mo magi-magiken upah kono bai alè-alèmu i.

⁴²Enggo kessa bagi pè asa mentadi lagangKu, janah Aku pè gabè malap mengolihi. Nai oda nè mo melaga bak cemburu aku.

⁴³Kuhukum pè kono kumarna oda ièngèt kono nèngè bakunè Aku pehèdu-hèduken kono tikan poso dèng kono. Gabè punguren ngo Aku kumernaken karina ulah-ulahmu singgodo i. Kasa itambahi kono dèng ulah-ulahmu simeronah i dekket merlangkah julu meddem? Aku JAHOWA Sintèmbul i ngo enggo mendokken i.”

⁴⁴Idokken JAHOWA, “Alè Jerusalem, iruapken dèba mo umpama èn tersèngèt kono, ‘Bagi inangna bagi ma ngo berruna.’

⁴⁵Tuhu ngo ukum kono berru inangmu. Nggogo ngo atèna taba sinibalèna dekket taba dukak-dukakna sendiri. Tosè bagè dengan sibeltekmu daberru ngo kono simengkecegoken sinibalèna bak dukak-dukakna ma. Kono dekket kaka anggimu, imo karina kuta i sikulilingmu kalak Het ngo inang ndènè dekket kalak Amori ngo bapa ndènè.

⁴⁶Kakamu imo Samaria i utara dekket karina sosorna, dedahenmu imo Sodom i selatan dekket karina sosorna.

⁴⁷Polih ma ngo iakap kono mengèkutken ulbas kalak i dekket menuman ulah-ulah kalak i simeronah i? Madèng! Oda ndekkah nèngè, merohaen dèng ngo ulah-ulahmu daripada kalak i.

⁴⁸Kumernaken Aku, Dèbata singgelluh i, nina JAHOWA Sintèmbul i ngo, ukum anggimu Sodom rasken sosor-sosorna, oda dèng nung bagè jahatmu bak sosor-sosormu i.

⁴⁹Jukkat pè Sodom bak sosor-sosorna kumernaken mbuè ngo ipennep pangaen janah terbaingsa nggelluh mènak bak damè. Tapi oda iperdatèken kalak i jelma ncor dekket jelma merlèa.

⁵⁰Gegah janah jèngèng ngo kalak i, ninganna mengulaken kadè siKukecegoken. Kumara i Kuripasken ngo kalak i bagè siniidahmi.

⁵¹Tuhu jahat ngo Samaria, tapi dosana oda lot giamken sitengah daripada dosa-dosamu. Ndaohen dèng jahaten pengelakomu. Ukum turang-turangmu bagè siso mersalah ngo mula ipesobok dekket kono. Kennah mèla janah merlèa mo nemmu iakap kono!”

⁵²

⁵³Nina JAHOWA mbang Jerusalem, “Sodom dekket Samaria bak sosor-sosorna, nduma nola ngo Kubaing mengolihi. Enggo kessa i, baru pè asa kono ma Kubaing nduma.

⁵⁴Merkitè bagidi mèla mo ko mengidah dirimu, janah kelèanmu menuduhken taba kaka anggimu, bakunè sellohna nasip kalak i.

⁵⁵Kalak i bak sosor-sosorna gabè nduma mengolihi, bagi ma bang kono dekket sosor-sosormu.

⁵⁶Otang enggo nung itertabai kono Sodom tikan gegah i dèng ko, dekket tikan madèng terbettoh kejahatenmu?

⁵⁷Bagèndari dos ngo kono dekketsa; gabè sitertabaen kalak Edom mo ko, kalak Palistin dekket cibal balengmu sidèbanna simernggogo atè midah kono.

⁵⁸Kennah mpiah ngo gongenkenmu ibaing ulah-ulahmu nggodo dekket simeronah i. Aku JAHOWA ngo simendokken i.”

⁵⁹Idokken JAHOWA Sintèmbul i, “Kubalesken mo bamu tosè bagè ulah-ulahmu, kumara enggo iosè ko bulabanmu dekket mengelausi padanKu dekket kono.

⁶⁰Tapi dak Kuèngèt ngo padan sienggo Kubahan dekket kono tikan poso dèng kono janah merpadan dekket kono simerlaku soh mi amman sumendah.

⁶¹Terèngèt mo ko ulah-ulahmu janah termalu pengakapmu sinderrang Kuolihken kaka-anggimu baMu. Kubaing mo kalak i tosè bagè dukak-dukakmu, kasi pè oda dekket kin ibas padanKu dekket ko.

⁶²Kubahan mo padan rembaru dekket kono. Nai satdar mo kono Aku ngo JAHOWA.

⁶³Oda nè mo kulugun karina kesalahenmu, tapi oda terlupaken kono nèngè i janah mèla mo iakap kono mengeruapken barang kadè pè. Aku JAHOWA Sintèmbul i ngo mendokken i.”