Read Batak Dairi Hesekiel 17 Bible Online

Hesekiel 17 - Batak Dairi bible

Hesekiel 17

¹Idokken JAHOWA mo mbang aku, “Alè jelma simangko-angko, sukutken mo taba kalak Israel codien,

²sinaing, Aku, JAHOWA Sintèmbul i memagahken taba kalak i: Lot sada manuk-manuk rajawali mbellen kalohon, merandal ngo bukbukna janah mbellang kabengna bana mergegoh. Ngkabang mo ia mi delleng Libanon, memenggelken sada pucuk batang kayu sempènur,

⁴nai iembah janah igamparken i kuta rami bekas mertiga-tiga.

⁵Nai ibuat mo singkambenna suan-suaen menguda dèng i tanoh Israel nai, janah isuan mo i juma nggabur, siso nung kurangen laè.

⁶Gabè anggur mo suan-suaen i, nturah ncerrep tapi mbellang ijorori. Dahan-dahanna menghuju taba rajawali i, janah uratna lenneng mbages mi tanoh. Ntemtem kalohon ngo batang anggur i.

⁷Nai lot ma mo manuk-manuk rajawali mbelgah sidèban; mbellang kabengna janah ngkapal bukbukna. Nai ihujuken batang anggur i mo uratna dekket dahanna taba manuk-manuk rajawali sirembaru i dekket harapen asa uè manuk-manuk i merèken buèen laè bana daripada silot i juma i.

⁸Padahal enggo tersuan anggur i i tanoh nggabur janah laèna meriba-iba, memaingsa ndorok gabè merbulung ntemtem, merbuah rombang-rambing, dekket gabè batang anggur merandal.

⁹Nai mengkuso mo Aku, JAHOWA Sintèmbul i: Ndorok ngo batang anggur i nggelluh janah marpar? Otang naing iberkat manuk-manuk rajawali perlebbè i ngo ia soh mi uratna, menembuk buahna, memenggelken dahan-dahanna janah memelli males? Oda pella iperluken mbuè gegoh barang bangsa sitermurmur lako memerkat batangna i dekket uratna.

¹⁰Tuhu enggo mbages ia tersuan, tapi ndorok ngo ia terrus nggelluh bak marpar? Oda ngo males ia mula iembus angin kebincaren? Oda ngo ngkerrah ia i bekkasna i suan i?”

¹¹Idokken JAHOWA mo mbang aku,

¹²“Kusoi mo kalak pemberontak i, tah iarusi kalak i ma lapaten codien i. Bagahken mo taba kalak i, enggo roh raja Babel mi Jerusalem, janah itaban ngo raja Juda bak simpantas niasè kuta i mi Babel.

¹³Nai ipilih mo sada kalak ipas sincelket raja Juda i nai, merpadan dekketsa, janah idokken mo ia mersumpah tanda setia tabasa. Itangkupi raja Babel i mo kalak simersangap,

¹⁴Asa ulang nè kèkè mengolihi kerajaen Juda i, janah asa terjamin magahken tuhu-tuhu iulaken padan i.

¹⁵Tapi memberontak ngo raja Juda ninganna pasulakken utusen mi Mesir lako mengido kuda dekket soridadu mbuè. Merhasil ngo ia? Ibelli ngo ia maluah? Oda tuhu ia siosè padan kum mak ihukum!

¹⁶Kumernaken Aku, Dèbata singgelluh i, JAHOWA Sintèmbul i, kennah matè i Babel mo raja Juda, kumara iosè bulabanna dekket raja Babel sienggo pebangkitkensa mengkunduli tahta.

¹⁷Tenterra Mesir simahantu i pè, oda sanggup mengurupisa ipas penjuhap kalak Babel i nai, simenèmbun tanoh dekket mengkurak parik-parik lako memunuh nterrem jelma.

¹⁸Kumarna enggo iosè bulaban dekket padanna, oda terbaingsa paluahken dirina.

¹⁹Kumarna Aku, Dèbata Singgelluh i, JAHOWA Sintèmbul i, Kuhukum mo raja Juda kumarna iosè padanna dekket raja Babel, keppèken enggo mersumpah ia mi gerarKu lako pesautkensa.

²⁰Kusampakken mo jala lako menangkupsa. Kuiring mo ia mi Babel janah Kuhukum i sidi, kumarna oda setia ia bangKu.

²¹Radak mo tenterrana simahantuna tupung mergeraha, janah simperrusna mambur mèrap mi dèsa siualuh. Nai satdar mo bangsangKu, Aku JAHOWA ngo simendokken i.”

²²Bagèen ngo idokken JAHOWA Sintèmbul i, “Ipas kayu sempènur ndates nai, Kucepakken pucukna, nai Kucuakken mo sada dahan simengudana; Kusuan mo dahan i i delleng ndates soh mi hembun.

²³I delleng sindatesna i Israel mo ia Kupasekken. I sidi mo ia mertunas, dekket merbuah, nai menjadi mo ia gabè kayu sempènur ntegguh. Nasa matcam manuk-manuk merasar bana janah culènggem i terruh lenggemenna.

²⁴Karina kayu i aur memettoh, Aku ngo JAHOWA. Kutabah ngo kayu ndates; kayu ncerrep kubaing ndates Kumacirok. Ngkerrah-kerring Kubaing kayu meratah; janah kayu mperra, Kuberèken tunas dekket bunga. Aku, JAHOWA ngo enggo mengerana, karina ranangKu, kennah saut.”