Read Batak Dairi Hesekiel 18 Bible Online

Hesekiel 18 - Batak Dairi bible

Hesekiel 18

¹Idokken JAHOWA mo mbang aku,

²“Kasa dakdak iranaken dèba codien èn i Israel? ‘Situa-tua kipangan buah anggur macem, tapi anak-anak ngo mengèlu èpenna.’

³Kumarna Aku, Dèbata singgelluh i, JAHOWA Sintèmbul i, oda nè iruapken codien i i Israel.

⁴Milikku ngo karina kessah jelma, kessah situa-tua bang pè kessah anak-anak. Barang isè jelma merdosa, ia ngo matè.

⁵Umpamana lot mo jelma merandal, adil dekket ntèger.

⁶Oda isembah gana-gana kalak Israel barang kipangan pèlèen sinipèlèken i bekkas menembah gana-gana. Oda nung igoda sinibages sidèban barang rebbak meddem dekket daberru kerohen bulan.

⁷Oda nung ia mengkilang barang memangus. Dak iolihken ngo ugasen gadè ndèba bana. Jelma rapar iberrè mangan, janah kalak siso merbaju, iberrè pakèen.

⁸Oda nung merbunga ibaing jual ndèba. Oda uè ia mengulaken jahat janah ntèger ngo hukumna mula lot perselisihen.

⁹Patuh ngo ia mi perèntahKu janah tunduk mi karina hukumKu. Kalak sibagidi ngo ntèger janah tettap nggelluh. Aku, JAHOWA Sintèmbul i ngo mendokken i.

¹⁰Tapi umpamana lot dukakna dak mema- ngus ulanna, memunuh dekket mengulaken matcam bagè kejahaten sidèban siso

¹¹nung iulaken bapana. Ipangan pèlèen sinipèlèken i bekkas menembah gana-gana. Igoda janah ipedemmi sinibages ndèba.

¹²Lolo atèna mengkilang sincor, memangus, inopken borok kalak simerutang bana. Laus ia mi bages sembahen kalak siso menandai JAHOWA dekket menembah gana-gana simeronah.

¹³Ipejual kalak tapi meranak. Pegelluhen ngo jelma sibagidi? Oda! Enggo ibahanken karina ulah-ulah simeroha i, nai kennah matè ngo ia! Matè ia kumernaken ulah-ulahna ngo.

¹⁴Umpamana lot mo dukak jelma sime- ngulaken kejahaten i, janah idah dukakna i ngo karina ulah-ulah bapana, tapi oda icodi.

¹⁵Oda nggèut ia menembah gana-gana kalak Israel, barang kipangan pèlèen sinipèlèken i bekkas menembah gana-gana. Oda nung igoda sinibages ndèba,

¹⁶barang menèndes barang memangus barang isè pè. Ugasen barang borok kalak simerutang bana pè dak iulakken ngo. Iberrè mangan kalak sikelèhèen, kalak siso meroles iperolessi.

¹⁷Oda nung iulaken jahat barang merèken jualen meranak. Patuh ngo ia mi pati-patinKu janah iuèi perèntahKu. Oda ngo matè dukak sibagidi kumarna dosa-dosa bapana, tapi tettap mo ia nggelluh.

¹⁸Balikna, bapana sidakdak mengkilang, memangus dekket mengulaken kejahaten sidèbankenna i, kennah matè kumarna dosa siniulakenna sendiri.

¹⁹Tah bakunè lot kalak kuso-kuso, kasa oda dekket dukakna gemongken pengenna dosa-dosa bapana. Jababna imo, kumarna mendè ngo pengelako dukakna i janah ntèger. Patuh ngo ia mi pati-patinKu janah setia mengulaken, nai tettap mo ia nggelluh.

²⁰Barang isè mengulaken dosa, ia ngo kennah matè. Ukum dukak oda kennah ia gemongken akibat kesalahen bapana; bagima ngo bang bapana pè oda ngo ia gemongken akibat dosa-dosa dukakna. Jelma merpengelako mendè menjalo upah mendè kumarna pengelakona mendè i. Janah jelma merpengelako jahat kennah menggong sindersa kumarna kejahatenna.

²¹Mula lot sada kalak perjahat tapi oda nèngè mengulaken dosa janah itebennai menguèi pati-patinKu, ninganna mengulaken pengelako merandal janah bennar, oda nèngè matè ia.

²²Karina dosana iampuni; nggelluh mo ia, kumarna mengulaken situhunna.

²³Tah dok atèmu, Aku JAHOWA Sintèmbul i sennang mula matè jelma jahat i? Situk poda i! Kupergeddo ngo asa itadingken karina dosana asa tong ia nggelluh.

²⁴Tapi mula sada kalak simerpengelako merandal, oda nèngè mengulaken simerandal, balikna nola gabè itubennai mengulaken kejahaten dekket karina ulah-ulah siso kasèa bagè ulah-ulah jelma jahat, tong dèng ngo ia nggelluh? Oda nè! Sada bagè nè poda èngèten pengelakona merandal i. Matè mo ia kumernaken mengulaken dosa dekket oda setia taba Aku.

²⁵Tah bakunè lot mendokken bagèen, ‘Oda teppat pemaing JAHOWA i.’ Dengkohken mo alè kalak Israel! Pilit ngo pemaingKu? Kènè ngo pilit.

²⁶Mula lot kalak simengulaken merandal, tapi oda nèngè mengulaken merandal, tapi enggo nola mengulaken jahat, kennah matè mo ia, kumarna kejahaten siniulakenna.

²⁷Tapi mula kalak perjahat oda nèngè mengulaken dosa, tapi enggo itebennai mengulaken bennar dekket merandal, maluah mo kessahna.

²⁸Enggo satdar ia karina ulah-ulahna nai mentadi mo ia me- ngulaken dosa. Merkitè bagidi oda nèngè mo matè ia, tapi tettap mo nggelluh.

²⁹Asa kènè alè kalak Israel, idokken kènè pilit ngo pemaing JAHOWA i. Pilit ngo pemaingKu i alè Israel? Oda! Kènè ngo pilit!”

³⁰Idokken JAHOWA Sintèmbul i, “Alè kalak Israel, Kuhukum ngo gennep jelma codi mi pengelakona. Tobat mo kènè ibas dosa-dosa ndènè nai. Ulang belli dosamu mencèdai dirimu.

³¹Petadi mo karina kejahaten siniulaken ndènè, janah gabè rembaru mo ukur dekket pikiren ndènè. Kasa mo kennah matè kènè?

³²Oda lemmo atèngku mula lot sada kalak matè. Tadingken mo dosa-dosa ndènè asa tettap nggelluh kènè. Aku JAHOWA Sintèmbul i ngo mendokken i.”