Read Batak Dairi Hesekiel 19 Bible Online

Hesekiel 19 - Batak Dairi bible

Hesekiel 19

¹Idokken JAHOWA ngo aku memilang-milangken tangis milangi èn lako bai dua kalak anak raja Israel:

²Inangmu tosè bagè singa inang-inang mahantu janah oda terpetia-tia. Ipebelgah-belgah ngo anakna i tengah-tengah singa mahantu.

³Iajari ngo anakna i sada janah iajar ma menulusi jerngemenna. Nai gabè singa mbelgah mo ia penjerngem janah kipangan jelma.

⁴Bangsa-bangsa simendengkoh tersèngèt ia mertumpu lako menangkupsa. Itogongi mo ia merkitè geddung janah itaban nai isaran mi Mesir ninganna ikontam.

⁵Sia-sia inangna memèma anakna nai ibettoh mo oda lot nè harapenna. Jadi iajar nola mo anakna sidèban gabè singa melaga bana mak terpetia-tia.

⁶Gabè mebellen mo anak singa i janah mersaor dekket singa sidèbankenna i. Terajar mo ia mencari panganna janah gabè kipangani jelma ma.

⁷Karina bèntèng pè ilentem ma karina kuta irumpakken ma. Karina pengisi aur gabè gontar mendengkoh perngengengna merginoling.

⁸Tapi bangsa-bangsa i aur sikulilingna i karina arah nai mengerègepsa. Itogong kalak i mo jala lako menangkupsa nai dapet mo itogongi kalak i ia.

⁹Icucukken mo ia mi bagasen kurungen singa janah iosong mi nagerri Babel, menghadep raja. Mpelcik mo ia ijaga asa ulang terdengkoh nè ngengengna i babo delleng bak uruk Israel sindates i.

¹⁰Tosè bagè anggur merandal ngo inangmu nturah i pekken biding laè. Gabè ntemtem ngo ia janah merbuah kumarna laè sinisidi dak merginja-ginja.

¹¹Ngkong ngo dahanna, oda ndorok icuakken patut ibaing gabè tongket kerajaen. Pucukna ndates mi langit soh kenna mi hembun. Karina jelma bengap bana kerna ia ndates, bulungna pè ntemtem.

¹²Tapi iberkat tangan-tangan kalak melaga mo ia nai ipatakken mi tanoh. Menempul angin kebincaren, maing mperra buahna simeratah kin. Dahanna pè ncuak, gabè mperra nai ilekkup.

¹³Bagèndari isuan mo ia i padang gurun i tanoh siso merlaè bana dakkir.

¹⁴Idilat api rarat mo batang anggur i; dahan bak buahna kerri ipangan api. Bagèndari oda ngkong nè dahanna oda ndorok nè bakinen tongket kerajaen ia. Idi mo tangis milangi dak pukpuk ibilang-bilangken bangsa i.