Read Batak Dairi Hesekiel 2 Bible Online

Hesekiel 2 - Batak Dairi bible

Hesekiel 2

¹“Alè jelma simangko-angko, cènder mo ko. Sèkel ngo aku mengerana dekket ko.”

²Tikan kudengkoh sora i, mbengket mo Tendi JAHOWA mi diringku, janah mèter ipecènder mo aku. Nai kudengkoh nola mo sora i mendokken,

³“Alè jelma simangko-angko, Kuutus mo ko mendahi kalak Israel simemberontak i mengalo Aku. Bagè empungna i ma ngo kalak i memberontak.

⁴Jèngèng ngo kalak i janah oda ipesangap Aku. Kupasulak mo ko mendahi kalak i lako magahken ranangKu, Dèbata JAHOWA Sintèmbul i, taba kalak i,

⁵tah uè kalak i mendengkohken barang oda; ai perlu ngo ibettoh kalak i lot nabi i tengah-tengah kalak i.

⁶Tapi ukum kono, alè jelma simangko-angko, ulang mbiar mengidah pemberontak i, barang taba tah kadè pè idokken kalak i. Ialo janah ilèai kalak i ngo ko, bagè cara nggelluh i kellang-kellang bik mo ko. Tukasi pè bagidi ulang ko mbiar.

⁷Bagahken mo karina tennahKu bai kalak i, tah uè kalak i mendengkohken barang tah oda. Èngèt mo, ukum kalak idi pemberontak-pemberontak ngo.

⁸Alè jelma simangko-angko, begèken kata siKudokken bamu. Ulang terèkut-èkut ko memberontak ma. Pengangang mo babahmu janah pangan mo kadè siKuberèken bamu èn.”

⁹Nai kuidah mo tangan doro mendahi aku. Ibas tangan i lot lapihen igolong,

¹⁰mersurat i dua lumpakna. Nai iogè mo simergolong i, janah tersurat ngo i sidi tangis milangi, kelsohen dekket mendeherreng.