Read Batak Dairi Hesekiel 20 Bible Online

Hesekiel 20 - Batak Dairi bible

Hesekiel 20

¹I ari sipuluh bulan lima, i tahun pepituken kami terbuang i, roh mo piga-piga kalak pengulu Israel mendahi aku lako mengido peddah JAHOWA. Enggo kessa kundul kalak i i lebbèngku,

²kudengkoh mo idokken JAHOWA mbang aku,

³“Alè jelma simangko-angko, mengerana mo ko taba pengulu-pengulu i, janah dokken mo, ukum Aku, JAHOWA Sintèmbul i mendokken bagèen ngo, ‘Pangna i kènè mengido peddah bangKu! Kumernaken Aku, Dèbata Singgelluh i, oda lemmo atèngku ipido kènè peddah bangKu nai! Aku, JAHOWA Sintèmbul i enggo mengerana.’

⁴Alè jelma simangko-angko, enggo kebbas kono lako menghukum kalak i? Mula enggo bahanken mo! Sèngètken taba kalak i karinana nasa simeronah ulah-ulah empung kalak i.

⁵Bagahken mo siKudokken èn. Enggo kupilih kalak Israel janah enggo merbulaban aku bai kalak i. Kupacidah ngo diringku bai kalak idi i Mesir ninganna kudokken, ‘Aku ngo JAHOWA Dèbatamu.’

⁶Tikanna i Kusumpahken ngo asa kuarak kalak i karuar i Mesir nai lako mi nagerri siKupilih bai kalak i. Kaya ngo nagerri i janah nggabur, tanoh simerandalna i suberri dunia.

⁷Kudokken ngo asa ipatakken kalak i gana-gana simeronah sinikekelengen kalak i, janah Kugerra ngo asa ulang ilamuni dirina merkitè menembah gana-gana i Mesir i nai, kumarna Aku ngo JAHOWA Dèbata kalak i.

⁸Tapi ialo kalak i ngo Aku janah oda ipatih ranangKu. Oda uè kalak i mematakken gana-gana simeronah i janah oda uè mentadi menembah bègu bak gana-gana Mesir. Tikan i sidi dèng kalak i, enggo kin ngo Kukebasi lako pepuasken lagangKu bai kalak i.

⁹Tapi kuhempek dèng ngo i, asa ulang merlèa gerarKu ibaing bangsa bekkas kalak i merian i. Kerna enggo kutingtingken i hadeppen bangsa-bangsa i, magahken kuarak kalak Israel karuar i Mesir nai.

¹⁰Nai Kuarak mo kalak i karuar i Mesir nai laus mi padang pasir.

¹¹I sidi Kuberèken bai kalak i pati-patinKu janah Kuajarken hukum-hukumKu sikennah uèen kalak i, ai tettap ngo nggelluh barang isè simenguèisa.

¹²Kudokken ngo kalak i pebadiaken ari Sabat mahan pertanda padanKu dekket kalak i, lako mengèngètken kalak i, Aku ngo JAHOWA sienggo mengkedekoken kalak i bangKu.

¹³Tapi i padang gurun i ma mo itonja kalak i Aku. Ilalui kalak i ngo perèntahKu janah itulak ngo pati-patinKu, simenjamin barang isè mengulakensa, tettap mo ia nggelluh. Mekemmer kalohon ngo ibaing kalak i ari Sabat. Kumarna i, enggo kebbas Aku pepulakken pengamuk lagangKu taba kalak i dekket mengeripasken kalak i.

¹⁴Tapi sondat ngo Kubaing kumarna kebadiaen gerarKu, asa ulang ilèai bangsa-bangsa simengidah Aku mengarak Israel karuar i Mesir nai.

¹⁵Kuasup ma ngo i padang gurun i ulang uè Kuarak bangsa Israel masuk mi tanoh sienggo Kupèmaken bai kalak i, imo tanoh kaya janah nggabur janah simendèna i suberri dunia.

¹⁶Kuruapken asup i Kumarna ilalui kalak i perèntahKu, ilausken pati-patinKu janah ilamuni ari Sabat. Loloen ngo kalak i menembah gana-gana kalak i.

¹⁷Tapi daoh-daoh arien gabè masèh nola mo atèngku midah kalak i, gabè oda mo saut kalak i Kubunuh i padang gurun i.

¹⁸Balikna nola ngo tupèh, siposona dèng bai kalak i nai Kuajari bagèen, ‘Ulang èkuti kènè hatoren-hatoren sinibaing empung ndènè. Ulang codi kènè kecemmalen kalak i janah ulang ma lamuni kènè diri ndènè merkitè menembah gana-gana kalak i.

¹⁹Aku ngo JAHOWA Dèbata ndènè. Uèi mo pati-patin dekket perèntah-perèntahKu.

²⁰Perbadiai mo ari Sabat, asa gabè pertanda padanku i dekket kènè, lako mengèngètken kènè, Aku ngo JAHOWA Dèbata ndènè.’

²¹Tapi siterposona i pè jèngèng janah mengalo-ngalo ngo taba Aku. Ilalui kalak i ngo pati-patinKu janah oda isuihken perèntah-perèntahKu, simenjamin tettap ngo nggelluh kalak simenguèisa. Ilamuni kalak i ngo ari Sabat. Kumara i enggo kebbas Aku pacidahken pengamuk lagangKu taba kalak idi i padang pasir lako memunuh kalak i karina.

²²Tapi oda Kupesaut i asa ulang ilèai bangsa-bangsa simengidah Aku mengarak kalak Israel karuar i Mesir nai gerarku.

²³Kusumpahken ma ngo i padang gurun i, kennah kusompar-baèrken kalak i mi suberri tanoh èn,

²⁴kumarna oda isuihken kalak i perèntah-perèntahKu, ilalui pati-patinKu, ilamuni ari Sabat janah dak tong isembah bègu sinisembah empung kalak i.

²⁵Nai Kuberèken mo taba kalak i pati-patin sisoselloh dekket perèntah-perèntah siso ndorok merèken nggelluh.

²⁶Kubelli mo kalak i mengelamuni dirina dekket pèlèen sinipèlèken kalak i sendiri, soh mi anak buka bajuna pè ipèlèken kalak i. Merkitè bagi mo carana Kuhukum kalak i asa ibettoh kalak i Aku ngo JAHOWA.

²⁷Asa, alè jelma simangko-angko, bagahken mo taba kalak Israel, kadè siKudokken JAHOWA Sintèmbul i taba kalak i: Codien sidèban ngo èn menuduhken bakunè empung ndènè mengelèai Aku dekket oda setia taba Aku.

²⁸Kuarak ngo kalak i mi tanoh sienggo Kuperbagah bai kalak i. Sinderrang idah kalak i delleng-delleng ndates dekket kayu-kayu ntemtem, ipèlèken kalak i mo pèlèen i bekkas idi. Idungkul kalak i ngo lagangKu merkitè pèlèen situtungen dekket pèlèen anggur kalak idi.

²⁹Mengkuso mo aku taba kalak i, ‘Bekkas-bekkas ndates bakunè ngo sinidahi ndènè i?’ Nai mulai i sidi nai mo bekkas i igerari, ‘Bekkas-bekkas ndates.’

³⁰Jadi bagahken mo taba kalak Israel, kadè sinidokken Dèbata JAHOWA Sintèmbul i taba kalak i. ‘Kasa iulaken kènè dosa bagè siniulaken empung ndènè? Bagè empung ndènè i ma ngo kènè dak menguèi taba gana-gana simeronah i.

³¹Janah soh mi sidari èn pè ilamuni kènè ngo diri ndènè merkitè merembah pèlèen dekket menutung dukak-dukak ndènè mahan pèlèen taba gana-gana. Nai pang dèng ngo kènè mengido ajar bangKu nai? Kumernaken Aku, Dèbata singgelluh i, JAHOWA Sintèmbul i, oda Kupadiat kènè mengido ajar bangKu nai.

³²Sèkel ngo kènè asa dos dekket bangsa-bangsa sidèban dekket pengisi nagerri-nagerri sidèban simenembah kayu bak batu. Tapi oda terpesaut kènè sèkel atè ndènè i.’ ”

³³“Kumarnaken Aku, Dèbata singgelluh i, JAHOWA Sintèmbul i, Kupesèngèt kènè, kumarna lagangKu, mposi mo carangku memerèntah kènè janah teggas, asa iakapken kènè kuasangKu. Kupedèmpu mo kènè janah kuarak i karina nagerri bekkas ndènè mambur mèrap idi nai.

³⁴

³⁵Nai Kuarak mo kènè mi ‘Gurun bangsa-bangsa.’ I sidi mo kènè Kuhukum pehadep abè,

³⁶tosè bagè sienggo Kubaing taba empung ndènè i Delleng Sinai! Aku JAHOWA Sintèmbul i ngo mendokken i.

³⁷Mpiah mo Kubaing taba kènè, asa iuèi kènè padanKu.

³⁸Karina pemberontak dekket perjahat Kupelaus i tengah-tengah ndènè nai. Kuarak mo kalak i karuar i nagerri-nagerri bekkas kalak i merian bagèndari janah oda Kupadiat mulak mi tanoh Israel. Nai satdar mo kènè, Aku ngo JAHOWA.”

³⁹Idokken JAHOWA Sintèmbul i, “Alè kalak Israel, bagèndari pè terserah bai ndènè. Empet mo mengulaken dosa merkitè menembah gana-gana sembahen ndènè i! Tapi èngèt mo, enggo kessa i kennah uèen ndènè ngo Aku janah ulang nèngè lamuni gerarKu simbadia i, merkitè merembah pèlèen taba gana-gana sembahen ndènè i.

⁴⁰Kumarna i tanoh Israel, i pucuk dellengKu simbadia i, karina kènè, bangsa Israel kennah menembah Aku. Sennang mo ukurKu i sidi, janah kujalo mo pèlèen ndènè, senisembahken ndènè simendèna dekket siniberèken ndènè simerkedekoen idi.

⁴¹Enggo kessa Kuarak kènè karuar i nagerri-nagerri bekkas ndènè mambur mèrap idi nai, Kupedèmpu mo kènè janah kujalo mo karina pèlèen situtungen siniembah ndènè. Nai ibettoh karina bangsa mo, Aku ngo Dèbata Simbadia i.

⁴²Kuarak kessa mo kènè balik mi tanoh Israel, tanoh siKuperbagah i bai empung ndènè, satdar mo kènè, Aku ngo JAHOWA.

⁴³Ièngèt kènè mo i sidi karina ulah-ulah ndènè simeronah i sienggo mengelamuni diri ndènè. Gabè moyang mo atè ndènè mernèngèt karina kejahaten i.

⁴⁴Mula kubakin bagidi taba kènè kumerna kebadiaen gerarKu ngo, janah oda codi i mi pengelako ndènè simeroha i dekket mi ulah-ulah ndènè jahat i, satdar mo kènè kalak Israel, aku ngo JAHOWA. Aku JAHOWA Sintèmbul i ngo mendokken i.”

⁴⁵Idokken JAHOWA mo mbang aku bagèen,

⁴⁶“Alè jelma simangko-angko, tatap mo mi selatan. Pesèngèt mo tanoh selatan janah sergangi mo rambah sinisidi.

⁴⁷Dokken mo rambah sinisidi mendengkohken sinidokken, Aku JAHOWA Sintèmbul i mbangsa, ‘Dengkohken mo! Kerri mo kusuluhi karina kayu silot bamu, kayu ntasak bang matah pè. Oda ndorok terènteppen api simergollah-gollah i. Rarat mo ia i selatan nai mi utara, janah karina jelma mengerasai nggarana.

⁴⁸Satdar mo kalak i, Aku, JAHOWA ngo sienggo mengelakati api i, janah sada kalak poda terbaing mengènteppisa.’ ”

⁴⁹Tapi aku si Hesekiel mengeruapken keberatenku janah mendokken, “Alè JAHOWA Sintèmbul i, ulang pasulak aku memagahken i! Enggo karina kalak kelsohen kumarna mengerana aku merkitè codien, gabè mahal iarusi.”