Read Batak Dairi Hesekiel 21 Bible Online

Hesekiel 21 - Batak Dairi bible

Hesekiel 21

¹Mengerana mo JAHOWA taba aku, nina mo,

²“Alè jelma simangko-angko, dak sumpahi mo Jerusalem. Sumpahi mo bekkas-bekkas mersembah nisidi. Pesèngèt mo tanoh Israel,

³Aku, JAHOWA, mendokken bagèen, ‘Musuhmu ngo aku èn. Kuberkat mo peddangKu janah kubunuh kènè karina, kalak jahat dekket kalak bujur.

⁴Merkitè peddangKu, Kualo mo karina jelma i utara nai soh mi selatan.

⁵Nai ibettoh karina jelma mo, aku, JAHOWA menintak peddangKu janah oda kusembungken nèngè.’

⁶Alè jelma simangko-angko, mendeherreng mo ko janah muo-uo mo ko i hadeppen kalak Israel, codi bagè kalak sisongket penarihen dekket kalak mendellè.

⁷Mula ikusoi kalak i kasa muo-uo kono, dokken mo kumarna bonek ko ibaingken berita sinaing masa. Mbiar mo kalak i kumarna berita i, melèah mo tangan kalak i, janah menggirgir tèunna, gabè mengèrput mo kalak i. Tuhu ngo enggo dapet tikkina, janah saut mo masa karina i. Aku JAHOWA Sintèmbul i ngo mendokken i.”

⁸Idokken JAHOWA mo mbang aku,

⁹“Alè jelma simangko-angko, alamatken mo! Bagahken mo taba jelma i, Aku JAHOWA mendokken bagèen, ‘Lot mo sada peddang peddang sinigarut janah ipetajem.

¹⁰Itajemmi pè ia asa ndorok mematèken ipedalit asa merkillok-killok. Oda lot nèngè sampang atè bai bangsangKu kumarna oda isuihken karina sipesèngèt dekket hukum.

¹¹Igarut ngo peddang i asa dak tong kebbas ipakkè nai iberèken bai sada kalak penebbeng.

¹²Alè jelma simangko-angko, tangis milangi mo ninganna pingko-pingko! Kumarna enggo kebbas peddang i mengalo bangsangKu. Karina pengulu Israel rasken karina bangsa itikam peddang i soh binasa. Asa tempuk mo tentenmu ningan mali-ali,

¹³kumarna tupung aku mengoji bangsangKu i, mula oda uè kalak i mengobah pengelakona, saut mo sempa i karina taba kalak i.’

¹⁴Asa, alè jelma simangko-angko, alamatken mo. Kurpak mo tanganmu, mahan pertanda bai peddang i lako kebbas menebbengi. Sikebiaren kalohon ngo peddang i.

¹⁵Mago ngo keberanien bangsangKu ibaing peddang i dekket gabè geppah terdengdeng. Kuasup mo kuta kalak i merkitè peddang siksak bagè pelian janah sienggo kebbas lako memunuh.

¹⁶Alè peddang ntajem, pancong mo mi kamuhun bak mi kambirang, dekket barang mikè sambing mengèkutken hendakmu.

¹⁷Aku pè mengkurpak tangan ma mo, nai malap mo lagangKu. Aku JAHOWA ngo simendokken i.”

¹⁸Mengerana nola mo JAHOWA mbang aku, nina mo,

¹⁹“Alè jelma simangko-angko, gombar mo dua dalan sindorok idalani raja Babel merembah peddangna. Kennah merbenna i sada nagerri nai ngo dalan sidua i; sada dalan i menghuju mi Raba, kuta Amon; sada nai mi Jerusalem, kuta gotting i Juda. Baing mo papan menuduhken dalan i dikè mulai mersirpang.

²¹Cènder ngo raja Babel i gembar papan tuduh-tuduh dalan i. Lako memettoh dalan pai sinaing dalanenna, ipido ngo ajar bai gana-gana sembahenna nai merkitè mengkucuk panah dekket mendatèken atè binatang rembaru ipèlèken.

²²Dapet mo panah sinijemput tangan kamuhunna mertanda Jerusalem. Merlapaten ngo i, kennah Jerusalem ngo ijuhap raja i, menurakken surak geraha dekket mendokken taba soridaduna menusun perkekkas memaingken pengongkil i pèntu-pèntu pengkeruhen Jerusalem, menèmbun tanoh mahan bekkas mengkubu dekket mengkurak parik-parik.

²³Oda tok pengisi Jerusalem, enggo ikubu kalak idi, kumarna enggo merpadan kalak i dekket Babel. Tapi alamat èn mo pesè- ngètken kalak i, lako itangkup mo kalak i kumernaken dosa-dosa kalak i.

²⁴Aku, JAHOWA Sintèmbul i ngo mendokken taba kalak i, ‘Enggo terbettoh dosa-dosamu, janah suberri jelma memettoh kènè mersalah. Ntarar ngo kejahaten ndènè ibas karina pengelako ndènè. Bagèndari enggo dapet tikkina ihukum mo kènè janah Kusohken taba musuh ndènè.’

²⁵Janah taba raja Israel Kudokken, ‘Alè raja jahat janah durhaka! Enggo ndessing tikkina lako menghukum ko perpodi ka- lohon.

²⁶Aku, JAHOWA Sintèmbul i enggo mengerana. Talkasi mo mahkotamu janah osari bulang-bulangmu. Enggo mobah masana bagèndari. Tambahi mo kesangapen kalak sincor janah berrè bai kalak i kuasa! Pesusur penguasa-penguasa i kesangapenna nai!

²⁷Naing kulala mo suberri kuta èn, gabè empak-empak nai ngo lot barang i dikè sambing. Tapi lebbè roh ngo kalak sikupilih lako menghukum kuta èn, asa saut sempa i. Bana mo Kusohken kuta èn.’ ”

²⁸“Alè jelma simangko-angko, ramalken mo! Bagahken mo taba kalak Amon sienggo mengelèai kalak Israel, Aku JAHOWA Sintèmbul i mendokken, ‘Enggo mèma sada peddang lako menggat-gati; enggo igarut peddang i merkillok bagè pelian, asa kebbas lako memunuh.

²⁹Alaten siniidah ndènè i oda tuhu i, janah alamat siniruapken ndènè i pè luap bana suntil. Jahat ngo kènè bana durhaka, janah enggo ndessing tikkina lako menghukum kènè perpodi. Peddang imo lako memancong kerahongmu.

³⁰Alè kalak Amon, sembungken mo balik peddangmu! Kuhukum mo kènè i bekkas ndènè ihanaken dekket itubuhken.

³¹Kupepulak mo lagangKu singgerger i taba kènè. Kusohken mo kènè taba jelma kalak kejam sienggo terlatih lako membinasaken.

³²Salpun mo kènè ilekkup api. Orè mo daroh ndènè i nagerri ndènè sendiri, janah sada kalak nèngè poda lot terèngèt bai ndènè. Aku JAHOWA ngo mendokken i.’ ”