Read Batak Dairi Hesekiel 22 Bible Online

Hesekiel 22 - Batak Dairi bible

Hesekiel 22

¹Idokken JAHOWA mo mbang aku, nina mo,

²“Alè jelma simangko-angko, enggo ma ngo kebbas kono menghukum kuta sidom pemunuh i? Tuduhken mo bana karina perulanna simeronah i.”

³Ipasulak JAHOWA Sintèmbul i ngo aku memagahken tennahna èn taba Jerusalem, “Salah ngo kono kumarna enggo mèduk ibunuh kono pengisimu sendiri, dekket enggo ilamuni kono dirimu merkitè menembah gana-gana siniganamu sendiri. Kumara i enggo ndessing ketikana lako menghukum kono janah nggelluhmu pè ndor mo salpun. Kubelli mo kono gabè sirèhèen dekket sitertabaen karina bangsa dekket karina nagerri.

⁵Ipencèdurken kalak simerian i nagerri ndaoh bak ndessing mo kono kumarna dakdak ilalui kono hukum dekket hatoren.

⁶Karina ngo huntuen kalak Israel mengasangken gegohna sendiri dekket memunuh.

⁷Sada kalak poda pengisimu pesangapken partuana. Ikilang kono ngo kalak sidèban janah muat laba arap kesusahen daberru mbalu dekket sitading melumang.

⁸Ilamuni kono bekkas mersembah taba aku janah oda isarihken kono ari Sabat.

⁹Lot ngo i tengah-tengah pengisimu nai me- ngajarken latlat menukas sidèban asa ihukum matè. Lot ma ngo uè kipangan gulè sienggo ipèlèken bai gana-gana. Lot dèng ma ngo dak merpengelako luhlah.

¹⁰Lot ngo menggoda bak rebbak meddem dekket inangna mengganci, daberru tupung roh pantangen olesna,

¹¹sinibages sidèban barang kalak purmaènna barang turangna sinama.

¹²Lot ma ngo gabè pemunuh upahen, pengoto-ngotoi dekket pengkilang denganna sada bangsa. Karina kalak i enggo mengelupaken Aku. Aku, JAHOWA Sintèmbul i ngo simendokken i.

¹³Tapi bagèndari naing Kulentem mo penamun dekket pemunuhmu.

¹⁴Pang dèng barang lot dèng ma ngo gegohmu lako pekèkèken tanganmu enggo kessa dung Kuhukum kono? Aku, JAHOWA Sintèmbul i ngo enggo mongkam janah Kupesaut ngo barang kadè sienggo Kuruapken.

¹⁵Kusompar-baèrken mo pengisimu mi suberri aur bak bangsa, janah Kupetadi mo pengelakomu jahat i.

¹⁶Ilèai bangsa-bangsa sidèban i mo ko, nai satdar mo kono, Aku ngo JAHOWA.”

¹⁷Nina JAHOWA mo mbang aku,

¹⁸“Alè jelma simangko-angko, oda merguna kalak Israel i bangKu. Codi bagè kotoren logam sinigumul ngo kalak i, bagè tembaga, cemberrah, bessi dekket cemberrah itam sitadingna enggo kessa itingtingi pirak ibas perpandèen.

¹⁹Nai bagèndari, Aku JAHOWA Sintèmbul i mendokken taba kalak i, tosè bagè logam siso merguna i ngo kalak i. Tosè bagè rugut pirak, suasah, bessi, cemberrah mbèrèng dekket cemberrah mbentar iumbaki mi api lako meningtingi, bagi ma mo kalak i Kupedèmpu janah Kubabai mi Jerusalem. LagangKu sintengam i ngo mengelala kalak i bagè api mengelala rugut logam-logam i.

²¹Uè, naing Kupepulung mo kalak idi i Jerusalem, kugergerri mo api pungurKu i terruh kalak i, asa gabè melala bana menètèen kalak i.

²²Tosè pirak ilala mi perpandèen, bagi ma mo kalak i ilala i Jerusalem. Nai satdar mo kalak i, Aku, JAHOWA enggo pesempaken lagangKu taba kalak i.”

²³Idokken JAHOWA dèng ma mbang aku, nina,

²⁴“Alè jelma simangko-angko, bagahken mo taba kalak Israel, melamun ngo tanoh kalak i, janah kumara i ngo melaga aku dekket menghukumsa.

²⁵Pengendengna tosè bagè singa merngengngeng enggo kessa menjerngem panganna. Ibunuh kalak i ngo ginemgem, mengelaum karina harta dekket kinibèak silot jupa kalak i janah memakin mèduk daberru gabè mbalu.

²⁶Imam-imam Israel mengelalui pati-patinKu dekket mengelamuni barang-barang sienggo ipejaè bangKu. Oda ibijaken kalak i siapai halal janah siapai haram. Janah ma oda ipeddahi kalak i jelma nterrem lako membijaken siapai mpanting janah siapai melamun mengèkutken ha- toren agama. Oda isuihken kalak i ari Sabat. Merkitè bagidi ilèai bangsa Israel ngo Aku.

²⁷Pemerèntahna pè bagè sorigala simencirak-cirak sinijerngemna. Memunuh ngo kalak i pellin lako menulusi laba.

²⁸Iboniken nabi-nabi ngo dosa-dosa i; tosè ngo kalak i bagè mencèt dingding kotor. Alaten-alaten kalak idi palsu, bagi ngo bang alamat-alamat kalak i. Idokken kalak i bai JAHOWA Sintèmbul i nai ngo tennah sinipesoh kalak i, keppèken oda lot kirana aku dekket kalak i.

²⁹Mengkilang janah memangus ngo kalak sibèak. Oda meralang-alang ibaing kalak i taba kalak sincor dekket mengamet perlabaen bai kalak sidèban nai.

³⁰Kutulusi ngo i tengah-tengah kalak Israel i nai jelma sindorok mahan dingding, barang cènder i bekkas sienggo merumpak dingdingna lako mempebèlai nagerri i, mula naing Kulala ibagasen perpuas lagangKu, keppè sada kalak poda jupaku.

³¹Kumara i kupepuas mo lagangKu taba kalak i, janah bagè api Aku mengkeriken kalak i kumernaken karina ulah-ulahna. Aku JAHOWA Sintèmbul i ngo simengeruapken i.”