Read Batak Dairi Hesekiel 23 Bible Online

Hesekiel 23 - Batak Dairi bible

Hesekiel 23

²“Alè jelma simangko-angko, lot mo dua kalak daberru merkaka-kuanggi.

³Tikan poso dèng, merian i Mesir ngo kalak i. Bennè ngo gadina i sidi, nai gabè sibabijalang mo kalak i.

⁴Situaen mergerar si Ohola; ia mo menggombarken Samaria. Anggina mergerar si Oholiba menggombarken Jerusalem. Kukabini mo kalak i janah lot mo dukakku bai kalak i sidua nai.

⁵Tukasi pè enggo gabè sinibagesKu si Ohola, tong ngo ia dak sibabijalang, janah dak ketagien kalohon mendengani alè-alèna i Assur nai.

⁶Soridadu merpakèen mbara mesiap ngo kalak i, simpantas niasè dekket pugabè perpangkat ndates; karina lubalang-lubalang merkuda janah maholi.

⁷Dekket perpangkat ndates i mo si Ohola merkendangen. Janah dèng ma kumerna ketaginna kalohon, ilamuni ngo dirina merkitè menembah gana-gana kalak i.

⁸Terrus ngo ia merkendangen bagè ulah-ulahna tikala i, i Mesir, imo tikan kebenèen kegadinna ia. Mulai kèdèk nai ngo ia enggo ipedemmi janah ibaing gabè sibabijalang.

⁹Kumara i Kusohken mo ia taba alè-alèna kalak Assur siniketedohkenna kalohon i.

¹⁰Kasar ngo pengkelanjangi kalak i tabasa, nai ibunuh merkitè peddang, janah irampasi mo dukak-dukakna. Barang i dikè sambing pè gabè buah bibir daberru mo jalonkenna.

¹¹Idah si Oholiba anggina i mo simasa i, tapi lebbih ntagi dèng ngo ia mengulaken luhlah i daripada si Ohola.

¹²Si Oholiba pè iketedohken kalohon ngo kalak Assur i, imo anak-anak perana maholi i soridadu merkuda i nai, bang simpantas niasè bak perpangkat ndates dekket soridadu simerpakèen mbara mesiap i.

¹³Kuidah luhlah kalohon ngo si Oholiba i, dos bagè kakana.

¹⁴Makin ndekkah muat luhlahna ngo si Oholiba. Ngkelleng kalohon ngo atèna midah gombaren siterokir ipas dingding, dekket ipemendè dekket ubar bagè mbara daroh. Gombar-gombaren i imo pertanda lubalang-lubalang Babel dekket penggang merandal bak bulang-bulang pinutar.

¹⁵

¹⁶Idah si Oholiba kessa gombar-gombaren i, kèkè mo ketaginna, nai itennahken mo lubalang-lubalang i mi Babel.

¹⁷Nai roh mo kalak i janah rebbak meddem dekketsa. Lebbih ngo cara kalak i mendenganisa, ujungna gabè moyang mo atèna midah kalak i.

¹⁸Enggo kessa i ntarar mo ia merkendangen janah ipertontonken mo dirina bai jelma nterrem. Moyang ngo atèngku midahsa, bagè permoyang atèngku midah kakana.

¹⁹Makin ndekkahna makin nggati ngo ia merkendangen, oda lot kalihna tikan simerbaju dèng ia tikan merkendangen i ia i Mesir.

²⁰Tikka ngo ntagina midah daholi mula mahantu napsuna, dekket pernaik ntagina bagè napsu kuda tonggal.

²¹(Alè Oholiba, sèkel ngo ko mengulaken luhlahmu bagè ulah-ulahmu tikan poso dèng ko, sinderrang mersiema-emaen kalak Mesir dekket kono.)”

²²Idokken JAHOWA Sintèmbul i, “Alè Oholiba, enggo peahen kono midah alè-alèmu i, tapi Kugara-garai mo kalak i asa melaga kalak i taba kono asa ikubu kono.

²³Kupepulung janah kuarak mo karina alè-alèmu i mendahi kono i Babel nai, dekket kalak Pekod, Soa, Koa, Assur dekket kalak Kaldea. Kuarak mendahi kono anak-anak perana maholi perpangkat ndates, simpantas niasè, pengulu èkuten dekket lubalang-lubalang soridadu merkuda.

²⁴Ijuhap kalak i mo ko i utara nai dekket soridadu mbuè kalohon dekket kurèta-kurèta perang bak kurèta-kurèta simerembah bekkel. Merlègen-lègen mi tambeng-tambeng dekket tangkuluk waja, ikubu kalak i mo ko. Kubelli mo ihukum kalak i kono mengèkutken hukum-hukumna sendiri.

²⁵Kumara lagana ngo Aku midah kono, Kubelli ngo kalak i memaing taba kono kekejamen. Egung bak copingmu pè ialpis kalak i dekket dukak-dukakmu pè irampasi kalak i janah itutung gelluh-gelluhen.

²⁶Ikelanjangi mo ko janah karina emmas pakèenmu irampasi.

²⁷Bagidi mo Kubaing petadiken ketaginmu dekket karina perlangkah julu meddemkenmu siniulakenmu mulai lot kono i Mesir. Oda nèngè mo iharapken kono gana-gana paina sambing pè barang terèngèt taba Mesir.”

²⁸Idokken JAHOWA Sintèmbul i, “Kusohken mo kono taba kalak pemoyang-moyang atè sinikecegokenmu.

²⁹Kumarna nggogo ngo atè kalak i midah kono, irampasi mo karina hasil sinikerisken panasmu. Itadingken mo kono lubus bagè perkendangen janah gabè tontonen jelma nterrem. Ketaginmu dekket luhlahmu idi ngo

³⁰memaing sempa simeroha i bamu. Gabè perkendangen ngo kono bai bangsa-bangsa, janah ilamuni ko dirimu merkitè gana-gana kalak i.

³¹Ièkutken kono ngo ulbas kakamu, kumara i dos mo hukumKu bang bamu.”

³²Idokken JAHOWA Sintèmbul i, “Kennah tellen kadè sin mangkuk kakamu. Mbelgah janah mbages ngo mangkuk i. Sin rèhè dekket risak ngo mangkuk i sikennah gongenkenmu bai karina jelma nai.

³³Mangkuk kakamu Samaria sin buradan dekket ketaluen. Enggo kessa iènum kono karina sinna mabuk mo kono janah ndersa. Nai merkitè mpustak-pustak mangkuk idi itorih-torih kono mo dagingmi. Aku, JAHOWA Sintèmbul i ngo simengeruapken i.”

³⁴

³⁵Idokken JAHOWA Sintèmbul i, “Kumara lupa kono bangku janah itondali kono Aku, kennah ndersa mo iakap kono kumara ketagien bak perkendangenkenmu.”

³⁶Idokken JAHOWA mbang aku, “Alè jelma simangko-angko, enggo ngo kebbas kono menghukum si Ohola dekket si Oholiba? Pesèngèt mo kalak i tersèngèt simeroha sienggo iulaken kalak i.

³⁷Enggo iulaken kalak i merkendangen dekket memunuh; enggo merkendangen kalak i dekket gana-gana bak memunuh dukak-dukakku sinitubuhken kalak i. Enggo ipèlèken kalak i anak-anak i taba gana-gana kalak idi.

³⁸Janah oda pellin i sambing. Ilamuni kalak i ma ngo BagesKu dekket ari Sabat sienggo Kutetapken i.

³⁹Tupung ari kalak i memunuh dukak-dukakKu dekket memèlèkensa taba gana-gana, roh mo sidua kalak merkaka-kuanggi i mi BagesKu lako mengelamuni!

⁴⁰Tolè dèng ma itengesken kalak ngo dilo-dilo taba daholi-daholi sini nagerri ndaoh, janah iuèi kalak i ngo dilo-dilo i. Lako menghalopken tamuè-tamuè i, meridi mo sidua kalak simerkaka-kuanggi i, memakè celak cilèben dekket menelluk emmas pakènna.

⁴¹Nai kundul mo kalak i i babo peratas merandal. I lebbèna lot ngo mèja dom dekket juadah-juadah, bak dahupa dekket minak zaitun sienggo Kuberèken bai kalak i.

⁴²Terdengkoh ngo i ruar nai sora mèngèr jelma nterrem mersennang-sennang. I padang gurun nai ngo idilo jelma nterrem i. Ipemasuk kalak i mo gellang mi betekken simerkaka-kuanggi i, dekket memakèken mahkota merandal i takalna.

⁴³Nai dok atèngKu mo, ‘Uè dèng ma ngo ndia kalak i mengkekelengi perkendangen sienggo ngkulsut kumarna merlangkah julu meddem?’

⁴⁴Peganci-ganci ngo kalak roh mendahi si Ohola dekket si Oholiba, sidua kalak sibabijalang siluhlah i.

⁴⁵Tapi irungguken kalak bujur mo simerkaka-kuanggi i merdangaen mi perlangkah julu meddemenken dekket memunuh, kumarna tuhu ngo kalak i salah.”

⁴⁶Idokken JAHOWA Sintèmbul i, “Dilo mo simpulungen jelma lako meniksa dekket mupusi duana sibabijalang i.

⁴⁷Belli mo kalak i ikebbekki dekket batu janah ijuhap merkitè peddang. Belli mo itebengi dukak-dukakna dekket ilekkup karina bages kalak i.

⁴⁸Kualo ngo ulah-ulah sibagidi i suberri nagerri. Gabè sèngèt-sèngèt ngo sikubaing i taba karina daberru, asa ulang nè merlangkah julu meddem bagè kalak simerkaka-kuanggi i.

⁴⁹Alè Ohola dekket Oholiba, Kuhukum mo kènè kumarna merlangkah julu meddem kènè dekket menembah gana-gana. Nai satdar mo kènè, Aku ngo JAHOWA Sintèmbul i.”