Read Batak Dairi Hesekiel 24 Bible Online

Hesekiel 24 - Batak Dairi bible

Hesekiel 24

¹I ari sipuluh bulan sipuluh, i tahun pesibahken kessa nai terbuang kami, nina JAHOWA mo mbang aku,

²“Alè jelma simangko-angko, suratken mo ari-ari sidari èn, kumarna sidari èn mo raja Babel mulai mengkubu Jerusalem.

³Aku, JAHOWA memaing sada perumpamaen lako ibagahken bai bangsangKu sidakdak memberontak; Arirken mo laè mi bagasen panci nai ampèken mi babo api.

⁴Baing mo jukut mi bagasenna jukut simendèna, sukana; jukut betekken dekket paha dekket tulan, mbuè otokna.

⁵Baing mo jukut biri-biri nggomok janah muda tambahi mo persediaen sebanna. Belli mo gurgur dekket guncang laèna belgang mo jukut i rasken tulan-tulanna.”

⁶Idokken JAHOWA Sintèmbul i, “Merjaya mo kuta sidom jelma pemunuh i! Tosè ngo kuta i bagè koden karaten siso nung iborih. Ikaruarken mo gulè silot ibagasenna singkeret-singkeret, soh mi singkeret nèngè poda lot tading.

⁷Masa mersibunuhen i kuta i, tapi oda orè daroh sinibunuhna i mi tanoh, tapi gabè mi babo batu mpihir ngo, gabè oda ndorok itamburi.

⁸Kubelli ngo daroh i i sidi asa ndorok idah dekket lako muat bèla.”

⁹Idokken JAHOWA Sintèmbul i, “Merjaya mo kuta sidom pemunuh i! Aku sendiri mo menusun seban mengelekkupsa.

¹⁰Tambahi mo sebanna! Sempuli mo apina! Belgang mo jukutna! Orèken mo kuahna. Tutung mo tulan-tulanna!

¹¹Bagèndari ampèken mo koden tembaga numar i mi babo api janah belli soh mbara bagè rara. Enggo kessa messeng karatna, mpanting nola mo koden i mengolihi mengèkutken hatoren agama.

¹²Tapi oda ngo karina karatna i salpun ipangan api.

¹³Alè Jerusalem, ulah-ulahmu siluhlah i ngo enggo mengelamuni dirimu. Enggo kucuba pepantingken kono, tapi oda lot gunana, kumarna tong ngo ko melamun. Oda nèngè mpanting kono mengolihi soh mi Kupepulak pungurKu bamu.

¹⁴Aku, JAHOWA Sintèmbul i ngo sienggo mongkam. Enggo dapet katikana bangKu lako mertindak. Oda kulupaken dosamu janah oda ma kuampuni barang mermasèh atè midah kono. Ihukum mo ko rembang mi karina pengelakomu. Aku, JAHOWA Sintèmbul i ngo sienggo mendokken i.”

¹⁵Nina JAHOWA mbang aku,

¹⁶“Alè jelma simangko-angko, sintempu mo Kualeng jelma sinikekelengen atèmu kalohon. Tapi oda ndorok ko menderko barang tangis, barang memelli èluhmu merkenner.

¹⁷Ulang sanga terdengkoh semep-semepmu. Ulang ko merdalan kum mak mertangkuluk, barang oda merlapik nènèh, bagè kalak simerhendem. Ulang ma sangkemmi abèmu, janah ulang pangan nakan pengari-ngari tendi.”

¹⁸Sicegenna aku mengerana taba bangsa i nai bernginna matè mo sinibagesku. Sibarembenkenna kuulaken mo kadè siniperèntahkenna bangku.

¹⁹Ikusoken jelma nterrem mo, “Kasa bagi ibaing kono alè tuan? Kadè ngo lapatenna i bai nami?”

²⁰Nai ningku mo taba kalak i, “JAHOWA ngo pasulakken aku

²¹memagahken tennah èn taba kènè: Ibanggaken kènè ngo keteg- guhen Bages JAHOWA. Lemmo ngo atè ndènè menengen dekket mendahi, tapi ilamuni JAHOWA mo BagesNa. Janah kadè-kadèmu sitermudana, sitadingna i Jerusalem, ibunuh mo tupung geraha.

²²Nai ibaing kènè mo bagè sikubaing bagèndari. Oda ma mo isangkemmi kènè abè ndènè barang mangan nakan pengari-ngari tendi.

²³Oda ma mo merdalan kènè mak mertangkuluk barang merlapik nèhè, oda menderko barang tangis. Makin mpersukna mo iakap kènè kumarna dosa-dosa ndènè; dak mersisel-sellen mo sisada taba sidèban.

²⁴Nai aku, si Hesekiel gabè codien bai ndènè; ibaing kènè ma mo bagè sikubaing bagèndari. Idokken JAHOWA, mula masa i, satdar mo kènè Ia ngo JAHOWA Sintèmbul i.”

²⁵Nina JAHOWA mbang aku, “Asa, alè jelma simangko-angko, Kubuat mo bai kalak i nai BagesKu sintegguh i, sienggo ibanggaken bak ikeloloken kalak i, dekket sinitengen bak sinidahi kalak i ibagasen sampang atè. Nai Kualeng ma mo dukak-dukak kalak i.

²⁶Tupung ari Kupesaut i, roh mo sada kalak simaluah i kemagoen i nai, memagahken berita i bamu.

²⁷Arinkenna i ma mo kono ndorok mongkam mengolihi, janah oda nè pekkak. Nai mengerana mo ko dekket kalak i. Bagi mo carana kono gabè tanda-tanda bai kalak i; nai satdar mo kalak i Aku ngo JAHOWA.”