Read Batak Dairi Hesekiel 25 Bible Online

Hesekiel 25 - Batak Dairi bible

Hesekiel 25

¹Idokken JAHOWA mbang aku,

²“Alè jelma simangko-angko, sumpahi mo nagerri Amon.

³Dokken mo bangsa i mendengkohken kadè sikudokken, JAHOWA Sintèmbul i taba kalak i, ‘Lolo ngo kènè mengidah ilamuni BagesKu dekket icèdai tanoh Israel bak iangkut bangsa Jahudi mi buangen.

⁴Kumara i Kubelli mo kènè italuken marga-marga bangsa i gurun Kebincaren nai. Ipajek kalak i mo perundung-undungen i nagerri ndènè nai menettap mo kalak i i sidi. Ipangani kalak i mo buah suan-suanen ndènè dekket mengènum susu pinakan ndènè.

⁵Kuobah mo kuta Raba gabè bekkas mermakan unta, janah karina nagerri Amon gabè bekkas mermakan biri-biri. Nai satdar mo kènè, Aku ngo JAHOWA.’ ”

⁶Idokken JAHOWA Sintèmbul i, “Mengkurpak-kurpak tangan ngo kènè ninganna tumatak mersampang atè. Oda ngo lot iètong kènè tanoh Israel.

⁷Kumara i Kusohken mo kènè taba mèduk bangsa simengerampok dekket mengerampasi karina milik ndènè. Kuripasken mo kènè bagi, gabè oda nèngè terètong bagè sada bangsa janah oda nè ma mertanoh sendiri. Nai satdar mo kènè, Aku ngo JAHOWA.”

⁸Idokken JAHOWA Sintèmbul i, “Nina kalak Moab ukum Juda i dos ngo bagè bangsa-bangsa sidèban i.

⁹Kumerna i kubelli mo kuta simempertahanken baleng nagerri Moab ijuhap musuh bagi dekket kuta simendèna, imo: Bet-Jesimot, Baal-Meon dekket Kiryataim.

¹⁰Kubelli mo suak-suak bangsa i gurun kebincaren nai menaluken Moab rasken dekket nagerri Amon, asa ulang nè Moab i merumangken sada bangsa.

¹¹Kuhukum mo Moab, nai satdar mo kalak i aku ngo JAHOWA.”

¹²Idokken JAHOWA Sintèmbul i, “Enggo iulaken bangsa Edom kesalahen mbellen, kumarna kejam ibaing taba Juda, bagè pemaing bales dendam.

¹³Kumara i Kutingtingken, Kuhukum mo Edom janah kubunuh mo gennep jelma dekket nasa pinakan sinisidi. Karina nagerri i, mulai i kuta Teman nai soh mi Dedan kubaing longo-longoen; matè mo karina pengisina i pergerahaen.

¹⁴Kupakkè mo bangsangKu Israel lako bales dendam taba Edom, nai ibaing mo taba Edom rembang mi ntengamna lagangKu. Asa satdar Edom bakunè rasana gabè sasaren lagangKu. Aku JAHOWA Sintèmbul i ngo simendokken i.”

¹⁵Idokken JAHOWA Sintèmbul i, “Enggo bales dendam kejam kalohon kalak Palistin taba musuh mbellen kalak i dekket membinasaken kalak i ibagasen nggogo.

¹⁶Kumara i Kutingtingken mo magahken Kujuhap mo kalak Palistin i janah kubinasaken mo kalak i. Gennep lot dèng jelma tading i biding laut Palistin kennah Kubunuh.

¹⁷Mberrat kalohon ngo hukumku taba kalak i dekket pepulakken dendamKu soh polih. Iakapi kalak i kessa mo lagangKu, satdar mo kalak i, Aku ngo JAHOWA.”