Read Batak Dairi Hesekiel 26 Bible Online

Hesekiel 26 - Batak Dairi bible

Hesekiel 26

¹I ari sada bulan tertentu tahun pesipuluhsadaken mulai tikki terbuang kami, mengerana mo JAHOWA mbang aku, nina mo,

²“Alè jelma simangko-angko, enggo mersurak-surak pengisi Tirus ninganna mendokken, ‘Enggo melala Jerusalem! Oda lot nè pengaruhna i pertiga-tigaen! Oda nè ngo saingenta ia!’ ”

³Idokken JAHOWA Sintèmbul i, “Musuhmu ngo aku, alè Tirus! Kuarak mo nterrem bangsa lako menjuhap ko, janah tosè bagè galombang laut ngo pekeroh kalak i.

⁴Irumpakken kalak i mo pagar-pagarmu dekket irumpakken mo pantar palasmu. Kusapu mo karina tanoh silot i sidi gabè pellin sada batu mpihir nai ngo kessa tading i tengah laut.

⁵Icinar perikan mo jalana i babo batu i. Aku, JAHOWA Sintèmbul i ngo simendokken i. Gabè jerngemmen bai mèduk bangsa mo Tirus.

⁶Gabè penamun dekket pemunuh pengisi kuta silot i tanoh Tirus mo kalak i. Nai satdar mo pengisi Tirus, Aku ngo JAHOWA.”

⁷Idokken JAHOWA Sintèmbul i, “Kuembah mo Raja Nebukadnezar i Babel nai lako menjuhap ko alè Tirus. Roh mo raja simergegoh kalohon idi i utara nai merde- ngan nterrem soridadu, dekket mbuè kuda bak kurèta perang dekket soridadu merkuda.

⁸Ibunuhi mo pengisi karina kuta i tanoh mbellang tupung geraha i. Ikurak musuh mo parik-parik pertahanen, itèmbun mo pagar pengkubuen janah isusun mo tambeng-tambeng mbellang, ibaing kalak i mo i mahan bèntèng mengalo kono.

⁹Irumpakken kalak i mo pagarmu merkitè perkekkas pengerumpak dekket memulakken pantar palasmu merkitè palu-palu bessi.

¹⁰Mbuè kalohon ngo kuda kalak i, gabè merkabangen mo abu ibaing perderapna menangkemmi ko. Sora gerupuh soridadu merkuda mengeruah kurèta bekkas bekkel dekket kurèta perang mendegger pagar kutamu tikan ibellus kalak i pèntu pengkeruhen janah masuk mi kuta sienggo merpagar i.

¹¹Menjuhap mo soridadu merkuda idi i dalan-dalanmu ninganna memunuh pengisimu merkitè peddang. Tugu-tugumu sipasek janah ntegguh idi ipengerumpakken.

¹²Irampasi musuh-musuhmu idi mo karina harta kinibèak dekket tiga-tigamu. Ipembulakken kalak i mo pagarmu janah ipengerumpakken bagesmu mèbah i. Ibuati kalak i mo batuna, papan dekket tanohna, nai ipengambongken mi laut.

¹³Kupetadi mo karina endè-endèmu dekket oning-oning kucapimu.

¹⁴Pellin sada batu mpihir nai ngo kessa Kutadingken, mahan bekkas perikan mencinar jala kalak i. Oda nèngè ipekadè kuta i. Aku, JAHOWA Sintèmbul i ngo sienggo mengerana.”

¹⁵Idokken JAHOWA Sintèmbul i taba kuta Tirus, “Menggirgir buradan mo pengisi aur biding laut idengkoh kessa surak ketalunmu dekket uo-uo kalak sidang igerbengi.

¹⁶Mengi- dah nasipmu i, gabè kèkè mo i tahtana nai raja-raja ibas bangsa-bangsa sinibiding laut nai, menalkasi jubah kesangapen dekket baju mersulam kalak i, nai kundul menggirgir i tanoh. Buradan kalohon mo kalak i gabè oda terbaingsa nè tennang.

¹⁷Nai iendèken kalak i mo bamu endè mengkubur èn: Enggo mo melala kuta siterpoji! Karina keppelna isapu i laut nai. Pengisina i kin merkuasa i laut memaing mbiar pengisi biding laut.

¹⁸Bagèndari, tupung ari kono italuken, menggirgir ngo pengisi pulo. Tersengget ngo kalak i karina mengidah permelalamu siso terkira.”

¹⁹Idokken JAHOWA Sintèmbul i, “Kubaing mo kono longo-longoen, bagè kuta siso lot pengisina. Kusangkemmi mo kono dekket laè i dasar laut nai.

²⁰Nai Kutengesken mo kono mi dunia kalak simatè asa rebbak dekket kalak siarnia. Kubelli mo kono hot i dunia kalak simatè i, i tengah rumpak-rumpak simenettap, rebbak dekket kalak sienggo matè. Nai tanohmu pè oda i iani nèngè, janah kono pè oda nè terbilang i jelma nggelluh.

²¹Kubaing mo kono codien mengeriken, janah idi mo punca tarombomu. Itulusi dèba mo ko, tapi oda dapetsa nè kono. Aku, JAHOWA Sintèmbul i ngo simendokken i.”