Read Batak Dairi Hesekiel 27 Bible Online

Hesekiel 27 - Batak Dairi bible

Hesekiel 27

¹Idokken JAHOWA Sintèmbul i mbang aku, “Alè jelma simangko-angko, endèken mo endè mengkubur èn bai Tirus, kuta i biding laut simertiga-tiga dekket pengisi karina biding laut: Alè Tirus, ibagasen jukkat kono mengerana, ‘Sondel ngo kinimberrungku!’

⁴Tosè bagè sapo ngo laut i bamu. Ibahan ngo ko bagè keppel merandal.

⁵Dingdingmu kayu ares Delleng Hermon tihang layarmu kayu mpiangi i Libanon nai.

⁶Kayuh-kayuhmu ibahan ipas kayu mbellen i Basan nai. Geladakmu ibahan i kayu sempènur nai, asalna i pulo Siprus nai, hiasenna okiren gading maharga.

⁷Layar bak tandamu kaèn linen sinitenun Mesir, mermatcam bagè sulamen. Halus kalohon ngo bennang tèndamu, kaèn i Siprus nai mbara mesiap rupana.

⁸Pengkayuhmu kalak Sidon dekket Arwad. Anggotamu sendiri perlaut-perlaut pandè.

⁹Tukkang-tukkang kayu sikarèjo i keppel imo tukkang-tukkang kalak Gebal. Merrohen keppel i suberri nagerri nai naing memaing perdemuen tiga-tiga.

¹⁰Soridadu Persia, Lidia dekket Libia nai masuk soridadumu. Isangketken kalak i mo tambeng-tambeng dekket tangkuluk wajana i pagar kutamu. Enggo iurupi kalak i menaluken musuh gabè menambahi ketermurmurenmu.

¹¹Soridadu i Arwad nai mertaram i parik-parikmu; pantar palasmu ijaga kalak i Gamad nai. Tergantung ngo tambeng kalak i merdèrèt ipas pagarmu. Kalak i mo mencukupi kinimendèmu.

¹²Idèai kono mo tiga-tigamu simbuè idi i Spanyol, janah pirak ngo ijalo kono gararna, bessi, cemberrah putih dekket cemberrah mbèrèng.

¹³Mertiga-tiga ma ngo ko i Junani, i Tubal dekket i Mesekh, janah gararna ijalo kono bai kalak i nai hamba dekket barang ipas suasah nai.

¹⁴Itumbangken kono mo barangmu mi kuda kurèta, kuda tunggang dekket kalodè i Bet-Togarma nai.

¹⁵Pengisi Rodus pè mertiga-tiga ma ngo dekket kono janah pengisi aur biding laut menokori barang tiga-tigamu bak gading dekket kayu mbèrèng.

¹⁶Pertiga-tiga i nagerri Siria nai menokori barang tiga-tigamu dekket hasilmu simbuè i. Igarar kalak i mo dekket batu zamrud, kaèn mbalo, kaèn mersulam, linen halus, permata batu koral nai, dekket batu mbara ndalima.

¹⁷Kalak Juda dekket Israel menukar barang tiga-tigamu dekket pagè, tenggoli, minak zaitun dekket rempah-rempah.

¹⁸Pengisi Damaskus menokor barang tiga-tigamu dekket hasil-hasilmu janah igarar dekket anggur i Helbon nai, buk biri-biri i Sahar nai, bessi teppaen dekket rempah-rempah.

²⁰Pengisi Dedan menggar barang-barangmu dekket kaèn pelano.

²¹Kalak Arab dekket sidasa tanoh Kedar menokor barang-barangmu dekket anak biri-biri, biri-biri tonggal dekket kambing.

²²Kalak pertiga-tiga i Syeba dekket Raema nai merembah permata, lako menokor barang-barangmu, imo emmas dekket rempah-rempah simendèna kalohon.

²³Kuta Haran, Kane, Eden, saudagar-saudagar i Syeba nai, kuta Assur dekket Kilmad, karinana mertiga-tiga dekket kono.

²⁴Idèa kalak i ngo bamu pakèen maharga, kaèn mbalo, kaèn mersulam, belagen kettang mermatcam bagè dekket tinali-tinali ntegguh.

²⁵Barang tiga-tigamu iembah ibas keppel merotor mbelgah-mbelgah. Tosè bagè keppel sarat embahenna ngo ko, keppel simeneberangi i laut mbellang.

²⁶Iembah pengkayuh mo ko mi tengah laut. Ipuyu angin kebincaren ganas i mo ko.

²⁷Karina nasa barang tiga-tiga embahenmu karina perlaut dekket anggotamu, karina tukkang kayu dekket saudagarmu, gennep soridadu i keppel i, karina kalak i mersep terneknek tikan karam kono.

²⁸Mersurak derko-derko mo pelaut-pelautmu kerna buradan uo-uona merginoling i biding laut.

²⁹Itadingken mo keppel i bagèndari, karinana perlautmu laus mi darat.

³⁰Itangisi kalak i mo nasipmu, kekelsohen dekket tangis milangi melui kalohon. Icircirken kalak i mo cirabun mi takalna janah mergoling-goling ipas abu tanda bonek.

³¹Kumernaken kono, icukur kalak i takalna memakè abit goni dom arsak. Tangis mali-ali mo kalak i ninganna menangisi nasipmu.

³²Nai iendèken kalak i mo sada endè mengkubur, ‘Alè Tirus isè mo bagè ko? Alè Tirus, nono ngo kono bagèndari i Laut.

³³Tikan mengagahi laut kono dekket embahenmu mersensen, icukupi kono ngo keperluen bangsa-bangsa; raja-raja pè bèak ngo ibaing ko.

³⁴Bagèndari enggo karam ko, melala i dasar laut. Karina anggotamu dekket karina barang bennè rasken kono i tengah laut.’

³⁵Karina simerian i biding laut gontar mendengkoh nasipmu. Raja-raja kalak i pè buradan kalohon; teridah ngo mbiar ipas abèna.

³⁶Mersep mo ko soh mi sidekkah-dekkahna. Pertiga-tiga i suberri dunia gabè gontar kerna mbiar mengakapi nasip bagidi.”