Read Batak Dairi Hesekiel 28 Bible Online

Hesekiel 28 - Batak Dairi bible

Hesekiel 28

¹Idokken JAHOWA mo mbang aku,

²“Alè jelma simangko-angko, bagahken mo taba raja Tirus, kadè sikudokken, Aku JAHOWA Sintèmbul i bana, ‘Ibagasen sombong, iètong ko ngo dirimu sembahen mertahta i tengah-tengah laut. Ndorok sambing ngo ko merlagak bagè sembahen, tapi èngèt mo, pellin jelma biasa ngo ko.

³Pandèen ngo ko dok atèmu daripada si Danel, gabè oda lot rusia mboni bamu.

⁴Ipakkè kono ngo kepantasen dekket pemettohmu lako pepulungken harta, emmas dekket pirak.

⁵Tuhu pandè ngo ko mertiga-tiga, janah enggo kaya jong bagèndari, janah kinibèakmu i memaing ko jukkat!’ ”

⁶Idokken JAHOWA Sintèmbul i, “Alè Tirus, kumarna iètong ko dos ko dekket Dèbata,

⁷kutenges mo soridadu sidèban kejam ka- lohon lako menjuhap ko. Ilala kalak i mo karina kegegahen sienggo dapet ko kumarna kepantasen dekket pengarusimu.

⁸Ibunuh janah ikubur mo ko ibagasen laut.

⁹Asa, mula dapet tikkina i, terdokken kono dèng ngo kono Dèbata? I lebbè simemunuh ko, teridah mo ntangkas, ukum kono jelma biasa sambing.

¹⁰Matè mo ko bagè jelma merlèa kumarna ibunuh jelma sidèban siso menandai JAHOWA. Aku, JAHOWA Sintèmbul i ngo mendokken i.”

¹¹Idokken JAHOWA dèng ma mbang aku, nina mo,

¹²“Alè jelma simangko-angko, tangisi mo raja Tirus. Bagahken mo kadè sinaing dokenkenku, Aku, JAHOWA Sintèmbul i tabasa. ‘Nung ngo kono gabè pertanda sondel kinimendè; arnia bijak kalohon janah maholi ngo ko!

¹³Merian i Eden ngo ko, i pekken Dèbata. Pakènmu ibaing mermatcam bagè permata: Batu ndalima dekket intan, kessap, batu pirus, batu jaspis, ratna, cempaka, batu nilam, zamrud dekket batu alkali mbara. Emmasmu pè mbuè. Ibahan ngo barang-barang i lako bamu tikanna ihanaken kono.

¹⁴Malaèkat ntengam Kubaing i sidi lako menjaga kono. Merian i babo dellengKu simbadia ngo ko janah merdalan i tengah-tengah batu permata merkillok-killok.

¹⁵Sondel ngo kinimendè pekilakomu kessa nai kono ihanaken soh mi mulai kono memaing jahat.

¹⁶Lalap ngo kono merdèa menokor, janah idi mo mabai kono mi kekerasen dekket dosa. Nai Kupelaus mo ko i dellengKu simbadia nai janah malaèkat penjagamu memuari kono i tengah-tengah permata simerkillok-killok i nai.

¹⁷Rupamu maholi i memaing kono jukkat dekket ketermurmurenmu memaing kono mengulaken kemotoen. Kumara i Kusampetken mo ko mi tanoh janah Kubaing i gabè sèngèt-sèngèt taba raja-raja sidèban.’ ”

¹⁸Idokken JAHOWA, “Alè Tirus, ilamuni kono ngo bekkasmu mersembah kumarna kesalahen-kesalahen dekket pengkilangmu sinderrang merdèa menokor. Kumara i Kulekkup mo ko asa gabè rata dekket tanoh. Karina kalak simenengen kono pellin cirabun nai ngo kessa idah.

¹⁹Enggo mersep kono soh mi amman sumendah. Gabè bu- radan mo karina bangsa simenandai ko bana mbiar mengakapi nasip sibagidi.”

²⁰Idokken JAHOWA mo mbang aku,

²¹“Alè jelma simangko-angko, sumpahi mo kuta Sidon.

²²Bagahken mo taba pengisina, Aku, JAHOWA Sintèmbul i mendokken taba kalak i, ‘Musuhmu ngo aku alè Sidon. Ipoji karina jelma mo Aku kumernaken pemalessenKu bamu. Tikan Kuhukum pengisimu, satdar mo kalak i, Aku ngo JAHOWA Simbadia i.

²³Kupesempa mo sakit uabba, janah kubelli mo daroh marir i dalan-dalanmu. Ijuhap musuh mo ko i dèsa siualuh nai, janah ibunuh mo pengisimu. Nai satdar mo ko Aku ngo JAHOWA.’ ”

²⁴Idokken JAHOWA mo, “Nagerri-nagerri cibal baleng sinung mengelèai Israel oda ngo bagè dori menurahi Israel. Satdar mo kalak i, Aku ngo JAHOWA Sintèmbul i.”

²⁵Idokken JAHOWA Sintèmbul i, “Kupepulung mo kalak Israel i nagerri-nagerri ndaoh nai, i bekkas kalak i Kupesompar-baèrken nai, janah suberri bangsa mo memettoh, simbadia ngo Aku. Gabè merian i tanohna sendiri nola mo bangsa Israel, tanoh sienggo Kuberèken bai naposongKu si Jakob.

²⁶Mènak mo nggelluh kalak i i sidi dekket memajekki bages bak mengula pekken anggur. Kuhukum mo karina cibal baleng kalak i sienggo mengelèai kalak i, asa gabè mènak Israel. Nai satdar mo kalak i, Aku ngo JAHOWA Dèbatana.”