Read Batak Dairi Hesekiel 29 Bible Online

Hesekiel 29 - Batak Dairi bible

Hesekiel 29

¹I ari sipuluh dua bulan sipuluh, i tahun pesipuluhken terbuang kami, idokken JAHOWA mo mbang aku,

²“Alè jelma simangko-angko, pincang mo raja Mesir. Dokken mo mbangsa, ihukum mo ia dekket karina kalak Mesir.”

³Ipasulak JAHOWA Sintèmbul i mo aku menohken taba raja Mesir tennahna èn, “Musuhmu ngo aku, alè buaya mbellen sigempang i tengah laè. Ibualken kono ngo milikmu nimu Laè Nil janah ko nimu memahan i.

⁴Kubaing mo kail ipas bergengmu janah kuleketken mèduk ikan i sisikmu. Nai Kutarik mo ko karuar i Laè Nil nai dekket karina ikan silekket i sisikmu i.

⁵Nai kukebekken mo ko dekket karina ikan i mi padang gurun. Tertembem mo dagingmu mi tanoh janah gampar i sidi. Isè poda lot mengkubur ko. Kuberèken mo dagingmu bai manuk-manuk dekket binatang-binatang sidèban asa ipangani.

⁶Nai satdar mo karina pengisi Mesir, Aku ngo JAHOWA.” Idokken JAHOWA, “Alè bangsa Mesir! Iharapken kalak Israel ngo pengurupinmu, tapi keppè bagè tongket melèah sambing ngo ko kessa.

⁷Tikan tunandè kalak i bamu, mbohok mo ko janah menjuluk kikik kalak i, gabè sihit mo burung-burung kalak i.

⁸Kumara i Aku, JAHOWA Sintèmbul i mendokken mbang ko, Kutenges mo soridadu menjuhap ko merkitè peddang, dekket memunuh pengisi bak pinakanmu.

⁹Gabè tanoh longo-longoen mo Mesir. Nai satdar mo kènè Aku ngo JAHOWA.” Idokken JAHOWA, “Alè raja Mesir! Kumarna idokken kono milikmu nimu Laè Nil janah kono nimu simemahan i,

¹⁰nai gabè musuhmu mo Aku, dekket musuh Laè Nilmu i. Suberri Mesir Kubaing gabè tanoh longo-longoen, mulai i kuta Migdol nai i utara soh mi kuta Aswan i selatan, soh mi perbalengen Sudan.

¹¹Oda lot memellus i sidi, jelma barang binatang pè. Sidekkah empatpuluh tahun oda uè jelma mengianisa.

¹²Kubaing mo Mesir longo-longoen, dungna i tengah-tengah nagerri-nagerri melongo sidèbanna i, Mesir mo simelongona kalohon. Sidekkah empatpuluh tahun kuta silot i Mesir dosken rumpak-rumpak, ndaoh mparahen daripada rumpak-rumpak kuta paina sambing pè. Gabè kalak pengusi mo Kubaing bangsa Mesir. Mambur mèrap mo kalak i mi suberri aur janah merian itengah-tengah bangsa sidèban.”

¹³Idokken JAHOWA Sintèmbul i mo, “Alè bangsa Mesir, enggo kessa leppas siempatpuluh tahun i, Kuembah nola ngo kènè balik i nagerri-nagerri bekkas ndènè mèrap i nai.

¹⁴Kupesuang mo kènè balik janah Kusuruh merian i Mesir kan selatan, tanoh lebbuhmu i. I sidi mo kènè memajek kerajaen tapi ndotè,

¹⁵sindotèna kalohon i suberri dunia. Ndotè kalohon mo kènè kubaing, gabè oda nè terbaing kènè memerèntah bangsa sidèban barang pè mengasangi taba kalak i.

¹⁶Oda nè mo mengido urup Israel bamu. Nasipmu alè Mesir gabè pesèngètken Israel, bakunè pilitna mengasangken Mesir, bagè sienggo nung iulaken. Nai satdar mo Israel, Aku ngo JAHOWA Sintèmbul i.”

¹⁷I ari sada bulan sada tahun peduapuluhken terbuang kami, idokken JAHOWA mo mbang aku,

¹⁸“Alè jelma simangko-angko, roh mo Raja Nebukadnezar i Babel nai menjuhap Tirus. Idokken mo soridaduna merembah boban-boban mberrat kalohon, sanga mpalpal buk kalak i dekket bara kalak i pè meletcih, tapi raja bak soridaduna, kadè poda dapet kalak i hasilna arap kelejanna i.

¹⁹Kumerna i, Aku JAHOWA Sintèmbul i mendokken: Kuberèken mo tanoh Mesir bai Raja Nebukadnezar. Ipupusi bana irampasi janah iembah mo karina kinibèak Mesir mahan upah soridaduna.

²⁰Tanoh Mesir mo Kuberèken bana, mahan bales jasa-jasana, kumerna enggo mengula soridaduna lako bangKu. Aku, JAHOWA Sintèmbul i ngo mendokken i.

²¹Masa kessa mo i, Kubaing mo Israel gabè bangsa mergegoh, dekket memaing kono alè Hesekiel ndorok bèbas mengerana, asa karina jelma ndorok mendengkohken ranamu. Nai satdar mo kalak i, Aku ngo JAHOWA.”