Read Batak Dairi Hesekiel 3 Bible Online

Hesekiel 3 - Batak Dairi bible

Hesekiel 3

¹Nina JAHOWA, “Alè jelma simangko-angko, pangan mo lapihen mergolong èn, nai berkat mo ko lako mengerana mendahi kalak Israel.”

²Nai kupengangang mo babahku, janah iberèken JAHOWA mo lapihen mergolong i bangku asa kupangan.

³Nina dèng ma, “Alè jelma simangko-angko, pangan mo! Sini mo beltekmu merkitè lapihen mergolong èn.” Nai kupangan mo lapihen i janah ntenggi ngo rasana bagè tenggoli.

⁴Idokken JAHOWA dèng ma, “Alè jelma simangko-angko, dahi mo kalak Israel janah bagahken mo karina tennahKu èn taba kalak i.

⁵Mendahi kalak i ngo kono Kupasulak, oda ngo mendahi bangsa sulit mengarusi katana, laèn janah oda iantusi kono. Ukum mendahi bangsa sibagidi kin kono Kupasulak, idengkohken ngo ranamu.

⁷Tapi bangsa Israel oda uè mendengkohken kono, salang Aku oda isarihken. Jèngèng ngo kalak i karina janah mengalo-ngalo.

⁸Kono pè Kubaing ma mo jèngèng janah liskat bagèndari bagè kalak i.

⁹Kubaing mo ko bagè ntegguh batu karang dekket bagè mpihir batu intan. Ulang ko mbiar midah pemberontak i.”

¹⁰Nai idokken JAHOWA dèng ma, “Alè jelma simangko-angko, perdatèken mo selloh janah èngèt karina sinaing Kudokken bamu.

¹¹Dahi mo bangsamu siterbuang i, janah bagahken mo, Aku JAHOWA Sintèmbul kalohon i mendokken taba kalak i, tah uè kalak i mendengkohken barang oda.”

¹²Nai idokong Tendi JAHOWA mo aku janah kudengkoh mo i podingku sora merdeggur mendokken, “Poji mo kemuliaen JAHOWA sini sorga!”

¹³Kudengkoh mo sora kabeng singgelluh i pedegges mersihantuken, dekket sora kumeratak daling-daling i bagè nggang sora rènur.

¹⁴Roh mo kuasa JAHOWA mendahi aku mahantu kalohon, janah sidang idokong bak iembah tendina i aku, bagè mpeggul janah nggara mo kuakap atè-atèngku.

¹⁵Nai soh mo aku mi bekkas buangen i Tel-Abib i biding Laè Kebar. Pitu ari dekkahna aku merian i sidi; dak nono ngo aku kumernaken karina sikudengkoh dekket sikuidah i dèng i.

¹⁶Enggo kessa pitu ari, idokken JAHOWA mo taba aku,

¹⁷“Alè jelma simangko-angko, Kupebangkit mo kono gabè penjaga bangsa Israel. Pesakat mo bai kalak idi sèngèt-sèngèt siKuberèken ènda.

¹⁸Mula Kubagahken kessa matè mo sada kalak perjahat, tapi keppè oda ipesèngèt kono ia asa iobahi pengelakona asa maluah ia, nai matè mo ia tong bagè sada kalak simerdosa, janah tanggung jabab permatèna i ituntut bamu nai.

¹⁹Mula ipèsèngèt ko ngo kalak perjahat i janah oda uè ia mentadi mengulaken jahat, matè mo ia bagè kalak perdosa, tapi ukum kono sendiri maluah ngo.

²⁰Mula itebenai sada kalak bujur mer- pengelako mengulaken dosa, janah Ku- pehadep ia serrang mara, nai matè mo ia mula oda ipesèngèt ko. Matè mo ia kumernaken dosa-dosana, janah oda kupèngèt-èngèt karina pemahanna siso selloh idi. Tapi tanggung jabab ibas permatèna idi kennah Kutuntut bamu nai.

²¹Mula ipesèngèt kono ngo kalak bujur merpengelako idi asa ulang mengulaken dosa, janah iuèi ia peddahmu, nai oda mo hukumenku ia janah ma maluah mo kono.”

²²Kurasaken ngo gegoh pekiroh JAHOWA janah kudengkoh Ia mendokken taba aku, “Kèkè mo ko, janah laus mo ko mi lembeng. Naing mengerana ngo Aku bamu i sidi.”

²³Nai laus mo aku mi lembeng, kuidah mo i sidi ncihur merkillok-killok peteridahken pekiroh JAHOWA, bagè sienggo kuidah i biding Laè Kebar. Nai geppah tangkep mo aku mi tanoh,

²⁴tapi ibengketti janah ipekèkè Tendi JAHOWA mo aku. Idokken JAHOWA mo mbang aku, “Balik mo ko janah kurungi bamu i bages.

²⁵Alè jelma simangko-angko, ièkèti mo ko dekket tinali gabè oda terbaing ko karuar bak oda terbakin pejumpa dekket jelma.

²⁶Nggoh mo kubaing dilahmu gabè oda terbaing ko pesèngètken bangsa pemberontak èn.

²⁷Sikali èn, mula mengerana nola Aku bamu janah mengolihken asa ndorok ko mengerana, kennah bagahenkenmu kadè sienggo kudokken, Aku JAHOWA Sintèmbul i taba kalak i. Dèba mo kalak i mendengkohken, tapi dèba nai oda, kumara bangsa pemberontak ngo kalak i.”