Read Batak Dairi Hesekiel 30 Bible Online

Hesekiel 30 - Batak Dairi bible

Hesekiel 30

¹Idokken JAHOWA dèng ma,

²“Alè jelma simangko-angko, meralamat mo ko janah bagahken taba bangsa Mesir, kadè sinaing dokenkenku, Aku JAHOWA Sintèmbul i taba kalak i. Muo-uo janah tangisken mo bagèen: Nong alè, enggo ndessing ari JAHOWA! Ndor nè mo ia memales. Gellap ngo ari janah merremmang tikan menjalo hukumen bangsa-bangsa.

⁴Sempa mo olpek taba Sudan. Lot mo geraha i Mesir. Mèduk mo jelma mermatèen suberri aur ipupusi janah irumpakken.

⁵Terbunuh ma mo i geraha i soridadu upahen i Sudan, Lidia, Libia, Arab, Kub dekket i bangsangKu nai.”

⁶Idokken JAHOWA Sintèmbul i, “I Migdol i utara nai soh mi Aswan i selatan, karina dengan simengurupi Mesir mermatèen ibas geraha. Janah soridadu Mesir sijukkat i pè kerri sompar-baèr. Aku JAHOWA Sintèmbul i ngo simendokken i.

⁷Gabè longo-longoen mo nagerri i i tengah-tengah nagerri-nagerri melongo sidèbanna i, janah kutana pè gabè merumpak.

⁸Mula enggo kessa Kulekkup Mesir dekket karina simengurupisa, satdar mo kalak i, Aku ngo JAHOWA.

⁹Mula enggo kessa dapet ari i, janah enggo melala Mesir, Kutenges mo utusen-utusen dekket keppel-keppel lako menengget kalak Sudan siso mergèrmet i. Tuhu-tuhu ngo, roh mo ari i!”

¹⁰Idokken JAHOWA Sintèmbul i, “Kupakkè mo Raja Nebukadnezar i Babel nai lako menudahi kinibèak Mesir.

¹¹Roh mo si Nebukadnezar rasken soridaduna siso menandai jerra dekket mengelala tanoh i. Ijuhap kalak i mo Mesir dekket peddang, janah merdaraken mo bangkè i nagerri i.

¹²Kukerahi mo Laè Nil janah menohken suberri Mesir taba jelma-jelma jahat. Kalak sidèban pè Kupasulak mo mengerabbatken karina nagerri i. Aku, JAHOWA ngo simendokken i.”

¹³Idokken JAHOWA Sintèmbul i, “Kureppuk mo karina gana-gana dekket sembahen i Memfis. Oda nè mo lot raja i Mesir. Kubaing mo buradan karina pengisina.

¹⁴Karina Mesir Selatan Kubaing gabè longo-longoen dekket kuta Soan sini utara Kulekkup. Tebe kuta sabungen i pè naing Kuhukum mo,

¹⁵janah kinibèakna i pè naing Kusalpuni mo. Kupacidah mo lagangKu taba Pelusium, imo kuta bèntèng Mesir,

¹⁶janah kuta i pè gabè sengsara kalohon. Tuhu-tuhu ngo naing Kulekkup Mesir. Pagar batu kuta Tebe pè merumpak mo janah iremrem laè mo kuta i.

¹⁷Mermatèen i geraha i mo anak perana kuta Heliopolis dekket Bubastis, janah itaban mo daberru-daberru.

¹⁸Tikan Kudungi kerajaen Mesir dekket kubuat kuasana sinigegahkenna i, itungkupi sigellap mo Tahpanhes janah itaban mo daberru-daberru.

¹⁹Bagi mo carana Aku menghukum Mesir, nai satdar mo kalak i Aku ngo JAHOWA.”

²⁰I ari pitu bulan sada tahun pesipuluhsadaken terbuang kami, idokken JAHOWA mo mbang aku,

²¹“Alè jelma simangko-angko, enggo Kubohok betekken raja Mesir, janah oda lot memalut betekkenna i barang mengalunsa asa njuah dekket gabè mergegoh mengolihi menjèmak peddang.

²²Aku JAHOWA Sintèmbul i mendokken: Musuh raja Mesir ngo aku, janah naing Kubohok mo duana betekkenna, simergegohna dèng dekket sienggo mbohok i pè. Nai ndabuh mo peddang i i tanganna nai.

²³Kusompar-baèrken mo kalak Mesir mi suberri dunia.

²⁴Nai Kupergegohi mo betekken raja Babel, janah Kubaing peddangKu mi tanganna. Tapi ukum betekken raja Mesir Kubohok ngo, nai mendeherreng mo ia janah matè i hadeppen raja Babel, musuhna i.

²⁵Tuhu-tuhu ngo, kupeloppè mo raja Mesir, ukum raja Babel Kupergegohi. Kuberèken kessa mo peddangKu bana, janah iasaken taba Mesir, satdar mo kalak i, Aku ngo JAHOWA.

²⁶Kusompar-baèrken mo kalak Mesir mi suberri dunia. Nai satdar mo kalak i, Aku ngo JAHOWA.”