Read Batak Dairi Hesekiel 31 Bible Online

Hesekiel 31 - Batak Dairi bible

Hesekiel 31

¹I ari sada bulan tellu tahun pesipuluhsadaken terbuang kami, idokken JAHOWA mo mbang aku,

²“Alè jelma simangko-angko, bagahken mo tennahKu èn bai raja Mesir dekket taba bangsana karina: Tuhu mahantu ngo kebelgahenmu! Oda lot siterbaingsa gabè alomu!

³Bagè sempènur Libanon ntemmes ngo kono dom dahan ntemtem janah merandal. Pènter ngo batangna janah merlèdang pucukna soh mi hembun mergiro-giro.

⁴Turah makin mbelgah ia kumarna cukup laèna. Laè niterruh tanoh merrè panganen bana, meniram karina uratna, dekket memernekki kayu sidèbanna.

⁵Kumarna oda nung kurang laèna, ndeppur ngo ia mbellen, dahanna mbelgah bana nggeddang. Ibas karina kayu sinirambah, ia mo sindatesna kalohon.

⁶Mermatcam bagè manuk-manuk merasar i rantingna. Binatang rambah merdokar i lenggemenna. Karina bangsa mbellen i suberri dunia kundul culèndung i terruhna.

⁷Merandal ngo kayu i tengennen; batangna mpènter, dahanna nggeddang. Uratna mbages masuk mi terruh soh mi benna laè i terruh tanoh.

⁸Kayu mpiangi i Eden, pekken JAHOWA oda terpedos dekketsa. Oda lot mpiangi sindorok mengelebihisa oda lot kayu bagi nggeddang dahanna. Tuhu ngo, i pekken JAHOWA oda lot kayu bagidi merandalna.

⁹Aku ngo memaingsa merandal dekket dahanna nggeddang bana ntemtem. Karina kayu i pekken JAHOWA cemburu mengidahsa.

¹⁰Kumarna i, Aku JAHOWA Sintèmbul i, memagahken taba kono, kadè sinaing masa taba kayu sisongket mi hembun mergiro-giro pucukna i. Kerna makin ndates, makin jukkat ngo ia.

¹¹Nai Kutulak mo ia janah kusohken taba penguasa sidèban, simemalesken bana rembang mi kejahatenna.

¹²Itabah soridadu sidèban siso menandaisa mo ia, nai ibelli bagi. Rantingna sienggo ncuak i merdabuhen mi karina delleng dekket napa-napa i nagerri i. Karina bangsa siemerian i teruhna laus menadingkensa.

¹³Merohen mo manuk-manuk janah seggep i kayu sienggo mbulak i, janah merrohen mo binatang rambah mendedohi dahan-dahanna.

¹⁴Masa pè i karina, asa mulai bagèndari nai, oda nèngè lot kayu turah bagidi datesna; oda lot nè pucuk kayu soh mi hembun mergiro-giro, kasi pè terolih laè merginja-ginja. Karina kennah matè bagè jelma simangko-angko, janah pulung dekket kalak sienggo susur mi dunia jelma sienggo matè.”

¹⁵Bagèen ngo pendokken JAHOWA Sintèmbul i, “Mula enggo susur mi dunia jelma sienggo matè kayu i, kudokken mo laè siniterruh tanoh lako mengeremremsa mahan pertanda merhendem. Kusombat mo penjarir laè dekket kusompel mo laè mata-mata. Kumarna enggo matè kayu i, Kupesempa mo sigellap mi babo delleng Libanon dekket maing males karina kayu sinirambah.

¹⁶Sinderrang Kupesusur kayu i mi dunia kalak simatè, sora ndabuh merdebbemna i memaing gontar karina bangsa. Karina kayu silot i Eden dekket kayu pilihen i Libanon siterolih laè merginja, janah sienggo susur mi terruh tanoh, mersampang atè kerna mbulak kayu i.

¹⁷Iarak kalak i mo ia mi dunia simatè janah pulung dekket kalak sienggo ndabuh lebbèen. Janah karina kalak sikundul i terruh kayu i arnia ipesompar-baèrken mi suberri bangsa.

¹⁸Tuduh-tuduh taba raja Mesir dekket bangsana ngo kayu i. Oda lot kayu i Eden bagidi ndates dekket muliana. Tapi ukum bagèndari, tosè bagè kayu i Eden ma kayu i pè susur ma mo mi dunia kalak simatè janah pu- lung dekket kalak siso menandai JAHOWA dekket kalak simatè mergeraha. Aku JAHOWA sintèmbul i ngo mendokken i.”