Read Batak Dairi Hesekiel 32 Bible Online

Hesekiel 32 - Batak Dairi bible

Hesekiel 32

¹I ari sada bulan sipuluh dua tahun pesipuluhduaken kami terbuang, nina JAHOWA mo mbang aku,

²“Alè jelma simangko-angko, pesèngèt mo raja Mesir. Bagahken mo tennahKu èn bana, ‘Lagakmu bagè singa poso i tengah bangsa-bangsa, tapi lebih bagè rupa buaya kumecaho ibas laè ngo ko. Nèhèmu mengelètuki dekket mengkotori karina laè.

³Tikan merpulung bangsa-bangsa, Kutangkup mo ko merkitè jalangKu, janah memelli bangsa-bangsa i mengeruah ko mi darat.

⁴Kutembemken mo ko mi tanoh janah karina manuk-manuk bak binatang i suberri dunia nai Kudokken kipangani kono.

⁵Nai kudomi mo karina delleng dekket napa-napa dekket bangkèmu simacik i.

⁶Kuorèken mo darohmu gabè ntaptap mo delleng-delleng dekket sap karina laè.

⁷Tikan Kubinasaken i kono, Kusangkemmi mo langit janah bintang i pè Kupemèlep cuhayana. Mataniari pè Kuboniken i balik hembun janah bulan oda nè mercuhaya.

⁸Tuhu ngo, Kuènteppi mo karina simercuhaya i langit, janah gellap bulita mo Kubaing tanoh èn. Aku, JAHOWA Sintèmbul i ngo enggo mengerana.

⁹Tikan Kusarken berita perdungmu i nagerri-nagerri simadèng itandai kono, mèduk mo bangsa gabè terendep-endep.

¹⁰Tuhu-tuhu ngo, Kulaluken mo peddangKu menaluken kono. Idah raja-raja mo pemaingKu bamu i. Sinderrang bagidi kadotdot mo kalak i buradan janah menggirgir kumarna mbiar matè.’ ”

¹¹Idokken JAHOWA Sintèmbul i mo taba raja Mesir, “Peddang raja Babel ilaluken nè mo taba kono.

¹²Soridadu kalak bangsa kejam Kupasulak mengerengkat peddangna lako menebengi karina ginemgemmu. Salpun mo karina jelma ginemgemmu dekket sinigegahkenmu i.

¹³Pinakanmu Kugerbengi i biding laè bekkasmu mènum. Oda ilètuki jelma barang pinakan nèngè laè i.

¹⁴Nai Kupeciho mo laè silot i nagerrimu janah Kubaing tennang menjarir. Aku, JAHOWA Sintèmbul i ngo enggo mengerana.

¹⁵Enggo kessa Kubaing Mesir i gabè padang gurun janah melongo, dekket Kubinasaken karina silot i sidi, satdar mo kalak i, Aku ngo JAHOWA.

¹⁶Sipesèngèt mposi èn gabè endè tangis milangi. Iendèken daberru-daberru bangsa sidèban mo i mahan pertanda merhendem bai Mesir dekket karina ginemgemna. Aku, JAHOWA Sintèmbul i ngo enggo mengerana.”

¹⁷I ari sipuluh lima bulan sada tahun pesipuluhduaken terbuang kami, idokken JAHOWA dèng ma mbang aku,

¹⁸“Alè jelma simangko-angko, merhendem mo ko lako bai ginemgem Mesir. Tengesken mo kalak i mi dunia kalak simatè rasken dekket nagerri-nagerri simergegoh sidèbanken i.

¹⁹Dokken mo taba kalak i, ‘Dok atèmu, kènè mo simberruna? Susur nè mo kè mi dunia kalak simatè, janah ipegalè i kellang-kellang siso menandai JAHOWA.’

²⁰Rebbak matè mo bangsa Mesir dekket kalak simatè ibas geraha. Enggo kebbas sada peddang lako mengeripasken kalak i karina.

²¹Lubalang-lubalang berani dekket kalak simergeraha kettan kalak Mesir, mersampang atè menghalopken pekeroh kalak Mesir mi dunia kalak simatè. Bagèen mo surak kalak i, ‘Enggo matè ibas geraha kalak siso menandai JAHOWA i. Bagèndari roh ngo kalak i mi sèn janah gadur i sènda!’

²²Assur gadur isadèi, ikulilingi pendèbaen soridaduna. Karina kalak i enggo ripas ibas geraha. Kuburen kalak i mo simbagesna i dunia kalak simatè. Tikanna nggelluh dèng, petubuhken mbiar ngo dakdak kalak idi i dunia.

²⁴Elam pè i sidi ma ngo dekket kuburen soridaduna i sikulilingna. Oda pella itakkil, matè ngo kalak i karina ibas geraha, nai susur mi dunia kalak simatè. Sidang nggelluhna dèng, dak memaing mbiar ngo kalak i, tapi bagèndari enggo matè kalak i, janah kennah dèng ma menggongken kememèla rasken kalak sienggo matè ibas geraha.

²⁶Si Mesekh dekket si Tubal pè i sidi ngo, ikulilingi kuburen soridaduna. Oda pella itakkil, matè ngo karina kalak i i pergerahaen. Sinderrang nggelluhna dèng, dak memaing mbiar ngo kalak idi i dunia èn.

²⁷Oda terolih penghormaten kalak i tikan ikubur bagè lubalang siarnia tikan susur mi dunia kalak simatè bak mersinjata lengkap. Ikubur ngo lubalang-lubalang dekket peddang i terruh takalna bak tambeng-tambeng i babo tentenna. Tikan nggelluhna dèng, lubalang mahantu ngo kalak i, gabè maing mbiar karina jelma.

²⁸Bagidi mo ikuburken kalak Mesir janah ipebonter i kellang-kellang kalak siso menandai JAHOWA, janah matè tikan mergeraha.

²⁹Edom pè i sidi ma ngo dekket karina ginemgem bak penguasana. Ukum arnia soridadu mahantu ngo kalak i, tapi bagèndari bonter ngo kalak i i dunia kalak simatè rebbak dekket kalak simatè sidèban i siso menandai Dèbata.

³⁰Karina raja muda i utara nai i sidi ma ngo, bagi ma ngo dekket kalak Sidon. Arnia sikebiaren ngo kuasa kalak i, tapi ukum bagèndari ipemèla ngo kalak i, janah oda sanga itakkil susur mi dunia kalak simatè rasken kalak siripas i pergerahaen. I sidi mo kalak i bonter janah menggongken sindersa rasken kalak sienggo susur mi dunia kalak sienggo matè.

³¹Soh kessa mo raja Mesir bak soridaduna mi dunia kalak sienggo matè janah mengidah kalak i sienggo ripas tikan geraha, terapo mo iakap kalak i. Aku JAHOWA Sintèmbul i ngo sienggo mengerana.

³²Aku ngo memaing raja Mesir perohken mbiar taba kalak singgelluh, tapi matè mo ia dekket soridaduna janah ipebonter rebbak dekket karina kalak siso menandai Dèbata, dekket simatè tikan geraha. Aku, JAHOWA Sintèmbul i ngo sienggo mengerana.”