Read Batak Dairi Hesekiel 33 Bible Online

Hesekiel 33 - Batak Dairi bible

Hesekiel 33

¹Mengerana nola mo JAHOWA mbang aku, nina mo,

²“Alè jelma simangko-angko, ranaken mo taba bangsamu, mula kupemasa geraha i sada nagerri, bagèen mo masa. Ipilih pengisi nagerri i mo i tengah-tengah kalak idi nai sada kalak perjaga.

³Mula idah perjaga i roh musuh, ipalu mo tanda bahaya, asa karina kalak merjaga-jaga.

⁴Barang isè mendengkoh tanda bahaya i, tapi oda isarihken, janah roh musuh memunuhsa, jadi matè mo ia kumernaken salahna sendiri. Ukum isarihken ngo tanda bahaya i, pasti ngo ndorok ia maluah.

⁶Tapi mula idah perjaga i roh musuh, keppèken oda ipersora tanda bahaya, nai ibunuhi musuh mo jelma perdosa i, kutunggu mo tanggung jabab bana nai Kumernaken permatè kalak i.

⁷Alè jelma simangko-angko, kono ngo Kuètong gabè perjaga bangsa Israel. Bagahken mo taba kalak i sipesèngèt èn:

⁸Mula Kubagahken sada kalak perjahat kennah matè, tapi oda ipesèngèt kono ia mengobahi pengelakona asa maluah ia, matè mo ia tong bagè sada kalak perdosa. Tapi tanggung jabab permatèna i, Kutunggu bamu nai.

⁹Mula ipesèngèt kono ngo perjahat i, keppèken oda uè ia mentadi mengulaken jahat, matè mo ia bagè jelma perdosa, tapi ukum kono maluah ngo.”

¹⁰Idokken JAHOWA mo mbang aku, “Alè jelma simangko-angko, ulakken mo taba kalak Israel rana kalak i bagèen, ‘Ndersa ngo kuakap kami kumerna irennuk dosa dekket kejahaten nami. Bakunè mo ndorok kami nggelluh?’

¹¹Dokken mo taba kalak i, ukum Aku, Dèbata singgelluh i, JAHOWA Sintèmbul i, oda ngo lolo Aku, mula matè jelma perjahat i; baliksa sekellen ngo Aku asa itadingken dosa-dosana, asa tong ia nggelluh. Alè bangsa Israel, ulang nè ulaken jahat! Kasa uè kono matè?

¹²Asa, alè jelma simangko-angko, ranaken mo taba kalak Israel, mula mengulaken dosa kalak bujur, oda ngo terurupen kebujurenna perlebbè i ia. Mula perjahat mentadi mengulaken dosa, oda ngo ihukum ia, janah mula mengulaken dosa kalak sibujur, oda ngo ipaluah ia.

¹³Tah bakunè enggo Kujandiken lako paluahken jelma bujur, tapi mula itebenai mengulaken dosa janah harap ia ipaluah kumarna kebujurenna perlebbè i, pilit ngo pikirenna i. Ai oda nè ngo kuèngèt kebujuren sienggo nung iulaken, janah kennah matè ngo ia kumarna dosa-dosana.

¹⁴Tah bakunè enggo Kupesèngèt kalak perjahat mendokken kennah matè ia. Tapi mula oda nèngè mengulaken dosa ia janah ipungkah nola mengulaken simerandal bak bennar, misalna iolihken milik gadè ndèba dekket harta sinitangkona janah iuèi pati-patien simerembah kenggeluhen, oda ngo matè ia.

¹⁶Oda nèngè kuèngèt dosa-dosa sienggo iulaken, janah nggelluh mo ia kumarna iulaken situhuna dekket merandal.

¹⁷Tapi idokken bangsa i ngo oda adil nina pemaingKu i! Keppèken pemikiren bak pemahan kalak i ngo oda adil.

¹⁸Sikali nai Kuhentekken, mula ipungkah jelma bujur mengulaken jahat, matè mo ia kumernakenna i.

¹⁹Mula jelma jahat mentadi oda nè mengulaken dosa, janah imulai mengulaken simerandal janah bennar, nggelluh mo ia kumernaken idi.

²⁰Kasi pè bagidi, idokken kalak Israel, oda adil nina siKubaing i. Tuhu-tuhu, Kuhukum mo kalak i gennep rembang mi pengelakona.”

²¹I ari lima bulan sipuluh tahun peduabelasken kessa terbuang kami, roh mo mendahi aku sada kalak simaluah i Jerusalem nai memagahken bangku enggo talu kuta i.

²²Tupung berngin madèng roh i ia, enggo kurasaken kuasa JAHOWA. Jadi roh kessa mo jelma i mendahi aku, enggo ndorok aku mengerana janah oda nè pekkak.

²³Idokken JAHOWA mo mbang aku,

²⁴“Alè jelma simangko-angko, idokken jelma simerian i kuta sienggo merumpak i tanoh Israel, ‘Si Abraham ngo dasa karina tanoh èn, keppèken pellin sadasa ngo kessa. Kita mèduk ngo, jadi gabè milikta mo èn.’ ”

²⁵Kumara i idokken JAHOWA ngo kubagahken tennahNa èn bai kalak i, “Ipangan kènè ngo gulè i sidi dèng pè darohna; isembah kènè ngo gana-gana dekket iulaken kènè memunuh. Pangna i kènè mengakuken tanoh èn milik ndènè.

²⁶Peddang ndènè i ngo iasangken kènè. Meronah ngo ulah-ulah ndènè. Merlangkah julu meddem ngo kènè karina. Pang dèng ngo kènè mengakuken tanoh èn milik ndènè?

²⁷Kumernaken Aku, Dèbata Singgelluh i, JAHOWA Sintèmbul i, jelma sitading i kuta simerumpak i matè terbunuh mo i. Kalak sitadingna i jampal-jampalen ipangan binatang. Kalak siciboni i delleng dekket liang-liang, matè ibaing penakit uabba.

²⁸Kujadiken mo nagerri i gabè padang gurun longo-longoen, janah salpun mo kuasa sinièndèl-èndèlken kalak i. Gabè melongo mo delleng-delleng i Israel gabè sada kalak nèngè poda pang mentas arap i.

²⁹Sinderrang Kuhukum bangsa i kumarna dosa-dosana janah memaing nagerri i longo-longoen, satdar mo kalak i, Aku ngo JAHOWA.”

³⁰Idokken JAHOWA, “Alè jelma simangko-angko, enggo gabè buah bibir dengan sada bangsamu kono tikan tumpu kalak i i gembar parik kuta barang i lebbè pèntu bages. Nina sisada mo mbang sisada nai, ‘Kita mo, sidengkohken bakunè tennah JAHOWA ari èn.’

³¹Roh mo kalak i merkolan-kolan janah sibagè bangsangKu, kundul mo kalak i mendengkohken ranamu, tapi barang kadè idokken kono, oda ngo iuèi kalak i. Bibir kalak i mengeruapken ngkelleng, tapi ukum pikiren kalak i pellin mengukurken laba ngo.

³²Iètong kalak i ngo ko sada kalak perendè simengendèken endè percintaen mendè sorana janah pandè merkucapi. Tuhu idengkohken kalak i ngo ranamu tapi oda iulaken.

³³Saut ngo karina sinidokkenmu i, janah dapet kessa tikkina, satdar mo kalak i nung kin ngo lot sada kalak nabi i tengah-tengah kalak i.”