Read Batak Dairi Hesekiel 34 Bible Online

Hesekiel 34 - Batak Dairi bible

Hesekiel 34

¹Idokken JAHOWA mo mbang aku,

²“Alè jelma simangko-angko, pesèngèt mo raja-raja Israel, janah bagahken bana, kadè sinidokken, Aku JAHOWA Sintèmbul i taba kalak i, ‘Merjaya ngo kènè, alè simermakan Israel. Pellin siperlu bai ndènè ngo ipikirken kènè, oda keperluen biri-biri sinipermakanmu.

³Iènum kènè susuna, bukbukna itennun kènè gabè oles pakèen, janah biri-biri singgomokna isembellih janah ipangan kènè. Keppèken oda nung iurus kènè biri-biri ndènè i.

⁴Biri-biri ndotè oda ipehèdu-hèdu kènè, simersakit oda itambari kènè, siugahen oda idauni kènè, silaling dekket mbalang oda itulusi kènè asa i iring balik. Balikna gabè kejam ngo ibaing kènè taba karina biri-biri ndènè i.

⁵Kumarna oda lot simermakan, mèrap mo biri-biri i janah gabè ijerngemmi binatang penoro.

⁶Nai gabè mburo mo biri-biringKu i babo uruk-uruk ndates dekket i delleng-delleng. Mambur mèrap mo kalak i mi suberri tanoh èn, isè poda memperdatèken dekket menulusi kalak i.

⁷Asa alè permakan-permakan, dengkohken mo kadè sinaing Kudokken JAHOWA Sin- tèmbul i bamu.

⁸Kumernaken Aku, JAHOWA singgelluh i, peratè-atèken mo! Enggo ijerngemmi janah ipangani binatang penoro biri-biringku, kumarna oda lot mermakan kalak i. Oda isarihken kènè permakan-permakanku biri-biri i. Pellin diri ndènè ngo kessa isarihken kènè, oda ngo keperluen biri-birimu.

⁹Asa dengkohken mo alè permakan-permakan,

¹⁰Aku JAHOWA Sintèmbul i mendokken bamu, musuhmu ngo Aku. Kubuat mo bamu nai biri-biringKu i, janah oda nè tok aku merèken bamu; oda nè Kupaduè kènè memikirken keperluenmu sendiri. Kupaluah mo biri-biringKu bamu nai, asa ulang nè dak gabè panganen ndènè kalak i.’ ”

¹¹Idokken JAHOWA Sintèmbul i, “Aku sendiri mo menulusi biri-biringKu dekket memiarasa,

¹²bagè sada kalak permakan menulusi dekket pepulungken biri-birina simambur mèrap i, nai ipiara mo selloh. Kuarak mo karina kalak i balik i bekkas kalak i mèrap idi nai, tupung ari gellap bak sial i.

¹³Kukaruarken mo kalak i i tengah-tengah bangsa-bangsa nai dekket i nagerri sidèban i nai, nai Kupepulung janah Kuarak mi nagerrina sendiri. Kupermakan mo kalak i i delleng dekket i napa-napa Israel, janah kuarahken mi jampalen mèndè bana mènak.

¹⁴Tuhu-tuhu, Kupèmaken mo bai kalak i jampalen merdukut nggomok i uruk-uruk dekket i napa-napa tanoh Israel. I sidi mo kalak i gempang-gempang sennang ninganna tungaluh.

¹⁵Aku mo mermakani biri-biringKu dekket mèmaken bekkas gempang-gempang bana. Aku, JAHOWA Sintèmbul i ngo enggo mengerana.

¹⁶Simbalang Kutulusi, silaling Kuembah balik, siugahen Kudauni, simersakit Kutambari; tapi singgomok bak mergegoh Kuripasken, kumerna Aku permakan me- ngulaken kadè sambing simerandal.

¹⁷Dengkohken mo alè biri-biringKu! Aku, JAHOWA Sintèmbul i mendokken bamu, Kuhukum mo kènè gennep janah menirang siburju ipas sijahat nai, biri-biri i pulungen kambing nai.

¹⁸Lot ngo bai ndènè nai oda puas iakap pellin mengkeriken alah-alah simerandalna, tapi idedohi ngo dukut siso nipanganna! Iènumi kalak i ngo laè nciho, nai ilètuki mo laè siso ènumen!

¹⁹Biri-biringKu sidèbanna i kennah menggagat alah-alah sienggo idedohi dekket mengènum laè sienggo ilètuki.

²⁰Kumernaken i, Aku JAHOWA Sintèmbul i mendokken bamu, alè biri-biri nggomok, roh mo Aku lako menghukum biri-biri mergegoh bang biri-biri ndotè.

²¹Isesak-sesak janah itendengi kènè ngo biri-biri sisakiten gabè mersirang ia i pulungen biri-biri nai.

²²Tapi Aku sendiri mo mempebèlai biri-biringKu, asa ulang nèngè ibaing tabasa siso puna-puna. Aku mo mendabuh hukum taba biri-biringKu mersada-sada dekket menirang siburju i sijahat nai.

²³Kupebangkit mo sada kalak raja tosè bagè naposongKu si Daud, asa pellinsa mermakani kalak i.

²⁴Aku, JAHOWA mo gabè Dèbata kalak i, janah raja bagè naposongKu si Daud idi mo merkuasa taba kalak i. Aku JAHOWA ngo enggo mengerana.

²⁵Kubahan mo padan dekket kalak i, simenjamin kemènaken bai kalak i. Kupelaus mo karina binatang penjerngem i suberri aur i nai, asa ndorok mènak biri-biringKu i jampalen dekket mergempangen i rambah.

²⁶Kupasu-pasu mo kalak i janah kuijinken merian i gembar dellengKu simbadia. Kuberèken udan bai kalak i mula iperluken.

²⁷Merbuahi mo kayu, juma pè merèken hasil, janah karina mènak mengiani tanohna sendiri. Mula enggo Kupostepken rantè simengèkèti bangsangKu janah mula enggo Kupaluah kalak i bai kalak simenghambasa nai, satdar mo kalak i, Aku ngo JAHOWA.

²⁸Oda nè mo ipupusi bangsa-bangsa siso menandai Aku kalak i, barang ijerngem binatang. Sennang mo kalak i nggelluh, janah sada kalak nèngè poda memaing kalak i mbiar.

²⁹Kupegabur mo juma kalak i, gabè oda nèngè masa kelèhèen i nagerri i. Oda nèngè ilèai bangsa-bangsa sidèban kalak i.

³⁰Nai satdar mo karina jelma, bangsangKu ngo Israel janah Kulègenni ngo kalak i. Aku, JAHOWA Sintèmbul i ngo simendokken i.

³¹Tuhu-tuhu, kènè ngo pulungen biri-biri siKuberrè mangan. BangsangKu ngo kènè, janah Aku Dèbata ndènè. Aku, JAHOWA Sintèmbul i ngo sienggo mengerana.”