Read Batak Dairi Hesekiel 35 Bible Online

Hesekiel 35 - Batak Dairi bible

Hesekiel 35

¹Idokken JAHOWA mo mbang aku,

²“Alè jelma simangko-angko sumpahi mo nagerri Edom.

³Bagahken mo taba pengisina kadè siKudokken JAHOWA Sintèmbul i taba kalak i, ‘Musuhmu ngo Aku èn, alè pengisi uruk Edom! Kubaing mo tanohmu gabè longo-longoen oda lot mengiani, janah kutamu pè merumpak mo. Nai satdar mo kènè Aku ngo JAHOWA.

⁵Arnia nai ngo imusuhi kènè Israel, janah ibelli kènè ia irabbatken tikan sempa bai kalak idi olpek sibagè hukum perpodi kumarna dosa-dosa kalak i.

⁶Kemulihken i, ku- marnaken Aku, Dèbata singgelluh i, JAHOWA Sintèmbul i, kematèen ngo jalonkenmu, janah oda terbaing kènè maluah bana nai. Ai enggo salah kènè kumarna memunuh, nai bunuh-bunuh ma mo mengeletlet kènè.

⁷Melongo mo Kubaing karina kutamu sinidelleng Edom janah gennep jelma memellus arap i Kubunuh.

⁸Kututup mo delleng-delleng dekket bangkèmu, uruk-uruk dekket napa-napa Kudomi dekket simatè ibaing geraha.

⁹Nagerrimu Kujadiken gabè rambah uto-utoen soh mi amman sumendah, dekket kutamu oda nèngè i iani jelma. Nai satdar mo kènè, Aku ngo JAHOWA.

¹⁰Idokken kènè, Juda bak Israel dekket tanohna karina hak ndènè, dekket gabè milik ndènè, kasi pè Aku, JAHOWA ngo Dèbata kalak i.

¹¹Kumarna i, kemulihken Aku, Dèbata singgelluh i, JAHOWA Sintèmbul i, bales dendam mo Aku taba kènè, kerna melaga kènè, cemburu dekket nggogo midah bangsangKu. Ibettoh kalak i mo, Kuhukum kènè kumernaken pemaing ndènè taba kalak idi.

¹²Nai satdar mo kènè, Aku JAHOWA enggo mendengkoh rèhè-rèhè ndènè sinderrang idokken kènè: Enggo tembak longo-longoen delleng Israel janah isohken gabè domo-domoenta.

¹³Alè bangsa Edom, mbellang ngo babah ndènè janah sombong rana ndènè taba Aku. Enggo kudengkoh karinana idi.

¹⁴Aku, JAHOWA Sintèmbul i mendokken: Lolo mo suberri dunia Kubaing kessa nagerrimu gabè rambah longo-longoen,

¹⁵dos tikanna sennang kènè mengidah Israel milikKu i gabè melongo. Delleng-delleng Seir dekket karina tanoh Edom gabè kelongoen. Nai karina jelma mo bettoh-betohen, Aku ngo JAHOWA.’ ”