Read Batak Dairi Hesekiel 36 Bible Online

Hesekiel 36 - Batak Dairi bible

Hesekiel 36

¹Idokken JAHOWA, “Alè jelma simangko-angko, mengerana mo ko taba delleng-delleng Israel, dokken mo idengkohken kalak i kata JAHOWA Sintèmbul i,

²‘Tikan ijuhap dekket ipupusi bangsa-bangsa sikuliling ndènè kènè, enggo ilèai kalak i suberri Israel. Lolo ngo kalak i mendokken, enggo gabè milik kalak i bagèndari karina uruk sinderbi. Kumara i alè delleng dekket uruk-uruk, laè dekket lembeng, alè kuta sienggo merumpak dekket sienggo itadingken pengisina bak ipupusi bana irèhèi bangsa-bangsa sikulilingna, dengkohken mo kadè idokken JAHOWA Sintèmbul i bamu: Ibagasen perpungur lagangKu Kuasup ngo bangsa-bangsa sikulilingmu janah terlebbih taba Edom, kumarna lolo janah bagè cara mengelèai, kalak i mengerampasi tanohKu dekket mengerampasi jampalenna. Bagèndari melaga ngo Aku janah mengamuk kumarna enggo mengelèaisu bangsa-bangsa i dekket pekètèkken kènè.

⁷Mersumpah mo Aku, JAHOWA Sintèmbul i, ukum bangsa-bangsa sinikulilingmu idi pè ilèai ma mo.

⁸Tapi Kudokken mo bamu alè delleng-delleng Israel, mertunasi nola mo kayumu janah merbuah lako bai bangsangKu Israel ai ndor nè mo balik kalak i.

⁹Kan kono ngo aku alè Israel, janah Kupastiken mo, ipangkur nola mo tanohmu janah isuani bennih.

¹⁰Kutambahi mo buè bangsangKu Israel. Iiani kalak i mo kuta janah ipekadè mengolihi karina simerumpak i.

¹¹Kutambahi mo jelma pe- ngisimu bagi dekket pinakanmu asa gabè mbuè kalohon, buèen daripada sienggona, janah gabè meppar mo kalak i. Nggelluh mo kalak i i sidi bagè sienggona dekket Kubaing nduma, codi mi simadèng nung iakapi kènè. Nai satdar mo kalak i, Aku ngo JAHOWA.

¹²Kuarak mo balik bangsangKu Israel lako mengiani nagerri i nola. Gabè milik kalak i sendiri mo tanoh i janah pukpuk memerèken hasilna, nai oda nè mo matè rapar dukak-dukak kalak i.

¹³Aku, JAHOWA Sintèmbul i mendokken: Tuhu ngo ibaing gerar tanoh i sikipangan jelma dekket pengerampasi dukak-dukak — bangsa simengianisa.

¹⁴Tapi mulai bagèndari nai oda nèngè kipangan jelma tanoh i barang mengerampasi dukak-dukak kalak i. Aku JAHOWA Sintèmbul i ngo simengerana i.

¹⁵Oda perlu nèngè idengkoh tanoh i rèhè bangsa-bangsa barang menggong pengelèai ndèba. Oda nèngè mengeripasken bangsa simengianisa tanoh èn. Aku, JAHOWA Sintèmbul i ngo mendokken i.’ ”

¹⁶Idokken JAHOWA mbang aku,

¹⁷“Alè jelma simangko-angko, tikan merian i nagerrina sendiri kalak Israel, ilamuni kalak i ngo i merkitè pemahan bak pengelako kalak i. Kuètong ngo haram pengelako kalak idi, bagè daberru kerohen pantangen olesna.

¹⁸Kusempaken ngo lagangKu taba kalak i, kumarna enggo nggati kalak i memunuh i tanoh i dekket mengelamunisa merkitè gana-gana kalak i.

¹⁹Kuhukum mo kalak i rembang mi cara nggelluh dekket pengelako kalak i, nai mambur mèrap mo kalak i Kubaing mi nagerri ndèba.

²⁰Barang mikè sambing kalak i laus, dak ilamuni kalak i ngo gerarKu simbadia. Kumarna idokken dèba bagèen, ‘Bangsa Dèbata ngo bangsa èn, tapi kennah itadingken kalak i ngo tanoh siniberèken Dèbata bai kalak i.’

²¹Sèkoh ngo kuakap kumarna dak ilèai kalak Israel ngo gerarKu barang mikè sambing kalak i laus.

²²Kumara i bagahken mo kadè sinidokken JAHOWA Sintèmbul i taba bangsa Israel, ‘Kadè siKubaing podin èn oda ngo kumarna kènè, alè kalak Israel, tapi kumarna gerarKu simbadia i ngo, sienggo ilèai kènè, barang mikè sambing kènè laus.

²³Kupacidah mo kebadiaen gerarKu simbelgah i, gerar sienggo ilèai kènè i tengah bangsa-bangsa, asa ibettoh kalak i Aku ngo JAHOWA. Aku, JAHOWA Sintèmbul i ngo sienggo mengerana. Kènè mo Kubaing dalan lako pacidahken taba bangsa-bangsa, simbadia ngo Aku, JAHOWA Sada-sada i.

²⁴I gennep bangsa bak nagerri nai, Kupepulung mo kènè janah Kuolihken mi tanoh ndènè.

²⁵Enggo kessa i Kuuras mo kènè dekket laè mbersih, asa mpanting kènè ipas gana-gana ndènè nai dekket ibas karinana sienggo mengelamuni kènè nai.

²⁶Nai Kuberèken mo bai ndènè ukur sirembaru dekket pikiren rembaru. Ukur ndènè mpihir bagè batu i Kugancihi dekket ukur merpenguèi.

²⁷Kuarirken mo TendingKu mi bagasen ukurmu janah Kujamoti kènè asa nggelluh mengèkutken pati-patinKu dekket menguèi karina perèntahKu.

²⁸Nai merian i tanoh sienggo Kuberèken taba empung ndènè mo kènè. Gabè bangsangKu mo kènè janah Aku mo gabè Dèbata ndènè.

²⁹Kupaluah mo kènè ipas kelèaen ndènè nai. Kuperèntahken mo taba pagè, asa nggomok ia, asa ulang nèngè nung sempa taba kènè kelèhèen.

³⁰Kutam- bahi mo perbuah kayu merbuah ndènè dekket hasil juma ndènè, asa ulang nèngè irasai kènè kelèhèen simemaing mekemmer gerar ndènè i tengah bangsa-bangsa.

³¹Terèngèt mo kènè mi ulah-ulah ndènè jahat dekket pemahan ndènè siso patut i, nai gabè nggogo mo atè ndènè midah diri ndènè kumarna dosa-dosa bak ulah-ulah simeroha nibaing ndènè.

³²Èngèt mo alè Israel, Kubaing karinana i oda ngo kumernaken kènè. Kennah malu janah merlèa pengakap ndènè kumarna pengelako ndènè i. Aku JAHOWA Sintèmbul i ngo sienggo mengerana.’ ”

³³Idokken JAHOWA Sintèmbul i, “Enggo kessa Kupepanting kènè ipas karina dosa ndènè nai, Kupaduè nola mo kènè mengiani kuta ndènè, dekket pekadèken simerumpak i.

³⁴Arnia sondel mo dakkirna tanoh ndènè i, idah kalak simerdalan arap jampalen ndènè, tapi Aku mo memaing asa iula kènè nola tanoh i.

³⁵Nai lengang mo kalak karina, kumarna mobah tanoh dakkir i kin gabè pekken Eden bagèndari, janah kuta melongo, merumpak janah melala i kin, bagèndari gabè kuta ntegguh pertahanenna janah nterrem pengisina.

³⁶Nai bangsa-bangsa cibal baleng silotna dèng, gabè satdar, Aku, JAHOWA enggo pekadèken kuta sienggo melala i mengolihi, janah mengolihi mengula juma simpalsè i. Aku, JAHOWA ngo sienggo mongkam janah pasti ngo kubahanken i.”

³⁷Idokken JAHOWA Sintèmbul i, “Alè bangsa Israel, kupaduè nola mo kènè mengido urup bangKu; Kutambahi mo bilangen ndènè bagè simpulungen biri-biri.

³⁸Kuta sienggo melala bagèndari, gabè dom pengisina luas bagè Jerusalem tupung ari pèsta sienggo lampo, gabè dom dekket biri-biri sinipèlèken. Nai satdar mo kènè, Aku ngo JAHOWA.”