Read Batak Dairi Hesekiel 37 Bible Online

Hesekiel 37 - Batak Dairi bible

Hesekiel 37

¹Kuakapken mo kuasa JAHOWA, janah iembah TendiNa mo aku susur mi napa dom tulan-tulan.

²Iteggu JAHOWA mo aku merdalan-dalan i napa idi, nai kuidah mo i suberri napa i merdaraken mbuè kalohon tulan-tulan janah ngkerrah kerring kalohon.

³Ikusoken JAHOWA mo baku, “Alè jelma simangko-angko, ndorok ngo tulan-tulan èn nggelluh mengolihi?” Kualoi mo, “Alè JAHOWA sintèmbul i, pellin kono ngo kessa bettoh-bettohen i.”

⁴Nai idokken JAHOWA mo aku magahken tennahNa taba tulan-tulan ngkerah i.

⁵“Aku JAHOWA Sintèmbul i menempulken kessah mi bagasen dirimu, asa mengolihi nggelluh kènè.

⁶Kubaing mo urat dekket suka bai ndènè janah kubalut kènè dekket koling. Kuberèken mo bai ndènè kessah asa nggelluh kènè. Nai ibettoh kènè mo Aku ngo JAHOWA.”

⁷Nai mengerana mo aku si Hesekiel taba tulan-tulan i tosè bagè perèntah JAHOWA. Nai sinderrang mongkam i aku, kudengkoh mo sora merderrik-derrik kumarna mulai mo tulan-tulan i mersiudun bana.

⁸Ninganna kunelnelli, mulai mo tulan-tulan i merurat dekket mersuka, nai merkoling ma, tapi karina badan i oda dèng merkessah.

⁹Idokken Dèbata mo mbang aku, “Alè jelma simangko-angko, mengerana mo ko taba angin. Dokken mo, Aku JAHOWA Sintèmbul i memerèntahken bana, asa roh i dèsa siualuh nai lako menempulken kessah mi bagasen badan simatè i, asa balik nggelluh kalak i.”

¹⁰Nai mongkam mo aku rembang mi perèntah JAHOWA, mèter isempulken angin i mo kessah mi bagasen badan-badan i, nai nggelluh mo kalak i janah cènder. Nterrem kalohon ngo bilangen kalak i, cukup lako memaing pulungen soridadu mbuè.

¹¹Idokken JAHOWA mo mbang aku, “Alè jelma simangko-angko, tuduh-tuduh mi bangsa Israel ngo tulan-tulan èn. Kekelsohen ngo kalak i kumarna gorang-garing kalak i, oda lot harapen janah oda lot ari podi.

¹²Kumara i ramalken mo taba bangsangKu Israel i, ukum Aku JAHOWA Sintèmbul i memuka pendèbaen kalak i. Kupedarat mo kalak i i sidi nai janah mengolihken kalak i mi tanoh Israel.

¹³Enggo kessa Kupesaut karinana i, ibettoh bangsangKu mo, Aku ngo JAHOWA.

¹⁴Kusempulken mo kessah mi diri kalak i lako pegelluhken kalak i, nai Kupaduè mo kalak i merian i nagerrina sendiri. Nai ibettoh kalak i mo, Aku ngo JAHOWA. Aku JAHOWA enggo mengeruapken i janah pasti kupesaut.”

¹⁵Idokken JAHOWA nola mo mbang aku,

¹⁶“Alè jelma simangko-angko, buat mo sada tongket, janah suratken i babona kata èn, ‘Kerajaen Juda’. Nai buat mo sada tongket sideban, janah suratken i babona: ‘Kerajaen Israel’.

¹⁷Nai jemmak mo tongket sidua i mersada puncana janah gabè sada tongket.

¹⁸Mula ikusoi bangsamu lapatna,

¹⁹bagahken mo bai kalak i, Aku, JAHOWA Sintèmbul i naing muat tongket tuduh-tuduh mi Israel janah persadaken dekket tongket simertuduh-tuduh mi Juda. Kupersada mo tongket sidua i janah Kugellem ipas tanganKu.

²⁰Jèmak mo tongket sidua i janah pacidah taba bangsa i.

²¹Nai bagahken mo taba kalak i, Aku, JAHOWA Sintèmbul i mengaleng karinana bangsangKu i nagerri barang mikè kalak i enggo laus i nai. Kupepulung mo kalak i janah Kuarak balik mi nagerrina sendiri.

²²Kubaing mo kalak i gabè sada bangsa i tanoh idi i delleng Israel. Iperèntah sada raja mo kalak i, janah oda nèngè pecah gabè dua bangsa barang kerajaen.

²³Oda nè mo ilamuni kalak i dirina merkitè mengulaken dosa dekket menembah gana-gana simeronah i. Kujamotken ngo kalak i ibas karina penurimpangen nai simemakin kalak i menelbuh Aku. Kuuras mo kalak i; gabè bangsangKu mo kalak i, janah Aku Dèbatana.

²⁴Ipersada mo kalak i iperèntah sada kalak raja bagè raja Daud sinaing memerèntah soh mi amman sumendah. Setia mo kalak i menguèi pati-patinKu. Janah soh mi amman sumendah mo kalak i dekket pinemparna mengiani tanoh i, tanoh siKuberèken bai si Jakob dekket siniianen empung kalak i.

²⁶Kubahan mo sada bulaban dekket kalak i simenjamin kedamèen bai kalak i soh seggen. Kupasu-pasu mo kalak i janah kupebuè bilangen kalak i. Kupajek mo BagesKu i tanoh kalak i janah menettap i sidi soh mi amman sumendah.

²⁷Merian mo aku rasken kalak i, Aku mo gabè Dèbatana janah bangsangKu mo kalak i.

²⁸Enggo kessa i tengah-tengah kalak i BagesKu soh mi sidekkahna, satdar mo bangsa-bangsa sidèban i, Aku JAHOWA ngo sienggo memilih Israel gabè bangsangKu sendiri.”