Read Batak Dairi Hesekiel 38 Bible Online

Hesekiel 38 - Batak Dairi bible

Hesekiel 38

¹Idokken JAHOWA mo mbang aku,

²“Alè jelma simangko-angko, sumpahi mo raja Gog simermulia i nagerri-nagerri Mesekh dekket Tubal sini tanoh Magog.

³Dokken tabasa, ukum Aku JAHOWA Sintèmbul i, musuhna ngo.

⁴Kubèluk mo ia, kukait mo kerahongna, janah kusintakken ia karuar rebbakken karina soridaduna. Nterrem kalohon ngo soridaduna merkuda merpakèen seragam. Gennep soridadu merembah tambeng-tambeng dekket peddang.

⁵Rajana iarak soridadu i Persia nai, Sudan dekket Libia, karina i merpeddang dekket mertangkuluk waja.

⁶Karina penjuhap i nagerri Gomer dekket Bet-Togarma i utara nai merdalan dekketsa, janah mèduk dèng ma dekket bangsa sidèban.

⁷Dokken mo ia merkebbas-kebbas janah perèntahken karina soridaduna sienggo mersada dekketsa asa merjaga-jaga mengèkutken gorèna.

⁸Barang piga-piga tahun nai Kuperèntahken mo ia lako menjuhap sada nagerri bak pengisina sienggo ipepulung balik i tengah-tengah bangsa-bangsa nai, janah merian nola i nagerri idi mènak merdamè-damè. Igemgemmi si Gog mo delleng-delleng Israel sienggo ndekkah melongo dekket merumpak, tapi bagèndari iiani ginemgem janah nggelluh merdamè-damè.

⁹Roh mo ia dekket tenterrana bak mèduk dèng bangsa simendenganisa roh lako menjuhap bagè kaba-kaba janah menangkemmi suberri aur bagè hembun.”

¹⁰Idokken JAHOWA Sintèmbul i mo taba Gog, “Tikan bagidi, memaing taki-taki jahat ngo kono.

¹¹Iputusken kono ngo lako menjuhap nagerri siso merbèntèng i, pengisina nggelluh ibagasen damè dekket mènak i kuta siso merpagar janah oda lot merpertahanen.

¹²Naing ipupusi janah irampasi kono mo katèmu harta pengisi kuta sienggo merumpak i kin. Pengisina sinipepulung i merbagè-bagè bangsa nai, bagèndari enggo mbuè hartana dekket pinakanna janah merian kalak i i pusat dunia èn.

¹³Pengisi Syeba dekket Dedan bak pertiga-tiga i nagerri Spanyol mengkusoi kono bagèen, ‘Mèter karina ngo soridadumu iperèntahken kono pellin lako mengerampasi dekket memupusi emmas, pirak, pinakan dekket harta, janah mengkais karinana i?’ ”

¹⁴Kumernaken i ipasulak JAHOWA Sintèm- bul i ngo aku mendahi si Gog lako memagahken tennahna èn, “Sinderrang bangsangKu Israel nggelluh mersennang-sennang janah merdamè-damè, keppè, roh ko menjuhap.

¹⁵Berkat ngo ko i bekkasmu, ndaoh i utara nai, merdengan nterrem soridadu janah mahantu, karinana soridadu merkuda i mermatcam bagè bangsa nai.

¹⁶Nai ijuhap kono mo bangsangKu Israel tosè bagè kaba-kaba memellus tanoh èn. Mula dapet tikkina, Kupasulak ngo ko lako mengkunduli tanohKu. Merkitè pemaingKu tarap kono, alè Gog, satdar mo bangsa-bangsa, isè Aku, imo Dèbata Simbadia.

¹⁷Otang enggo kudokken tersèngèt kono arnia arap naposongKu nabi-nabi Israel? Enggo kin ngo iramalken kalak i daoh-daoh arien kupasulak mo sada kalak lako menjuhap Israel. Aku JAHOWA Sintèmbul i ngo sienggo mengerana.”

¹⁸Idokken JAHOWA Sintèmbul i, “Tapi gejapkenna enggo kessa ijuhap si Gog, Israel i, mèter sampat mo Aku mengamuk.

¹⁹Janah merdengan laga Kuasup mo, tupung arinkenna i masa mo rènur mahantu i nagerri Israel.

²⁰Karina ikan dekket manuk-manuk, karina binatang mbellen dekket kètèk, dekket karina jelma i babo tanoh èn menggirgir buradan meradepken Aku. Merentuhen mo delleng, mertelbaken mo lingling dekket mer-mbongkaren mo karina pagar batu.

²¹Nai tersengget mo si Gog merkitè matcam bagè bencana. Aku, JAHOWA Sintèmbul i ngo sienggo mengerana. Mersitebengen mo samah-samah soridaduna dekket peddang kalak i.

²²Kuhukum mo ia merkitè sakit uabba dekket mersiorèen daroh. Udan ndor dekket baho, api dekket barèrang Kucurahken tabasa dekket taba soridaduna dekket taba mbuè bangsa sienggo rebbak dekketsa.

²³Merkitè cara bagi Kupacidah taba karina bangsa, ukum Aku mermulia ngo janah mbadia. Nai satdar mo kalak i Aku ngo JAHOWA.”