Read Batak Dairi Hesekiel 39 Bible Online

Hesekiel 39 - Batak Dairi bible

Hesekiel 39

¹Idokken JAHOWA Sintèmbul i, “Alè jelma simangko-angko, asup mo si Gog, raja sitermurmur i nagerri Mesekh dekket Tubal, janah dokken mbangsa musuhna ngo Aku.

²Kupepèol mo ia janah kuiring karuar i bekkas sindaoh i utara nai, mi delleng-delleng Israel.

³I sidi Kupalu mo baor panahna soh mpellut i tangan kambirangna nai janah Kudabuhken anak panahna i tangan kamuhunna nai.

⁴Matè mo si Gok rasken karina soridaduna dekket denganna i babo delleng-delleng Israel, janah bangkè kalak i Kuberèken taba karina manuk-manuk dekket binatang asa ipangan.

⁵Talu mo soridadu i janah mermatèen i juma-juma. Aku, JAHOWA Sintèmbul i ngo sienggo mongkam.

⁶Kubaing mo kemessengen i tanoh Magog dekket i biding-biding laut, bekkas pengisina nggelluh merdamè-damè. Nai satdar mo kalak i karina, Aku ngo JAHOWA.

⁷Tapi ukum i tengah-tengah kalak Israel, Kupetarar mo gerarKu simbadia, janah oda nè ilèai gerarKu i. Nai satdar mo bangsa-bangsa, Aku ngo JAHOWA, Dèbata simbadia i Israel nai.”

⁸Idokken JAHOWA Sintèmbul i, “Tuhu-tuhu ngo kennah roh ari sienggo Kudokken i.

⁹Karuar mo pengisi Israel merkolan-kolan lako pepulungken sinjata-sinjata sienggo itadingken, imo tambeng-tambeng dekket peddang, sèur dekket anak panah dekket palu-palu. Ibaing kalak i mo i karina gabè sebban janah bias mo i sebban pitu tahun.

¹⁰Jadi oda nè perlu muat sebban kalak idi i juma, barang menabahi kayu mi rambah, kumerna mbuè kalohon ngo sinjata sinitadingkenna i mahan sebban. Ibuati kalak i mo harta sienggo nirampasen dekket sinipupusenna i. Aku JAHOWA Sintèmbul i ngo sienggo mendokken i.”

¹¹Idokken JAHOWA mo, “Enggo kessa saut karinana i, Kuberèken mo bai si Gog tanoh kuburenna i Israel, i Napa peneberangen kan kebincaren Laut Matè. I sidi mo si Gog dekket karina soridaduna ikubur, janah igerari mo napa i ‘Napa Nuhnuhen Gog’.

¹²Pitu bulan dekkahna kalak Israel merempet menanem karina bangkè i, asa ulang nè melamun tanoh i.

¹³Karina pengisi nagerri i mengurupi ulaen mengkubur i; janah tersèngèt i menjalo penghargaen mo kalak i i ari kemenangenKu. Aku, JAHOWA Sintèmbul i ngo sienggo mendokken i.

¹⁴Enggo kessa leppas sipitu bulan i, ipasulak dèng ma ngo barang piga-piga kalak nai mengagahi nagerri i lako menulusi bangkè tah lot dèng gampar i tanoh, janah mula lot, ikubur mo i, asa mpanting nagerri idi i simelamun nai.

¹⁵Tikan mengagahi i, gennep idah kalak i tulan-tulan jelma, ibaing kalak i mo tanda i gembarna asa idah tukkang kubur dekket asa ikuburken i Napa Nuhnuhen Gog.

¹⁶Merkitè bagidi ipepanting mo tanoh i ipas simelamun nai. (I podi ari, lot mo kuta i napa i, dos gerarna dekket Nuhnuhen Gog.)”

¹⁷Idokken JAHOWA Sintèmbul i mo mbang aku, “Alè jelma simangko-angko, kirap mo karina manuk-manuk dekket binatang sidèbankenna, asa merrohen tah i dikè nai dèba lako kipangani pèlèen siKupèmaken bai kalak i. Merkerja mbellen mo aku i delleng-delleng Israel. I sidi mo mangan gulè dekket mènum daroh kalak i.

¹⁸Ipangani kalak i mo bangkè-bangkè lubalang dekket mengènum daroh penguasa-penguasa dunia. Karina lubalang dekket penguasa i, ibunuh bagè kambing tonggal barang anak-anak kambing, barang lembu-lembu nggomok.

¹⁹Enggo kessa Kubunuh kalak i bagè pèlèen ipangani manuk-manuk dekket binatang-binatang sidèban i mo karina pessohna sanga bauen, janah mengènum daroh sanga mabuk.

²⁰Ipas mèjangKu bessur mo kalak i dekket karina kuda bak penunggangna dekket lubalang-lubalang. Aku JAHOWA Sintèmbul i ngo sienggo mendokken i.”

²¹Idokken JAHOWA, “Kupacidah mo kemuliaenKu taba bangsa-bangsa. Karina kalak i idah-idahen bakunè Aku mempergunaken kuasangKu lako mengulaken keputusen-keputusen adil.

²²Mulai i sidi nai ibettoh kalak Israel mo, Aku ngo JAHOWA Dèbata kalak i.

²³Janah satdar mo karina bangsa, ibuang pè kalak Israel kumarna dosa kalak i taba Aku ngo. Enggo Kutadingken kalak i janah Kubelli italuken musuh dekket ibunuh tupung geraha.

²⁴Kubaing mo taba kalak i rembang mi kinilamun dekket kejahaten kalak i, nai Kutadingken mo kalak i.”

²⁵Idokken JAHOWA Sintèmbul i, “Tapi ukum bagèndari masèh ngo atèngKu midah bangsa Israel pemparen si Jakob, janah kubaing mo kalak i nduma nola mengolihi. Merkitè bagidi enggo Kujaga asa tong ipesangap gerarKu.

²⁶Mula merian nola kalak i i nagerrina sendiri mersennang-sennang, janah sada kalak nè poda mengasup kalak i, nai ilupaken kalak i mo, barang bakunè kin pè kalak i ipemalu kumernaken menelbuh Aku.

²⁷Kuarak mo kalak i balik i nagerri musuh kalak idi nai, janah idah karina bangsa mo kebadiaenKu kumarna siKubaing i.

²⁸Nai ibettoh bangsangKu i mo, Aku ngo JAHOWA Dèbata kalak i. Kumarna Aku ngo memaing kalak i terbuang, tapi Aku ma ngo mengarak kalak i mulak mi nagerri kalak i sendiri, oda lot isè nè tading i sadoi.

²⁹Kuarirken mo tendingKu bai bangsa Israel, janah oda nè kutadingken kalak i. Aku, JAHOWA Sintèmbul i ngo enggo mendokken i.”