Read Batak Dairi Hesekiel 4 Bible Online

Hesekiel 4 - Batak Dairi bible

Hesekiel 4

¹Idokken Dèbata mo, “Alè jelma simangko-angko, buat mo sada batu bata mbellang, gamparken i lebbèmu, janah okir i babona gombaren kuta Jerusalem.

²Nai gombar ma mo terkubu kuta i, parik-parik, tanoh-tanoh tèmbunen, perundung-undungen dekket perkekkas pengongkil i sikuliling pagar batuna.

³Buat mo panci bessi janah ètong mo i dosken dingding bessi, gamparken mo panci idi i kellang-kellangmu dekket kuta Je- rusalem. Nai dempakken mo mi kuta i, bagè cara kono simengkubu. Idi mo gabè pertanda bai bangsa Israel.

⁴Nai galè mo ko sedding denden kambirang, janah Kupesempa mo kesalahen Israel bamu. Sidekkah 390 ari kono galè bagidi janah menggongken simpersuk kumernaken kesalahen kalak i. Sidari kono galè bagidi menandaken sitahun hukumen Israel.

⁶Enggo kessa i sedding nola mo ko mi kamuhun janah rasaken mo hukum kumarna kesa- lahen Juda empatpuluh ari dekkahna, sidari menandaken sitahun hukumen kalak i.

⁷Tengen mo terkubu Jerusalem. Asupken mo tènju-tènjumu mi kuta i janah bagahken mo tennahKu tersèngèt hukum mengenna bai kalak i.

⁸Kuèkèt mo kono gabè maknè ndorok ko pekessingken dagingmu i kambirang nai mi kamuhun barang pè balikna sakat soh merpunca pengkubuen i.

⁹Bagèndari buat mo pagè, daba, rias mbara, kertak, cingkerru dekket pagè metmet. Campur mo i karina janah bahan mo roti. Idi mo panganenmu sidekkah 390 ari galè sedding denden kambirang i.

¹⁰Kennah pella mo roti i asa gennep ari 230 gram ngo kessa panganenmu. Oda ndorok lebbih i sidi nai.

¹¹Laè ènumenmu pè merkedekoen ngo imo dua mangkuk sidari.

¹²Lakati mo api merkitèken kotoren jelma mahan sebbanna. Tutung mo rotimu i babo api i janah pangan mo roti i i lebbè jelma nterrem.”

¹³Nina JAHOWA, “Bagidi mo carana luas kalak Israel kipangan pangaen sinigerra patien si Musa, tikan Kubuang kalak i mi nagerri ndèba.”

¹⁴Tapi kualoi mo, “Nong alè JAHOWA Sintèmbul i! Mulai kèdèkku nai soh bagèndari madèng pennah kulamuni diringku merkitè kipangan bangkè binatang barang iba-iba biahat. Oda nung kupangan haram.”

¹⁵Nai nina Dèbata mo, “Jadi mula bagi, gancih kotoren jelma, ndorok ngo ipakkè ko kotoren lembu lako menutung rotimu.”

¹⁶Nai nina Dèbata mo, “Alè jelma simangko-angko, Kucèdai mo persediaen pangaen i Jerusalem. Ibagasen rembekbekken dekket terendep-endep merkira mo jelma kipangan panganenna dekket laè ènumenna.

¹⁷Mendellè mo kalak i kumernaken enggo kerri roti bak laè, janah ujungna matè mo kalak i kumarna dosa-dosana.”