Read Batak Dairi Hesekiel 40 Bible Online

Hesekiel 40 - Batak Dairi bible

Hesekiel 40

¹Sinderrangna i ari sipuluh bulan sada tahun peduapuluhlimaken terbuang kami, sipuluh empat tahun enggo kessa italuken Jerusalem, kuakapken mo roh kuasa JAHOWA, nai iembah mo aku laus.

²Ibas sada alaten, iembah JAHOWA mo aku mi tanoh Israel janah ibaing mo aku i pucuk delleng ndates. I lebbèngku kuidah mo simpulguk bangunen tosè mi sada kuta.

³Iembah mo aku mi sidi janah kuidah mo sada anak laki merkillok-killok bagè loyang, cènder i gembar pèntu pengkeruhen. Ijèmak tinali sibar-sibar i kaèn linen nai bak sibar-sibar kayu.

⁴Idokken anak laki i mo mbang aku, “Alè jelma simangko-angko, dengkohken mo seppè janah peratè-atèken mo karina siKupacidah bamu, ai kumernaken i ngo asa iembah kono mi sèn. Bagahken mo taba kalak Israel karinana sinaing idah kono èn.”

⁵Nai kuidah mo Bages JAHOWA ikulilingi pagar batu. Imulai anak laki i mo menibar pagar batu i merkitè sibar-sibar kayu sitellu mèter geddangna i. Keppè dates pagar batu i tellu mèter janah ngkapalna pè tellu mèter ma ngo.

⁶Enggo kessa i laus mo ia mi pengkeruhen simendempak mi kebincaren. Ipenangkih mo ardanna janah soh kessa ia mi babo, isibar mo babah pèntuna i, tellu mèter bekkangna.

⁷I podi pengkeruhen i lot sada dalan janah i kacimbang lambung sisina lot tellu bilik jaga. Dos ngo belgah bilik i karina; bentukna empat soki, janah henjur gennep sisina tellu mèter. Dingding kellang-kellang gennep bilik dos ngo ngkapalna, imo tengah tellu mèter. Njorok dèng ngo dalan i tellu mèter nai janah menghuju mi rumah mbellen mendempak mi Bages JAHOWA. Isibar anak laki i mo rumah mbellen i dapet mo bekkangna empat mèter; i ujung pèntu pengkeruhen i ngo bekkasna kan bagasen, imo sindessingna kalohon mi Bages JAHOWA, ngkapalna sada mèter.

⁸

⁹

¹⁰

¹¹Enggo kessa i isibar anak laki i mo dalan i pèntu pengkeruhen i; tengah pitu mèter, bekkang pèntu pengkeruhen i lima mèter.

¹²I lebbè bilik-bilik jaga simersibaren tellu kali tellu mèter i lot mo dingding batu ncerrep, sitengah mèter datesna, janah ngkapalna pè sitengah mèter ma ngo.

¹³Nai isibar anak laki i mo kellang-kellang i dingding batu kan podi sada bilik jaga i nai soh mi suberrangna, 12,5 mèter.

¹⁴Isibar ma ngo rumah mbellen i: Sipuluh mèter nggeddangna. Pèntu bages i menghuju mi kasèan ruar Bages JAHOWA.

¹⁵Kellang-kellang i pèntu pengkeruhen kan ruar soh mi dingding batu rumah mbellen kan simendempak Bages JAHOWA imo 25 mèter.

¹⁶I dingding batu kan podi dekket dingding batu kellang-kellang bilik-bilik i lot ngo jendèlana. Dingding batu kan bagasen simendempak mi dalan i, iokirken dekket gombaren benna silenjuhang.

¹⁷Nai iarahken anak laki i mo aku arap pèntu pengkeruhen i mi kasèan ruar Bages JAHOWA. I dingding batu kan sisi ruar i sikuliling Bages JAHOWA i ibahan ngo 30 bilik. I lebbè bilik-bilik i lot ngo hatap batu,

¹⁸mengkulilingi karina kasèan i. Ncerrepen ngo kasèan ruar i daripada kasèan kan bagasen.

¹⁹Lot ngo i sidi pèntu pengkeruhen sidèban terdatessen ibaing janah menghuju mi kasèan bagasen. Isibar anak laki i mo kellang-kellang sidua pèntu pengkeruhen i: 50 mèter.

²⁰Enggo kessa i, isibar anak laki i mo pengkeruhen kan utara simenghuju mi kasèan kan bagasen.

²¹Pèntu pengkeruhen i, dos ngo sibaren telluna bilik jaga i gennep kacimbang lambung sisi dalan, dingding batu kellang-kellang dekket sapo mbellenna dekket silot i pèntu pengkeruhen kan kebincaren. Karina dalan pengkeruhen i 25 mèter nggeddangna janah sipuluh dua mèter bekkangna.

²²Bang bilik mbellenna, jendèlana dekket okir batang kerambirna dos ngo dekket silot i pèntu pengkeruhen kan kebincaren. Pitu ntingkah anak tangga lako mi pengkeruhen i, janah ipuncana lot bilik mbellen mendempak mi kasèan ruar Bages JAHOWA.

²³Pehadep dekket pengke- ruhen kan utara, lot ngo pengkeruhen sidèban menghuju mi kasèan bagasen, dos dekket pengkeruhen sikan kebincaren. Isibar mo perkelangen sidua pengkeruhen i: 50 mèter.

²⁴Nai iembah anak laki i mo aku mi pèntu pengkeruhen kan selatan dekket menibar. Keppè dos ngo pengkeruhen i dekket pengkeruhen sidèbanna i.

²⁵Jendèla- jendèla bilikna i pè dos ngo dekket silot i pengkeruhen sidèban i. Nggeddang dalan pengkeruhen i 25 mèter dekket bekkangna 12,5 mèter.

²⁶Pitu ntingkah anak tangga menuju pengkeruhen i, janah bilik mbellenna pè lot ngo i punca, mendempakken kasèan ruar Bages JAHOWA. I dingding kan bagasen simendempak mi dalan i, iokir dekket okir batang kerambir.

²⁷I sidi pè lot ma ngo pengkeruhen menghuju mi kasèan bagasen. Isibar anak laki i mo perkelangen pengkeruhen sidua i: 50 mèter.

²⁸Nai iembah anak laki i nola mo aku arap pengkeruhen selatan, masuk mi kasèan kan bagasen. Isibar mo pegkeruhen selatan i, ja- nah dos ngo sibarenna dekket pengkeruhen- pengkeruhen sikan ruar.

²⁹Bilik jagana, bilik mbellenna dekket dingding batu kan bagasen dos ngo dekket silot i pengkeruhen sidèban i. Bilik-bilik i pengkeruhen èn pè merjendèla ngo. Dalan pengkeruhen i 25 mèter nggeddangna, janah 12,5 mèter bekkangna.

³⁰

³¹Tapi ukum bilik mbellenna mendempak mi kasèan ruar. Dingding batu kan bagasen simendempak mi dalan, iokiri ma ngo dekket okir batang rangin-rangin. Ualuh ntingkah anak tangga i menghuju mi pengkeruhen.

³²Enggo kessa i iembah anak laki i mo aku arap pengkeruhen kebincaren masuk mi kasèan bagasen. Isibar mo pengkeruhen i, dos ngo sibarenna dekket pengkeruhen sidèban i.

³³Bilik jagana, dingding batu kan bagasen dekket bilik mbellenna, bagè pengkeruhen sidèban i ma ngo sibarenna. I bilik i dekket i bages mbellenna lot ngo jendèlana. Nggeddang dalan pengkeruhen i 25 mèter janah bekkangna 12,5 mèter.

³⁴Bages mbellenna mendempak mi kasèan ruar. Dingding batu kan bagasen simendempak dalan iokir dekket okir batang rangin-rangin. Ualuh ntingkah anak tangga menghuju mi pengkeruhen i.

³⁵Perpodi iembah anak laki i mo aku mi pengkeruhen utara. Isibar mo pengkeruhen i, dos ngo sibarenna dekket pengkeruhen sidèban.

³⁶Bang bilik jagana, dingding batu kan bagasen dekket bages mbellenna dos ngo dekket silot i pengkeruhen sidèban. Lot ngo jendèlana i gennep bilik dekket bages mbellenna. Nggeddang dalan pengkeruhen i 25 mèter janah bekkangna 12,5 mèter.

³⁷Sapo mbellenna mendempak mi kasèan ruar. Dingding batu kan bagasen mendempak mi dalan ihias dekket okir batang kerambir. Ualuh tingkah anak tangga mi pengke- ruhen i.

³⁸I kasèan ruar lot ngo sada bilik ambihen i pengkeruhen kan bagasen i utara. Ibas bilik ambihen idi nai lot ngo sada pèntu menghuju mi bilik mbellen. I sidi mo iborih pinakan silako mahan pèlèen situtungen.

³⁹I bilik mbellen i lot ngo empat mèja, terdua i bidingna kacimbang lambung. I babo mèja i mo isèat pinakan mahan pèlèen situtungen, barang pèlèen penasa dosa barang pèlèen gancih rogi.

⁴⁰I ruar bilik mbellen i lot dèng ma ngo empat mèja, terdua i gennep biding pengkeruhen utara i.

⁴¹Jadi, lot ngo ualuh mèja karina mahan bekkas menèat pèlèen: Empat i bagasen janah empat i ruar bages mbellen i.

⁴²Siempat mèja i bilik ambihen bekkas mengkebasi pèlèen situtungen idi, ibas batu nai ngo idakdak. Sitengah mèter ngo dates mèja i, empat soki ngo kan babona, nggeddang bak bekkangna tertellu perempat mèter. I babo mèja-mèja i ngo ipennep perkekkas menèat pinakan pèlèen i.

⁴³Biding mèja-mèja i merbater ngo 75 millimèter bekkangna. Karina jukut sinaing ipèlèken igamparken ngo i babo mèja-mèja i.

⁴⁴Enggo kessa i, iembah anak laki i mo aku mi èmpèr kan bagasen. Lot ngo i sidi dua sapo-sapo, sada i biding pengkeruhen utara janah mendempak mi selatan, si sada nai i biding pengkeruhen selatan mendempak mi utara.

⁴⁵Ibagahken anak laki i mo bangku ukum sapo-sapo mendempak mi selatan i ipèmaken bai pengendeng simerkebbas i Bages JAHOWA,

⁴⁶ukum sapo-sapo simendempak mi utara ipèmaken bai pengendeng simerkebbas i langgaten. Karina pengendeng i kennah pemparen si Zadok ngo. Kumarna pellin pemparen si Zadok ngo kessa i marga Lewi nai ndorok menghadep JAHOWA lako mengkebasisa ibas perpulungen.

⁴⁷Isibar anak laki i mo kasèan kan bagasen. Empat soki ngo bentukna: Nggeddang bak bekkangna ter 50 mèter. Kan kesunduten ngo Bages JAHOWA i, janah i lebbèna lot sada langgaten.

⁴⁸Nai iembah mo aku mi bilik kan lebbè Bages JAHOWA i ninganna meningkah piga-piga anak ardan. Isibar mo dalan mbengket; pitu kali tengah tellu mèter bellangna, dekket dingding i bidingna duana tengah dua mèter ngkapalna. I kambirang kamuhunna lot tersada binangun. Bekkas kan lebbè i sipuluh mèter nggeddangna janah ennem mèter bekkangna.