Read Batak Dairi Hesekiel 41 Bible Online

Hesekiel 41 - Batak Dairi bible

Hesekiel 41

¹Iembah anak laki i mo aku mi bilik tengah, sinigerarenna Bekkas Simbadia. Isibar mo dalan menghuju mi sidi: Tellu mèter nggeddangna,

²janah bekkangna lima mèter. Ngkapal dingding sisina kacimbang lambung tengah tellu mèter ngakapalna. Nai isibar mo Bekkas Simbadia i: 20 mèter henjurna janah sipuluh mèter bekkangna.

³Enggo kessa i ibengketti mo bilik kan bagasen. Isibar mo dalan sinisidi: Sada mèter nggeddangna, tellu mèter bekkangna, janah ngkapal dingding sisina kacimbang lambung tengah empat mèter.

⁴Nai isibar ma mo bilik i: Empat soki ngo bentukna, nggeddang bak bekkangna tersipuluh mèter. Enggo kessa i nina mo mbang aku, “En ngo bekkas Simbadia kalohon.”

⁵Enggo kessa i isibar anak laki i mo dingding kan bagasen Bages JAHOWA: Ngkapalna tellu mèter. I dingding batu sikuliling Bages JAHOWA i lot ngo bilik-bilik dua mèter bekkangna.

⁶Tellu tèngkat ngo bilik-bilik i janah gennep tèngkat lot 30 bilik. Dingding batu kan darat i gennep tèngkat menipisen daripada dingding batu i tèngkat kan terruhna, gabè ndorok isusun bilik-bilik i oda pella ilubangi dingding batu Bages JAHOWA i.

⁷I darat nai dos ngo tengennen ngkapal dingding batu Bages JAHOWA idi i terruh nai soh mi babo. I dingding batu Bages JAHOWA, kan ruar bilik-bilik i, lot ngo dua ardan mbelgah, gabè ndorok mo jelma laus i tengkat terruh nai mi tèngkat dua bak tellu.

⁸Ngkapal dingding batu kan ruar bilik i tengah tellu mèter. Lot ngo pèntuna mi bilik-bilik sikettan utara Bages JAHOWA i, bagi ma bak pèntu sidèban mi bilik-bilik sikan selatan. I sikuliling Bages JAHOWA lot ngo èmpèr tengah tellu mèter bekkangna; bekkasna tellu mèter i tanoh nai, dos ngo datesna ibaing dekket dangaen bilik-bilik dingding batu Bages JAHOWA. I kellang-kellang èmpèr dekket sapo sinipakkè pengendeng, lot ngo kasèan sipuluh mèter bekkangna, i kambirang bak kamuhun Bages JAHOWA.

¹²I kèparen kasèan kan kesunduten, lot ngo bages mbelgah, 45 mèter nggeddangna janah 35 mèter bekkangna, ukum ngkapal dingdingna tengah tellu mèter.

¹³Isibar anak laki i mo nggeddangna Bages JAHOWA: 50 mèter. Kan podi Bages JAHOWA nai soh mi dingding batu kan podi bages mbelgah sikan kesunduten i, 50 mèter ma ngo perkelangenna.

¹⁴Si kan lebbè Bages JAHOWA simendempak mi kebincaren dekket kasèan kacimbang lambungna, 50 mèter ma ngo bekkangna.

¹⁵Isibar anak laki i ma ngo bages mbelgah simendempak mi kasèan kan kesunduten: 50 mèter bekkangna, enggo dekket dingding i kacimbang lambungna. Bilik-bilik silot i Bages JAHOWA, bilik lebbè, Bekkas Simbadia, dekket Bekkas Simbadia kalohon,

¹⁶ihias merbingkè kayu, mulai ihatapna nai soh mi jendèla-jendèla. Ndorok ngo itutup jendèla-jendèla i dekket kirè-kirè.

¹⁷Karina dingding kan bagasen iokir ngo dekket okir

¹⁸batang kerambir dekket kerub, sada batang kerambir mo i perkelangen dua kerub. Dua ngo abè kerub i,

¹⁹sada abè jelma mendempak mi batang kerambir sikan kambirang janah abè singa simendempak mi batang kerambir kan kamuhun. Lot ngo okir-okiren i i karina Bages JAHOWA,

²⁰mulai i hatap nai soh mi perhabang pèntu.

²¹Tihang-tihang pèntu mulai i Bekkas Simbadia nai merbentuk empat soki. I lebbè Bekkas Simbadia kalohon, lot ngo sada bagè idahen bagè langgaten kayu.

²²Tengah dua mèter datesna, bekkangna sada mèter. Sokina, alasna dekket dingdingna ibaing ibas kayu nai. Idokken anak laki i mo mbang aku, “En mo mèja silot i hadeppen JAHOWA.”

²³I punca dalan lako mi Bekkas Simbadia lot ngo sada pèntu, bagidi ma i punca dalan lako mi Bekkas Simbadia kalohon.

²⁴Gennep pèntu i bellah dua, mula ibuka ntalngah i tengah.

²⁵Iokir ngo pèntu Bekkas Simbadia dekket okir batang kerambir dekket kerub-kerub, tosè bagè silot i dingdingna. I lebbè bekkas si kan jolo kan ruarna, lot ngo kirè-kirè kayu.

²⁶I punca dingding sidua kacimbang lambung lot ngo jendèla-jendèla, janah iokir ngo dingdingna dekket okir batang kerambir.