Read Batak Dairi Hesekiel 42 Bible Online

Hesekiel 42 - Batak Dairi bible

Hesekiel 42

¹Enggo kessa i, iarahken anak laki i mo aku mi kasèan ruar janah meneggu aku mi bages sidèban kan utara Bages JAHOWA, oda pella ndaoh i sapo mbelgah kan kesunduten Bages JAHOWA i nai.

²Nggeddang bages i 50 mèter janah bekkangna 25 mèter.

³Sada lumpak bages i mendempak mi kasèan si sipuluh mèter bekkangna i, lumpak sidèbanna mendempak mi hatap batu kasèan ruar. Mertèngkat tellu ngo bages i; gennep tèngkat menjorok narih mi bagasen daripada tèngkat siniteruhna.

⁴I lebbè bilik-bilikna i kan bagasen lot ngo dalan lima mèter bekkangna janah nggeddangna limapuluh mèter. Pèntu-pèntuna mendempak mi utara.

⁵Bilik-bilik i tèngkat babo, lebih kèdèk daripada bilik-bilik silot i tèngkat terruhna, kumerna belangen dalan i lebbè bilik-bilik kan babo i daripada siniterruhna.

⁶Mertèngkat tellu ngo bilik-bilik i janah oda pella itongkel tihang-tihang, bagè bages silot i kasèan.

⁷Sitengah ipas tèngkat terruh, duapuluh lima mèter nggeddangna merumangken dingding sambing ngo kessa, janah lebihna i siduapuluh lima mèter nai, ibaing merbilik-bilik mengèkutken nggeddang bages i,

⁹I terruh bilik-bilik puncana kan kebincaren bages i janah seppet mi benna dingding, lot sada pèntu dalan mi kasèan ruar. I biding kan selatan Bages JAHOWA, lot ma ngo bages dos mi sidi, oda pella ndaoh i bages kan kesunduten nai.

¹¹I lebbè bilik-bilikna i lot ngo dalan dos bagè dalan kan utara. Sibarenna pè dos, bentukna pè dos janah pèntu-pèntuna pè dos.

¹²I terruh bilik-bilik kan biding selatan, imo i puncana kan kebincaren seppet mi benna dingding, lot ma ngo sada pèntu.

¹³Nai nina anak laki i mo mbang aku, “Mbadia ngo duana bages i. I sidi mo imam ndorok menghadep JAHOWA, kipangan pèlèen simbadia kalohon. I sidi ma mo ibaing pèlèen simbadiana kalohon, imo: Pèlèen pagè dekket pèlèen penasa dosa barang pèlèen gancih kerogien.

¹⁴Mula enggo pul imam merkebbas i Bages JAHOWA, janah naing laus mi kasèan kan ruar, kennah itadingken ngo pakèen merkedekoen sinipakkèna tikan merkebbas idi i bilik-bilik i. Kennah mersalin ngo kalak i, nai ipè asa ndorok kalak i laus mi bekkas jelma nterrem merpulung i.”

¹⁵Enggo kessa pul isibar anak laki i Bages JAHOWA kan bagasen, iarahken mo aku mi ruar arap pengkeruhen kebincaren nai isibar mo kuliling Bages JAHOWA.

¹⁶Dekket tongket sibar-sibarna i ngo ia menibar biding kan kebincaren: 250 mèter.

¹⁷Nai isibar ma mo bidingna kan utara, bidingna kan selatan dekket bidingna kan kesunduten; nggeddangna gennep biding ter 250 mèter ngo.

²⁰Jadi Jahjahen Bages JAHOWA sagi ngo, sibarenna 250 mèter gennep bidingna. Ikulilingi pagar batu ngo nasa bellang tanoh lako menirang jahjahen simerkedekoen bai JAHOWA, ibas jahjahen lako bai sinterrem.