Read Batak Dairi Hesekiel 43 Bible Online

Hesekiel 43 - Batak Dairi bible

Hesekiel 43

¹Enggo kessa i, iarahken anak laki i mo aku mi pengkeruhen simendempak mi kebincaren,

²janah i sidi mo kuidah roh cuhaya merkillok-killok i kebincaren nai menandaken pekiroh Dèbata Israel. Terdengkoh mo sora JAHOWA bagè perdebbur laut, janah tanoh èn kabutbat kumarna cuhaya pekiroh JAHOWA.

³Dos ngo alaten i dekket sikuidah sinderrang roh JAHOWA lako mengelala Jerusalem, dekket bagè sikuidah i Laè Kebar. Nai kugeppahken mo baku janah sujud.

⁴Merdalan mo cuhaya merkillok-killok i arap pengkeruhen kebincaren, nai mbengket mi bagasen Bages JAHOWA.

⁵Idokong Tendi JAHOWA mo aku janah iembah mi kasèan bagasen; kuidah mo i sidi Bages JAHOWA isangkemmi cuhaya pekiroh JAHOWA.

⁶Sinderrang cènder dèng anak laki i i gembarku kudengkoh mo idokken JAHOWA mbang aku ibagasen Bages JAHOWA nai, nina mo,

⁷“Alè jelma simangko-angko, èn ngo tahtangKu. Isèn mo Aku merian i tengah-tengah bangsa Israel dekket memerèntah kalak i soh mi amman sumendah. Karina kalak i dekket raja-raja, oda nè- ngè mengelèai gerarKu simbadia, merkitè menembah gana-gana barang merkitè mengkubur bangkè raja-raja kalak idi i bekkas èn.

⁸Ukum arnia ibaing raja-raja kalak i ngo perhabang dekket tihang pèntu istanana i gembar perhabang dekket tihang pèntu BagesKu, gabè pellin dingding sambing mo kessa kellang-kellangna. Enggo ilèai kalak i gerarKu simbadia merkitè pengelakona simeronah i. Kumara i Kuripasken mo kalak i kerna lagangKu.

⁹Tapi mulai bagèndari nai kennah oda nè kalak i menembah sembahen bak mengompat bangkè raja-raja kalak i. Enggo kessa i, merian i tengah-tengah kalak i mo Aku soh mi amman sumendah.”

¹⁰Nai idokken JAHOWA dèng ma, “Alè jelma simangko-angko, bagahken mo taba bangsa Israel tersèngèt BagesKu èn, janah dokken mo kalak i mendatèken rancangen kalak i. Baing mo kalak i termèla kumarna karina dosana.

¹¹Janah enggo kessa mèla kalak i kumerna pengelakona, bagahken mo gambar BagesKu èn taba kalak i: Bentukna, pèntu mbengket dekket pèntu karuarna, persusunna, karina hatoren dekket hukumna. Suratken mo karinana i bai kalak i asa ibettoh janah iperatè-atèken kalak i cara mengatur karina, dekket menguèi karina hatorenna.

¹²Bagèen ngo sipat Bages JAHOWA: Karina jahjahen sikulilingna i babo delleng mbadia kalohon ngo.”

¹³Bagèen ngo sibaren langgaten mengèkutken sibaren sinipakè lako menibar Bages JAHOWA. Kuliling nèhè langgaten i lot ngo sada parik sitengah mèter bagesna janah bekkangna pè sitengah mèter ma, bak laisna kan biding kan ruar siperempat mèter.

¹⁴I parik nai soh mi bagian langgaten perterruhna, sada mèter datesna. Kan tengahna dua mèter datesna, janah sitengah mèter sempiten daripada kuliling nèhè langgaten i. Bagian petelluken imo pucuk langgaten i, sitengah mèter ma ngo sempiten daripada kuliling bagian tengahna.

¹⁵Bagian sipetelluken èn imo bekkas menutung pèlèen; dua mèter datesna. Ipas sokina siempat i lot ngo njurjur bagè tanduk.

¹⁶Babo langgaten i merbentuk empat soki; gennep sisina ennem mèter nggeddangna.

¹⁷Sikan tengahna i ma pè sagi ma ngo bidingna gennep terpitu mèter dekket laisna kan ruar siperempat mèter datesna. (Bekkang parikna sitengah mèter). I bidingna kan kebincaren lot ngo ardan lako mi babo langgaten i.

¹⁸Idokken JAHOWA Sintèmbul i mo mbang aku, “Alè jelma simangko-angko, dengkohken mo kadè siKudokken bamu èn. Enggo kessa pul ibahan langgaten i, kennah pèstankenmu ngo merkitè menutung pèlèen i babona janah pispisi dekket daroh sipèlènken i.

¹⁹Pellin pengendeng pemparen si Zadok i marga Lewi nai ngo kessa ndorok roh mi hadeppenKu lako mengkebasi pulungen. Aku, JAHOWA Sintèmbul i ngo simemerèntahken i. Berèken mo taba kalak i sada lembu tonggal poso dèng mahan pèlèen kesasaen dosa.

²⁰Buat mo cituk darohna, janah dalisken mi tanduk silot i soki siempat i, bagi ma dekket soki sikan tengahna bak i sikuliling lais langgaten i. Bagi mo caramu menguras langgaten i dekket mengkedekoken bangKu.

²¹Kessa i nola, buat mo lembu tonggal mahan kesasaen dosa, janah tutung mo i bekkas sienggo itentuken imo i ruar bekkas simbadia Bages JAHOWA.

²²Sibarembenkenna kennah pèlèken sada kambing tonggal siso mertikas mahan pèlèen pengampuni dosa. Uras mo langgaten i dekket daroh kambing i, tosè bagè pemaingmu lembu tonggal anakna i dèng.

²³Mula enggo kessa pul iulaken kono i, buat mo sada anak lembu bajar tonggal dekket sada anak kambing bajar tonggal, duana i oda lot tikasna,

²⁴nai embah mo mendahi Aku. Pengendeng-pengendeng kennah menircirken sira mi babo pinakan sidua i dekket menutungsa gabè pèlèen bangKu.

²⁵Gennep ari sidekkah pitu ari, kennah pèlèenkenmu sada kambing, anak lembu tonggal, dekket kambing tonggal mahan pèlèen pengampuni dosa. Oda ndorok mertikas pinakan i.

²⁶Pitu ari dekkahna karina pengendeng kennah memaing kerja memèstaken langgaten i dekket menghantarisa asa ndorok i pakkè.

²⁷Enggo kessa dung sipitu ari i, kennah imulai pengendeng mo memèlèken pèlèen situtungen dekket pèlèen perdamèen bai bangsa i i babo langgaten i. Nai sennang mo atèngKu midah kènè karinana. Aku, JAHOWA Sintèmbul i ngo sienggo mendokken i.”